Los dos testigos
11
Cabero yʉ ca-joowĩ ángel tuericʉre bairo ca-anii,
cõoñaricʉre.
To bairo tiire yʉ joo:
—Ʉ̃jʉ,
atii cõoñaricʉ,
yʉ ca-ĩiwĩ.
—Dio ya wiire cõoñaʉja.
¿Noo cõo pairi wii to ãtí?
Ti wiipʉ Diore áti nʉcʉbʉgorã ca-jʉti ñuurijere na ca-joe buje mʉgori cajawo quena,
¿noo cõo pairi cajawo to ãtí?
ĩi cõoñaʉja,
yʉ ca-ĩiwĩ.
—To macana Diore ca-jeni nʉcʉbʉgorã quena,
¿noo cõo majuu na ãtí?
ĩi na mʉ cõoñawa,
yʉ ca-ĩiwĩ.
2 —Dio wii macá yepare mʉ cõoñaquẽpa.
Tona anigarãma aperã ape yepari macana Diore cá-áti nʉcʉbʉgoquẽna mai.
Nana ti macare Dio cʉ̃ ca-mairi maca áti rooye tuugarãma.
Ti maca macana quenare to bairona rooro na átigarãma.
Cuarenta y dos canacãʉ muipua majuu to bairona rooro na átigarãma,
yʉ ca-ĩiwĩ.
3 —To bairo na cá-áto na yʉ joogʉ yʉ yarã pʉgarãre,
yʉ yere ca-queti buiobojarãre.
Yʉ ca-majiorije jʉgori caroaro queti buiogarãma.
Mil doscientos sesenta rʉmʉri majuu yʉ yere to bairona queti buiogarãma.
Na jutii,
ca-tʉgooñarique pairã na ca-jañarije uniere bairo jañagarãma umarica poari macaje.
Wajiaro na ca-juariquere jañagarãma,
ca-tʉgooñarique pairã na ca-jañarije uniere.
To bairi na yʉ queti buio rotigʉ,
yʉ ca-ĩiwĩ ángel yua.
4 To bairi pʉgaʉ Olivo yucʉ ãmʉ Dio riape,
ati yepa macana Ʉpaʉ riape.
Jĩa bujurique ca-pejari tutuu quena ãmʉ pʉga tutuu cʉ̃ riape.
Dio ye quetire cʉ̃ ca-queti buiobojarã iñoo majioro bai ti tutuu.
To bairona nare iñoo majioro bai Olivo yucʉ pʉgaʉ.
5 To bairi ca-tutuarã anigarãma Dio ye quetire ca-buiobojarã na pʉgarã.
Camaja maca rooro na áti majiquetigarãma.
Rooro nare na cá-átigaro tʉjʉrã na jĩa reecõagarãma.
Peero na rijero ca-butirije mena na jĩa reecõagarãma rooro nare cá-átigarãre.
To bairona na joe reecõagarãma na wapanare Dio ye quetire ca-buiorã.
6 To bairi ca-oco ocaquẽto áti majigarãma.
To bairi ati yepapʉ na ca-queti buio ãno ocaquetigaro na ca-oca rotiquẽto maca.
To bairi ocore wajoa majigarãma.
Ocore rií majuu jeeñoo majigarãma.
To bairona átiri camaja popiye na ca-tamuoro na áti majigarãma.
Riaye na joo majigarãma.
Noo na ca-boori paʉ ca-ano to bairo na áti majigarãma Dio cʉ̃ ca-rotirije jʉgori yua.
7 To bairo camajare na ca-queti buio yaparoro apeĩ buti wamʉ ejagʉmi ca-ʉ̃cʉari opepʉ ca-jañaricʉ.
Ca-uwioʉ majuu ti opere buti wamʉ ejagʉmi yua.
To bairo buti wamʉ eja,
Dio ye queti ca-buiobojarã pʉgarã mena amequẽgʉmi.
Na mena amequẽ,
to cõona ca-uwioʉ maca na jĩa reecõagʉmi.
8 To bairo na cʉ̃ ca-jĩaro bero na rupaʉri ãnaje ma recomacapʉ cuñagaro.
Ca-pairi maca Jerusalén'pʉ mani Ʉpaʉ Jesúre cʉ̃ na ca-jĩarica macapʉ cuñagarãma.
Ti maca,
“Sodoma ãa,”
ĩima camaja.
Sodoma macana ca-aniñaricarã cõona caroorije átinucuma Jerusalén macana ĩirã ĩima.
Aperã,
“Ejipto ãa ti maca,”
ĩima,
to bairona caroorije átinucuma ĩirã.
To bairi ti macapʉ ma recomacapʉ cuñagaro na rupaʉri ãnaje,
pʉgarã Dio ye quetire ca-buio teñarã ca-anibatana.
9 Yoabʉjaro topʉna cuñagaro,
itia rʉmʉ ape rʉmʉ recomaca majuu.
To bairi camaja to canacã maca macana na rupaʉri ãnajere tʉjʉgarãma.
To canacã poa macana na tʉjʉgarãma topʉ ca-cuñarãre.
Na rupaʉri ãnajere yaa rotiquetigarãma camaja.
10 Dio ye quetire ca-buiobojarã na pʉgarã na ca-bai yajiro tʉjʉrã seeto wariñuugarãma ati yepa macana.
“Seeto manire ca-patowãcooricarã,
meere riacoa yaji aáma,”
ĩigarãma.
To bairo ĩi,
wapa mano ame nunigarãma apeye uniere,
seeto wariñuurã yua.
11 To bairo Dio ye quetire cʉ̃ ca-buiobojarã na ca-bai yajiro na ca-wariñuubato quena itia rʉmʉ bero,
ape rʉmʉ recomacana tunu catícoagarãma yua.
