El séptimo sello y el incensario de oro
8
Cabero tunu Cordero ca-wamecʉcʉ Dio Macʉ ca-tʉ̃ga woo newĩ tunu.
Ti pũuro tunuarica pũuro na ca-jʉgoo turique seis canacã paʉ bero beroa cosi unie mena na ca-jʉgoo turica paʉre ca-tʉ̃ga woo newĩ tunu.
Ca-ani tʉjari paʉ majuure ca-tʉ̃ga woo newĩ.
To bairo cʉ̃ ca-tʉ̃ga woo nero yua,
to ʉmʉrecóopʉ ca-bʉjʉbataje ca-janacoapʉ.
Cawadabatana quena ca-janacoama.
Jicã hora recomaca majuu ca-wadaquẽma.
2 To bairi jicã hora recomaca bero to cõona yʉ ca-tʉjʉwʉ tunu.
Siete majuu ángel maja Dio riape ca-tʉjʉnucurãre na yʉ ca-tʉjʉwʉ.
To bairo nare yʉ ca-tʉjʉro na ca-ano canacãʉpʉrena putiriquere na ca-joowĩ Dio na ca-putipere.
3 To bairo nare cʉ̃ ca-jooro bero ángel apeĩ ca-ejawĩ tunu.
Eja,
Diore na cá-áti nʉcʉbʉgori cajawo,
caroa ca-jʉti ñuurijere na ca-joe buje mʉgori cajawo riape ejanʉca,
topʉ ca-tʉjʉnucuwĩ.
Ca-ajiyari bapa,
caroaro jʉti ñuurijere cʉ̃ ca-jooepa bapare ca-newĩ.
Ti bapare ne yua,
pairo ca-jʉti ñuurijere ca-cʉgowĩ aperã cʉ̃ na ca-jooriquere ti bapapʉ cʉ̃ ca-jooepere.
4 To bairi Diore ca-apiʉjarã ati yepa macana Diore na ca-jenitoye cʉ̃ maca tiere ca-joenucuwĩ.
To bairo cʉ̃ ca-joero caroaro ca-jʉti ñuuwʉ ti cajawopʉre,
ca-ajiyarije oro majuu mena na cá-áta cajawopʉre.
Dio cʉ̃ ca-ruiro riape macá cajawo ca-ajiyari cajawopʉre caroaro ca-jʉti ñuuwʉ.
To bairi Diore ca-apiʉjarã Diore na ca-jenirije Dio tʉpʉ ca-ejaro cʉ̃ ca-joe buje mʉgorije quena ca-ejawʉ.
To bairi ángel caroaro cʉ̃ cá-áto Dio maca ca-apiwĩ cʉ̃re ca-apiʉjarã na ca-jenirijere yua.
5 Cabero cʉ̃na ángel ti bapapʉre ca-jãawĩ tunu peero niti ca-ajiyarijere.
Ti cajawo bui peero macaje niti jeeri ti bapapʉre ca-jee jã jiroocõawĩ.
Jee jã jiroo yaparo ti bapare ca-rocacõa joowĩ yepapʉre yua.
To bairo cʉ̃ cá-áto bʉpo seeto majuu ca-pawĩ.
To bairona apeye unie quena seeto ca-bʉjʉwʉ.
Bʉpo cʉ̃ ca-yaberije quena ca-yabewʉ seeto.
Ati yepa quena ca-wãrewʉ seeto majuu yua.
Las trompetas
6 To bairo bai,
ángel maja putiriquere ca-cʉgorã maca ca-cʉgo peti tʉgawã,
putigarã yua.
7 To bairo na ca-bairo jicãʉ na mena macacʉ ca-putiwĩ:
“Puuuu,”
ca-putiwĩ.
To cõona yua,
ca-joorije oco weta rupaacã ca-wẽewʉ ati yepapʉ.
Ca-ʉ̃rije quena ca-wẽewʉ.
Rií mena ajuyaro ca-wẽewʉ ca-ʉ̃rije.
To bairo wẽe yua,
ati yepa pairo ca-ʉ̃ʉ yajicoapʉ.
Ati yepa la tercera parte majuu,
itia paʉ ca-anibata paʉ jicã paʉ ca-ʉ̃ʉ yajicoapʉ.
