9
1-2 To bairo cʉ̃ ca-ĩiro bero apeĩ ángel ca-putiwĩ tunu.
Bapari canacãʉ bero macacʉ majuu ca-putiwĩ tunu:
“Puuuu,”
ca-putiwĩ.
To cõona yua,
jicãʉ ʉmʉrecóopʉ ca-ãnacʉ ñocore bairo ca-bauʉ ca-ñaa roca cumu ejawĩ ati yepapʉ.
Ñaa roca cumu eja,
llavere ca-cʉgowĩ pãricarore,
Dio cʉ̃re cʉ̃ ca-jooricarore.
To mena ope ca-ʉ̃cʉari ope majuure ca-pãawĩ.
To bairo cʉ̃ ca-pãarona to cõona ti opepʉ pairo ca-bujeri butiwʉ.
Peero ca-pairi peerore bairo ca-bujecoapʉ.
To bairo bujeri ti ope macaje muipu ʉmʉreco macacʉre cʉ̃ ca-biawʉ bujeri bʉrʉa.
To bairi nipetiropʉ ca-naitĩacoapʉ tie bujeri jʉgori.
3 To bairi tie bujeri bʉrʉa watoapʉ ca-butiwã diroa.
Buti,
nipetiropʉ ca-wʉʉ bate peticoa aáma.
Camajare ca-toa majirã ca-ãma naa.
Cotapa cʉ̃ ca-toarore bairona ca-puniwã.
4 “Camaja na ye oteriquere mʉja ʉga rooye tuuquẽpa,”
na ca-ĩiwĩ na ʉpaʉ.
“Ta quenare,
yucʉ quenare,
nipetirije ati yepapʉ ca-putirije quenare mʉja ʉga rooye tuuquẽpa,”
na ca-ĩiwĩ.
“Camaja jetore na ca-wijioro na ája.
Camaja nipetirã Dio ya wame uca tuurica yeje mena na riya pãiropʉre ca-ñiga peoya mana jetore na ca-wijioro na ája,”
na ca-ĩiwĩ na ʉpaʉ.
5 “Na jĩaquẽja paro.
Popiye na ca-tamuoparore bairo jeto na mʉja átigarã,”
na ca-ĩiwĩ.
“Jicã wamo canacãʉ muipua to bairona na ája,”
na ca-ĩiwĩ.
To bairo na cʉ̃ ca-ĩi yaparoro yua,
camajare na ca-toa teñawã.
To bairo na ca-toaro cotapa cʉ̃ ca-toarore bairona ca-wijiowã camaja,
seeto.
6 Ti yʉtea ca-ano camaja maca na ca-ria yajicoapere seeto boobagarãma.
To bairo boobana quena ria yaji majiquetigarãma yua.
7 To bairi naa diroa maca caballoare bairo ca-bauwã.
Caballoa camaja ca-amequẽrãre ca-umarãre bairo ca-bauwã diroa,
come ajeri ca-jañarã aniri.
To bairi na rʉpoari buire ca-pejawã ca-rupa betori uniere.
Ʉparã na ca-pejari betori,
ca-ajiyari betori uniere bairo ca-baurijere ca-pejawã na rʉpoaripʉre.
Camaja riyarire bairo ca-riyaricʉma.
8 Cãromia poa ñapore bairo ca-poacʉma tunu.
Yai jũarã opire bairo ca-opicʉma.
9 Na cotiare come ajerire bairije jia turicarã ca-ãma.
To bairi ca-wʉʉcoanucuwã.
To bairo na ca-wʉʉ aánucuro seeto ca-bʉjʉwʉ na ca-wʉʉrije.
Camaja amequẽgarã caballoa bui capaarã na ca-atʉ aátore bairo ca-bʉjʉwʉ na ca-wʉʉrije.
Caballoa uwamarã na ca-tʉ̃garica coorire na ca-atʉ tʉ̃ga puarore bairona ca-bʉjʉwʉ diroa na ca-wʉʉrije maca.
10 Na picõrori cotapa picõrore bairo ca-picõrori cʉma.
To bairi camajare na ca-toa majiwã.
Na ʉpaʉ cʉ̃ ca-tutuarije jʉgori ca-toa majiwã camajare.
Jicã wamo canacãʉ muipua majuu to bairona ca-toa teñarã ca-anicõawã yua.
11 Na ʉpaʉ ca-ãmi Sataná yere cá-ácʉ majuu.
Cʉ̃ maca ca-ʉ̃cʉari ope macacʉ ca-anibatacʉ ca-ãmi.
Hebreo ye mena Abadón ca-wamecʉmi.
Griego ye mena Apolión ca-wamecʉmi.
“Cá-áti ree majuucõaʉ” ĩigaro ĩi cʉ̃ wame.
12 To bairo diroa camajare na na cá-áti toa teñaro bero to cõona petigaro ati yepa macana popiye na ca-tamuope ca-ani jʉgori wame.
To bairo tie ca-petibato quena pʉga wame rʉja camaja popiye na ca-tamuope tunu.
13 To bairo bai,
ángel apeĩ ca-putiwĩ tunu.
Jicã wamo canacãʉ bero macacʉ cʉ̃ putiricarore ca-putiwĩ.
“Puuuu,”
ca-putiwĩ.
