La mujer y el dragón
12
Cabero yʉ ca-tʉjʉ mʉgojowʉ tunu ʉmʉrecóopʉre.
Yʉ ca-tʉjʉ mʉgojoro cãromio ca-buianʉca ejawõ.
Seeto ca-buju batewõ.
Muipu ʉmʉreco macacʉpʉre ca-jañaore bairona ca-buju batewõ.
To bairona muipu ñami macacʉ buire ca-tʉjʉnucuore bairo ca-bauwõ.
Cõ rʉpoa buire ca-pejawõ ca-ajiyari beto caʉpaʉ cʉ̃ rʉpoapʉ cʉ̃ ca-pejari beto unore.
Cõ ca-pejari betopʉre ñocoa doce majuu ca-ãma.
2 To bairi ʉtaa ca-ãmo.
Petoacã ca-rʉjawʉ cõ ca-macʉ cʉtiparo.
To bairi cõ macʉ cʉ̃ ca-buiaparo jʉgoye seeto ca-awajawõ,
wijiobaco.
3 To bairo cõ ca-tamuori paʉna ʉmʉrecóopʉ apeĩ ca-buia ejawĩ tunu.
Dragón ca-wamecʉcʉ majuu ca-buia ejawĩ.
Ca-jũaʉ capaii majuu ca-ãmi.
Siete majuu ca-rʉpoaricʉmi.
Diez majuu ca-jawiaricʉmi.
To canacã rʉpoapʉrena ca-ajiyari betori ca-ãmʉ,
caʉparã na ca-pejarije unie.
4 To bairi cʉ̃ picõro mena ñocoare ca-ñu wãre ñoo joowĩ.
Capaarãre na ca-ñu wãre ñoo joowĩ la tercera parte majuure ati yepapʉre yua.
Na ñu wãre ñoo joo yaparo cãromio cõ ca-ano riapepʉ ca-tʉjʉnucuwĩ.
Cõ Macʉ ca-buiapaʉre cõ ema ʉgagʉ ca-yuu tʉjʉnucuwĩ.
5 To bairi cõ Macʉ ca-buiawĩ yua.
Cʉ̃ maca to canacã maca macanare ca-rotipaʉ ca-ãmi.
Tutuaro mena na ca-rotipaʉ majuu ca-ãmi.
To bairo cõ Macʉacã cʉ̃ ca-buiaro tʉjʉʉ yua,
dragón maca cʉ̃ ca-ʉga rocacõagabami.
To bairo cʉ̃ ca-ʉga rocagari paʉna Dio maca ca-roti majuʉ cʉ̃ ca-ruiro tʉpʉ cõ Macʉacãre cʉ̃ ca-ne mʉgo weocoa joowĩ ʉmʉrecóopʉ.
6 Cʉ̃ paco maca ca-ruticoamo camaja na ca-manopʉ.
Dio cõre cʉ̃ ca-quenoobojarica paʉpʉ ca-ruticoamo.
Topʉ cõ ca-ejaro caroaro cõre ca-cotewĩ Dio.
Mil doscientos sesenta rʉmʉri majuu cõ ca-cotewĩ topʉre.
7 Cabero yʉ ca-tʉjʉwʉ tunu ʉmʉrecóopʉ aperã na ca-amequẽro.
Topʉ jicã nʉgoana Miguel cʉ̃ mena macana ángel maja,
ca-ñuurã mena ca-ãmi.
Ape nʉgoa maca dragón cʉ̃ mena macana,
cʉ̃ tʉ macana ca-ñuuquẽna mena ca-ãmi.
Na nipetirã ca-amequẽwã.
8 To bairo amequẽ yua,
Miguel jãa ca-ñuuquẽnare na ca-quẽ netowã.
Na quẽ neto,
ca-ñuuquẽnare ʉmʉrecóopʉre na ca-ani rotiquẽma.
9 To bairi Dragón're ati yepapʉre cʉ̃ ca-pa ne roca ruio joowã.
Diablo wãtia ʉpaʉ o Sataná ca-wamecʉcʉ ãmi.
Ati yepa macana nipetirãre ca-ĩito paii majuu ãmi.
Cʉ̃ mena macana,
ca-ñuuquẽnare wãtia quenare to bairona na ca-pa jee ree ruio joowã na quenare Miguel jãa,
ʉmʉrecóopʉ ca-anibatanare na quẽ netori.
