El ángel con el librito
10
Cabero yʉ ca-tʉjʉwʉ tunu ángel apeĩre,
ca-tutuaʉ majuure.
Ʉmʉrecoopʉ ca-rui acʉ́re cʉ̃ yʉ ca-tʉjʉ joowʉ.
Oco bujeri watoapʉ ca-rui amí.
Cʉ̃ rʉpoa buire bue betore bairo ca-bauwʉ.
To bairona cʉ̃ riya quena ca-buju batewʉ.
Muipu ʉmʉreco macacʉre bairona ca-buju batewʉ.
Cʉ̃ rʉpori quena ca-ʉ̃ʉ buju batewʉ.
Pairi peero ca-ʉ̃ʉ mʉgori peerore bairo ca-ʉ̃ʉ buju batewʉ.
2 Cʉ̃ wamopʉre papera pũuroacã pãrica pũuroacã ca-cʉgowĩ.
Jicã pũurona anibato quena ca-rupa tunua pũuro ca-ãmʉ ti pũuro.
To bairi cʉ̃na,
ángel ati yepapʉre ca-rui ejanʉcawĩ.
Rui ejanʉca yua,
cʉ̃ rʉpo cariape macá nʉgoa maca mar ca-pairi yapʉ ca-tʉjʉnucuwĩ.
Ape nʉgoa macá rʉpo maca ati yepapʉ ca-tʉjʉnucuwĩ.
3 To bairo tʉjʉnucuʉ yua,
cʉ̃ ca-wadarije tutuaro ca-wada batejowĩ.
Yai jũaʉ cʉ̃ ca-awajarije cõo ca-wada batejowĩ.
To bairo cʉ̃ ca-wadaro bʉpoa siete majuu cʉ̃ ca-yʉʉwã.
4 Tie na ca-wadarijere yʉ ca-uca tuugabapʉ.
To bairo tiere yʉ ca-uca tuugari paʉ majuu yua,
“Mʉ uca tuuquẽpa tiere,”
ʉmʉrecóo macacʉ cʉ̃ ca-ĩrijere yʉ ca-apiwʉ.
“Bʉpoa siete majuu na ca-ĩi wadarijere mʉ uca tuuquẽpa.
Tiere camajare na queti buiogaquẽemi Dio mai,”
cʉ̃ ca-ĩrijere yʉ ca-apiwʉ.
To bairo cʉ̃ ca-ĩiro yʉ ca-uca tuuquẽpʉ na ca-ĩi wadarijere.
5 To bairo uca tuuquẽcʉ yua,
yʉ ca-tʉjʉwʉ tunu ángel majocʉre mar ca-pairi yapʉ,
ati yepapʉ ca-tʉjʉnucuʉre.
Cʉ̃ wamo cariape macá nʉgoare ca-ñumʉgo tʉjʉnucuwĩ ʉmʉrecóopʉ.
6-7 To bairo ñu mʉgo tʉjʉnucuri oco bairo ca-ĩi wadawĩ:
—Mʉ,
Dio,
to bairona ca-anicõa aninucuʉ mʉ ãa.
Ati ʉmʉrecóore mʉ cá-ápʉ́.
Ati yepa quenare to bairona mʉ cá-ápʉ́.
Mar ca-pairi ya quenare to bairona mʉ cá-ápʉ́.
Nipetiropʉ ca-aniere mʉ cá-ápʉ́.
Ca-roti majii majuu mʉ ãa.
To bairo mʉ ca-ĩricarore bairo baigaro yucʉra.
Tirʉmʉpʉ macana mʉ ye quetire ca-buioricarã na mʉ ca-ĩricarore bairo baigaro yucʉra yua.
Ati ʉmʉrecóo petigaro.
Ape ʉmʉrecóo mʉ wajoagʉ tunu.
Yucʉra rʉjaquẽe.
Ángel putiricarore ca-puti tʉjaʉ cʉ̃ ca-putiro to cõona peticoagaro ati ʉmʉrecóo yua,
ca-ĩiwĩ ángel cʉ̃ wamore ca-ñumʉgo tʉjʉnucuʉ maca.
8 To bairo cʉ̃ ca-ĩiro bero yʉ ca-apiwʉ tunu.
Ʉmʉrecoo macacʉ yʉre cʉ̃ ca-ĩrijere yʉ ca-apiwʉ tunu:
—Aácʉja ángel tʉpʉ.
Mar ca-pairi yapʉ,
ti yepapʉ ca-tʉjʉnucuʉ tʉpʉ aácʉja.
Cʉ̃ tʉpʉ aá,
cʉ̃ wamopʉ cʉ̃ ca-cʉgori pũuro pãrica pũurore neija,
jõ buipʉ yʉ ca-ĩi joowĩ.
9 To bairo cʉ̃ ca-ĩiro yʉ cá-aápʉ ángel tʉpʉ.
“Ti pũuroacãre yʉ jooya,”
cʉ̃ yʉ ca-ĩiwʉ.
To bairo yʉ ca-ĩiro:
—Ʉ̃jʉ,
ne átiri ʉgaya,
ca-ĩiwĩ.
—To bairo ati pũurore mʉ ca-ʉgaro ipijitigaro.
Beroa ocore bairo ipijitigaro.
Mʉ rijero maca ipijitibato quena mʉ paropʉ piya eja jañagaro,
yʉ ca-ĩiwĩ ángel maca.
10 To bairo cʉ̃ ca-ĩiro cʉ̃ ca-cʉgori pũuroacãre neri yʉ ca-ʉgawʉ.
To bairo ʉga yua,
ángel cʉ̃ ca-ĩirore bairona yʉ ca-baiwʉ.
Yʉ rijeropʉ beroa ocore bairona ca-ipijitiwʉ.
Yʉ rijeropʉ ipijitibato quena yʉ paropʉ maca seeto ca-piya eja jañawʉ.
11 To bairo ti pũurore yʉ ca-ʉga yaparoro yʉ ca-ĩi queti buiowĩ:
—Ti yepa macana nipetirãre na mʉ ca-queti buioro yʉ boo.
To canacã maca macanare,
to canacã poa macana quenare na mʉ queti buiogʉ.
Na ʉparã quenare to bairona na mʉ queti buiogʉ.
Mʉ ca-tʉjʉrijere,
ati yepa macana nipetirã na ca-bai tʉjapere na mʉ queti buiogʉ.
To bairo mʉ ca-queti buioro yʉ boo,
yʉ ca-ĩiwĩ ángel maca.