Cʉ̃ ca-putiro apeĩ cʉ̃ ca-wadaro yʉ ca-apiwʉ.
Diore áti nʉcʉbʉgorã caroa ca-jʉti ñuurijere camaja na ca-joe buje mʉgori cajawo,
ca-ajiyari cajawopʉ cʉ̃ ca-wadarije ca-báuwʉ.
Dio cʉ̃ ca-ruiro riape macá cajawopʉ majuu cʉ̃ ca-wadarije ca-báuwʉ.
14 To bairo ti cajawopʉ apeĩ cʉ̃ ca-queti buioro yʉ ca-apiwʉ.
Ángel ca-putiricʉre cʉ̃re cʉ̃ ca-queti buioro yʉ ca-apiwʉ:
—Oco bairo mʉ ápa,
cʉ̃ ca-ĩi wadarijere yʉ ca-apiwʉ ti cajawopʉ ca-ĩi wadaʉre.
—Ti ya,
ca-pairi ya,
Eufrates ca-wamecʉti yapʉ aácʉja.
Topʉ aácʉ yua,
mʉ bʉgagʉ ángel majare,
aperã na ca-jiaricarã bapari canacãʉ majuure.
Na popioya,
cʉ̃ ca-ĩi wadawĩ ti cajawopʉ ca-ĩi wadaʉ ángel ca-putiricʉre.
15 To bairo cʉ̃ ca-ĩiro yua,
ángel maca to bairona cá-ámí.
Eufrates ca-wamecʉti yapʉ aperã na ca-jiaricarãre bapari canacãʉ majuure na ca-popiowĩ.
To bairo cʉ̃ cá-áto ca-atʉcoa aáma.
Camajare na jĩagarã ca-atʉcoa aáma.
Camajare na ca-jĩapa paʉ majuure nare yuu rotii mai nare ca-jia cũu rotiyupʉ Dio.
To bairi ti paʉ majuu,
ti cʉma,
ti rʉmʉ,
ti paʉ majuu ca-yuuricarãre na ca-popiowĩ.
To bairo na cʉ̃ ca-popioro camajare jĩagarã ca-atʉ aáma.
To bairi camajare na ca-jĩa reecõawã ati yepa macana capaarãre la tercera parte majuu tunu.
16 To bairi uwamarã capaarã majuu nare yʉ ca-tʉjʉwʉ.
“Doscientos millones majuu uwamarã ãma aperã mena ca-amequẽparã,
caballoa bui ca-peja aána,”
na ca-ĩrijere yʉ ca-queti apijowʉ yua.
17-18 To bairi caballoa bui ca-pejarã na cotiaripʉre come ajeri ca-jũarijere jañawã jicãarã.
Aperã ca-jʉmerijere ca-jañawã.
Aperã ca-jʉririjere ca-jañawã.
Na caballoa maca yai jũaʉ rʉpoare bairo ca-rʉpoari cʉma.
Na rijeroripʉ bujeri ca-butiwʉ seeto.
Peero mena,
asufre ca-wamecʉtie roorije ca-jʉtirije mena ajuyaro ca-buje butiwʉ.
To bairo ca-bairã aniri capaarã camajare na ca-jĩa reecõawã.
Caballoa na rijerori macaje mena na ca-jĩa reecõawã.
19 To bairi na rijerori macaje ca-uwiobʉjawʉ.
Na picõrori quena seeto ca-uwiobʉjawʉ.
Aña rʉpoarire bairo ca-bauwʉ na picõrori.
Tie mena camajare na cá-áti rooye tuuwã yua.
20 To bairo camajare rooro na cá-átibato quena camaja ca-rʉjarã maca ca-tʉgooñaquẽma.
“Caroorije mani átibapa.
Caroorije jã cá-átiere majiriobojaya,”
ca-ĩi jeniquẽma Diore.
Caroorije na cá-átiere ca-tʉgooñarique paiquẽma.
To bairo caroorije na cá-átore bairona rooro majuu cá-áticõa aninucuwã.
Wãtiarena ca-jeninucuwã.
Na ca-weericarã quenare na ca-jeninucuwã.
Oro ca-wamecʉtie,
plata ca-wamecʉtie,
bronce ca-wamecʉtie ca-ajiyarije mena na majuuna na ca-weericarã maca,
ʉ̃ta mena,
yucʉ mena na ca-weericarã unare ca-jeninucuwã.
Na ca-weericarã maca ca-tʉjʉ majiquẽma.
Ca-api majiquẽma.
cá-aáteña majiquẽma.
To bairona cá-áti majiquẽna na ca-anibato quena na ca-jeninucuwã,
Diore jeniquẽnana.
21 To bairona camaja na ca-ame jĩarijere ca-janagaquẽma.
Cumu ãnaje na cá-áti anie quenare ca-janagaquẽma.
Rooro na cá-áti eperije cʉtie quenare ca-janagaquẽma.
Aperã yere na ca-jee rutirije quenare ca-janagaquẽma.
To bairo jeto cá-áticõa aniganucuwã.
Na maca,
“Caroorije jã átibapa.
Caroorije jã cá-átie jã majiriobojaya,”
ca-ĩi jeniquẽma Diore.
Caroorije na cá-átiere ca-tʉgooñarique paiquẽma camaja ca-rʉjarã yua.