10 To bairo nare na ca-reero bero ʉmʉrecóopʉ ca-wadarijere yʉ ca-apiwʉ.
Seeto majuu ca-wadawã ʉmʉrecóo macana:
—Meere yua,
wãtia ʉpaʉre pa ne roca ruio joowã.
Mani yarã Diore ca-nʉcʉbʉgorã ti yepa macanare Diopʉre ca-wada paii majuure pa ne roca ruio joowã,
meere.
Diopʉre,
“Rooro áama mʉ yarã,”
to canacã rʉmʉ,
ʉmʉreco quenare,
ñami quenare ca-ĩi wada painucuʉre pa ne roca ruiocõa joowã yua.
Dio maca Satanáre cʉ̃ netocõawĩ.
Ca-roti majii aniri cʉ̃ netocõawĩ.
To bairi Dio cʉ̃ ca-rotiri paʉ,
meere ani tʉga.
Cʉ̃ Macʉ quena cʉ̃ ca-jooricʉ nipetirijere rotigʉmi yua.
11 To bairi mani yarã ti yepa macana Diore ca-nʉcʉbʉgorã Satanáre cʉ̃ ca-bai netoo nʉcacõawã.
Popiye baibana quena Sataná cʉ̃ ca-wadajãrijere ca-bai netoo nʉcacõawã.
Caroare ca-apiʉjarã aniri to bairona ca-baiwã.
“Jesucristo,
Cordero ca-wamecʉcʉ manire cʉ̃ ca-rií peti yajibojarique jʉgori mani ca-netoo catíowĩ,”
ca-ĩi tʉgooñacõawã.
To bairona Dio yere ca-queti buiocõawã.
Aperã nare na ca-jĩagarije to ca-anibato quena to bairona Dio yere ca-queti buiocõa aninucuwã.
12 To bairi mania ʉmʉrecóo macana mani wariñuugarã.
Nipetirã ángel maja mani wariñuugarã wãtia ʉpaʉ cʉ̃re na ca-rocaro tʉjʉri.
To bairona mani maca caroaro mani ca-ani wariñuuri paʉre ti yepa macana maca popiye tamuogarãma.
Mar ca-pairi ya macana quena to bairona popiye tamuogarãma na quena.
Wãtia ʉpaʉ Sataná ʉmʉrecóopʉ ca-roca ecooricʉ maca rooro na átigʉmi ti yepa macanare.
Seeto punijinimi,
peeropʉ yʉre na ca-rocaparo jʉgoye petoacã rʉja ĩi.
To bairona yʉ ca-apiwʉ ʉmʉrecóopʉ ca-wadarijere yua.
13 To bairi Sataná yepapʉre ca-roca ecooricʉ aniri cãromiore cõ ca-atʉ ʉjawĩ.
Meere,
ca-macʉ cʉtacore cõ jĩa rocagʉ cõ ca-atʉ ʉjawĩ.
14 To bairo cʉ̃ cá-áto Dio maca cõre ca-camotabojawĩ.
Aá capaii cʉ̃ querʉpʉrire cõ ca-joowĩ,
pinore baii Satanáre cʉ̃re cõ wʉ ruti aáparo ĩi.
Camaja na ca-manopʉ cõ ca-ruti aáparore bairo ĩi querʉpʉrire cõ ca-joowĩ.
Topʉ itia cʉma ape cʉma recomaca cõre ca-cotewĩ Dio.
15 Cõ ca-wʉʉ ruti aáta paʉpʉ cõ ca-ano pinore bairo ca-ãcʉ̃ maca oco pairo cʉ̃ rijeropʉre ca-buti aáto cá-ámí,
cõre ruu rocagʉ.
To bairi cʉ̃ rijeropʉre oco pairo ca-butiwʉ,
ria cõo.
Cõre ne ruu aá rocagʉ to bairo cá-ámí pinore baii maca.
16 To bairo cʉ̃ cá-áto Dio maca cõ cá-átinemowĩ tunu.
Cõ átinemo,
pairi ope yepa ca-wati nʉcaro cá-ámí Dio.
To bairi ria ca-pairi ya dragón cʉ̃ rijeropʉ ca-butirique ti opepʉ ca-jãa peticoapʉ oco yua.
17 To bairo ca-bairo dragón maca seeto cõ ca-punijiniwĩ,
cõ jĩa majiquetibacʉ.
Punijini,
aperã cõ punaa mena amequẽgʉ cá-aácoami.
Dio cʉ̃ ca-rotiriquere ca-apiʉjarã mena,
Jesucristo ye quetire caroaro cariape ca-apiʉjacõa aninucurã mena amequẽgʉ cá-aácoami yua.