Dio cʉ̃ ca-majirije jʉgori tunu catícoagarãma.
Tunu catí,
tʉjʉnucugarãma,
ca-tunu catíricarã yua.
To bairo camaja maca na ca-tunu catíro tʉjʉrã,
seeto na uwigarãma.
12 Cabero ʉmʉrecóo macacʉ na wada ruiojogʉmi.
Ca-tunu catíricarã pʉgarãre na wada ruiojogʉmi pairo wadarique mena:
—¡Adʉja yʉ tʉpʉ!
¡Wamʉ ajá!
na ĩigʉmi.
To bairo cʉ̃ ca-ĩiro apirã ʉmʉrecóopʉ bujeri bʉrʉri watoapʉ wamʉ aácoagarãma yua.
Na wapana na ca-tʉjʉ mʉgo tʉjʉnucuro to bairona wamʉ aácoagarãma ʉmʉrecóopʉ.
13 To bairo na cá-aáto bero ti paʉ majuu ati yepa seeto wãregaro tunu.
To bairo ca-wãrero ti maca macaje wiiri ñaacoagaro jicã wiiri.
Un décimo majuu ñaacoagaro.
To bairo ca-bairo siete mil majuu camaja riacoagarãma ati yepa ca-wãrerije mena.
Ca-rʉjarã maca seeto uwigarãma.
“¡Ayu!
¡Dio jeto ãmi ca-roti majii!”
ĩigarãma yua.
14 Maa yua,
to cõona ãa camaja popiye na ca-tamuope diroa bero macaje pʉga wame.
To bairi camaja popiye na ca-bainemope ape wame rʉja tunu.
¡Ayu!
Tie quena yoaro mee baigaro yua.
La séptima trompeta
15 Cabero yua,
ángel apeĩ ca-putiwĩ tunu.
Seis bero macacʉ ca-ani tʉjaʉ majuu cʉ̃ putiricarore ca-putiwĩ:
“¡Puuuu!”
ca-putiwĩ.
To cõona yua,
ʉmʉrecóo macana ca-wadawã.
Tutuaro ca-wadawã:
Ti yepa macana caʉparã na ca-roti majirije to cõona peticoapa.
Yucʉra yua,
mani Ʉpaʉ Dio jeto roti majimi cʉ̃ Macʉ,
camaja tʉpʉ cʉ̃ ca-jooricʉ mena.
Cʉ̃ jeto roti majimi.
To bairona roticõa aninucugʉmi to canacã rʉmʉ,
ca-ĩi bajawã.
16 To bairo na ca-ĩi bajaro apirã,
cabʉcʉrã ca-rotirã veinticuatro majuu Dio tʉpʉre rʉpopatuaripʉ ejacumu mubiari Diore cá-áti nʉcʉbʉgowã.
Naa cʉ̃ ca-ruiro riape ca-rui atána to bairona Diore cá-áti nʉcʉbʉgowã.
17 To bairo cʉ̃ ĩi nʉcʉbʉgorã oco bairo ca-ĩiwã:
Jã Ʉpaʉ,
nipetirãre ca-roti majii mʉ ãa.
Nipetirijere mʉ áti maji.
Ca-ani jʉgoricʉ mʉ ãa.
Yucʉ quena to bairona mʉ anicõa aninucu.
Yucʉra yua,
mʉ ca-roti majirije mena camajare ca-rotii mʉ ca-ani tʉgayupa,
meere.
To bairi,
“Caroaro jãare mʉ átiboja,”
mʉre jã ĩinucu.
18 Ti yepa macana to canacã poa macana mʉre ca-booquẽma.
Mʉre punijiniri mʉre ca-bai netoo nʉcagabama.
To bairo mʉre na ca-booquetaje wapa to cõona na mʉ popiyeyegʉ.
Yucʉra yua ejacoapa nare mʉ ca-tʉjʉ bejeri rʉmʉ majuu.
Ca-bai yajiricarãre na mʉ ca-tʉjʉ bejeri paʉ majuu ejacoapa.
To bairi caroorije cá-ána maca popiye tamuogarãma.
Mʉ ca-rotirijere cá-áticõa ãna maca wariñuurique bʉgagarãma.
Mʉ ye quetire ca-queti buiorã,
mʉ ye quetire ca-apiʉjarã quena,
nipetirã mʉre cá-áti nʉcʉbʉgorã maca wariñuugarãma.
Caroare na mʉ joogʉ.
Ʉparã quena,
cawatoa ca-ãna quena nipetirã mʉre cá-áti nʉcʉbʉgorãre na mʉ joogʉ caroare.
Camaja ti yepapʉre ca-rooye tuu pairã macare na mʉ reecõagʉ,
ca-ĩi buiowã cabʉcʉrã ca-roti majirã,
Diore ĩi nʉcʉbʉgori.
19 To bairo na ca-ĩiro bero yʉ ca-tʉjʉwʉ tunu Dio wiire,
ʉmʉrecóopʉ ca-ani wiire.
To bairo yʉ ca-tʉjʉro ti wii jope ca-pã nʉcacoapʉ.
To bairo to ca-pã nʉcaro ti wii macá pata rocapatare yʉ ca-tʉjʉwʉ.
Ti patapʉ ca-jañawʉ Dio ye queti,
“Caroorije na cá-átiere na yʉ netoobojagʉ,”
cʉ̃ ca-ĩi ucarique.
To bairo yʉ ca-tʉjʉro yua,
bʉpo ca-yabe jʉgo ãmi.
Seeto ca-bʉjʉwʉ.
Bʉpoa quena seeto ca-bʉjʉwã.
Ati yepa quena ca-wãrewʉ tunu.
To bairi ca-joori rupaa oco weta rupaari ca-wẽewʉ seeto ati yepapʉre yua.