Macanʉcʉ macaje,
yucʉ quena to bairona ca-ʉ̃ʉ yajicoapʉ.
Ta ca-jʉmerije quena ca-ʉ̃ʉ yajicoapʉ tie quena yua.
8 Cabero tunu ángel apeĩ ca-putiwĩ tunu,
cʉ̃ bero macacʉ.
“Puuuu,”
ca-putiwĩ.
To cõona yua,
ʉ̃taʉ ca-pairicʉ majuure bairo ca-ʉ̃ricʉ ca-ñawʉ.
Mar ca-pairi yapʉre ca-ñaa roca pacoapʉ,
ʉ̃taʉre bairo ca-ʉ̃ricʉ.
9 Ca-pairi yapʉre to ca-ñaa roca paro yua,
ti ya rií majuu ca-jeeñacoapʉ jicã paʉ.
Pairo,
la tercera parte majuu ca-jeeñacoapʉ rií.
Itia paʉ ca-anibata paʉ jicã paʉ ca-jũacoapʉ rií jeeñato oco ca-anibataje.
To bairo ca-bairije jʉgori wai capaarã majuu ca-yajicoama,
la tercera parte majuu.
Cumuu capaca cumuu quena capee ca-rua yajicoapʉ la tercera parte macaje yua.
10 Cabero tunu ángel apeĩ ca-putiwĩ.
Pʉgarã bero macacʉ majuu ca-putiwĩ:
“Puuuu,”
ca-putiwĩ.
To cõona ñoco capaii majuu ca-ñaa amí.
Ʉmʉrecoopʉ ca-ãnacʉ ca-ñaa amí ati yepapʉre.
Ñaa atí yua,
ca-ʉ̃ʉwĩ.
Ʉpe tutu jĩa peo bujuricarore bairo pairo ca-ʉ̃ʉwĩ.
To bairi capee yaripʉre ca-ejawʉ cʉ̃ ca-ʉ̃rije.
Capee paʉri oco ca-butiri operipʉ quenare ca-ejawʉ.
La tercera partepʉ majuu ca-ejawʉ.
Itia paʉ ca-anibata paʉ jicã paʉpʉ ca-ejawʉ ca-ʉ̃rije.
11 Cʉ̃ ñoco ca-ñaa atácʉ maca wamecʉmi “Ajenjo.”
To bairi ria ca-pairi yapʉre cʉ̃ ca-ñaa ejaro oco maca ricati baurije ca-jeeñacoapʉ.
Caroa oco ca-anibataje ca-piyarije ca-jeeñacoapʉ.
Cabero camaja maca tiere etibana ca-riacoama yua.
12 Cabero tunu ángel apeĩ ca-putiwĩ.
Itiarã bero macacʉ majuu ca-putiwĩ:
“Puuuu.”
To cõo yua,
muipu ʉmʉreco macacʉ ca-rooye tuawĩ.
Caroaro ca-aji batequẽmi jicã paʉ la tercera parte majuu.
Muipu ñami macacʉ quena caroaro ca-buju batequẽmi.
Ñocoa quena to bairona capaarã ca-ajiya ejooquẽma la tercera partepʉre.
To bairo bairã yua,
ati yepapʉre caroaro ca-buju majiquẽma.
To bairi ʉmʉrecopʉre bapari canacã hora majuu muipu ca-bujuquẽmi.
Ñami quenare bapari canacã hora ñocoa ca-bujurã ca-mama.
13 To bairi yʉ ca-tʉjʉwʉ tunu aáre.
Jõ buipʉ ca-wʉʉ aámi.
Wʉ aá,
oco bairo ca-ĩi awajawĩ:
—¡Ayu!
¡Ayu!
¡Ayu!
ca-ĩi awajawĩ.
—Bopacooro majuu baicõama ti yepa macana.
Popiye majuu tamuogarãma.
Petoacã rʉja mai.
Ángel maja ca-ani tʉjarã itiarã majuu yucʉacãre putigarãma.
To bairi popiye majuu tamuogarãma na ca-putiro ti yepapʉ ca-ãna yua,
ca-ĩiwĩ aá.