Los señalados de las tribus de Israel
7
Cabero yʉ ca-tʉjʉwʉ tunu ángel majare bapari canacãʉ majuu.
Nipetiropʉ wino ca-papurijere ca-roti majirã ca-ãma.
Ati yepa to canacã nʉgoapʉrena ca-tʉjʉnucuwã.
Jicãʉ ca-ãmi muipu cariape cʉ̃ ca-wamʉ atínucuri paʉpʉ.
Apeĩ ca-ãmi ca-waruu macapʉre.
Apeĩ ca-ãmi ape nʉgoa waruu tʉ macapʉre.
Apeĩ ca-ãmi muipu cʉ̃ ca-roca jã aáti jopecʉti nʉgoapʉre.
To bairo bapari canacã paʉri ãnaa winore nipetiropʉ ca-papu rotiquẽma.
Ati yepa buire,
mar ca-pairi ya buire,
macanʉcʉ bui quenare nipetiropʉ winore ca-papu rotiquẽma.
To bairo na ca-rotiquẽtore bairona ca-papuquẽpʉ nipetiropʉ yua.
2 To bairo yʉ ca-tʉjʉwʉ tunu Dio tʉ macacʉ ángel apeĩre.
Muipu cariape cʉ̃ ca-wamʉ atínucuri paʉpʉ cá-acʉ́re cʉ̃ yʉ ca-tʉjʉwʉ.
Cʉ̃ maca mani Pacʉ Dio ya wame uca tuurica yejere ca-neamí.
Dio ca-anicõa aninucuʉ majuu cʉ̃ wame uca tuurica yejere ca-neamí,
sello na ca-ĩri yejere.
To bairo ti yejere neatí yua,
aperãre na ca-ĩi pijowĩ.
Ángel majare,
aperã cuatro majuure awajari na ca-ĩi pijowĩ.
Nipetiropʉ wino ca-papurijere ca-roti majirã,
ati yepa nipetiropʉre,
mar ca-pairi ya quenare ca-rooye tuu majirãre awajari na ca-ĩi pijowĩ.
Oco bairo ca-ĩiwĩ:
3 —Aáquẽja mai.
Yuuya mai,
na ca-ĩiwĩ.
—Ti yepare mʉja rooye tuuquẽpa mai.
Mar ca-pairi ya quenare,
macanʉcʉ quenare mʉja rooye tuuquẽpa mai,
na ca-ĩiwĩ.
—Dio yarã,
cʉ̃ ca-boorije cá-ánare uca tuurica yeje mena cʉ̃ wamere mani ñiga peorã mai.
Na riya pãiropʉ mani Ʉpaʉ Dio ya wamere mani ñiga peorã mai,
na ca-ĩiwĩ ángel cʉ̃ mena macanare,
bapari canacãʉ ca-ãnare.
4 To bairo cʉ̃ ca-ĩiro,
“Jaʉ,”
ĩirã to bairona cá-ámá.
Dio yarã cʉ̃ wamere na ca-ñiga peowã to canacãʉpʉrena.
To bairi Israel maja poari nipetiro doce poari mena macana,
ciento cuarenta y cuatro mil majuu camaja ca-ãma Dio ya wamere uca tuurica yeje mena na ca-ñiga peoricarã.
To bairona yʉ ca-apiwʉ.
5-8 Doce mil Judá ca-wamecʉti poa macanare na ca-ñiga peowã Dio ya wamere.
To bairona tunu doce mil Rubén ca-wamecʉti poa macanare,
tunu doce mil Gad ca-wamecʉti poa macanare,
tunu doce mil Aser ca-wamecʉti poa macanare,
tunu doce mil Neptalí ca-wamecʉti poa macanare,
tunu doce mil Manasé ca-wamecʉti poa macanare,
tunu doce mil Simeón ca-wamecʉti poa macanare,
tunu doce mil Leví ca-wamecʉti poa macanare,
tunu doce mil Isacar ca-wamecʉti poa macanare,
tunu doce mil Sabulón ca-wamecʉti poa macanare,
tunu doce mil José ca-wamecʉti poa macanare,
tunu doce mil Benjamín ca-wamecʉti poa macanare Dio ya wamere uca tuurica yeje mena na ca-ñiga peowã.
To bairi nipetirã ciento cuarenta y cuatro mil majuu camajare na ca-ñiga peowã Dio ya wamere na riya pãiropʉre yua.
La multitud vestida de blanco
9 Cabero yʉ ca-tʉjʉwʉ tunu camaja capaarãre.
Topʉna Dio ca-roti maji majuʉ cʉ̃ ca-ruiro riape ca-tʉjʉnucuwã.
Ati yepa to canacã poa macana jicãarã topʉna ca-ãma.
To bairona cʉ̃ Macʉ Cordero ca-wamecʉcʉ cʉ̃ ca-tʉjʉ jooro riapere ca-tʉjʉnucuwã.
Capaarã majuu ca-ãma.
Dope bairo cá-áti cõoña peo majiña mamʉ.
Jutii cabotirije ca-yoari wʉrire ca-jañawã na quena.
Bo ño queri ca-jeewã.
10 To bairi na paarãacã maca oco bairo awajari ca-ĩi wariñuu bajawã Diore:
Mani Ʉpaʉ Dio ruiricaropʉ ca-ruii cʉ̃ ca-majirije jʉgori mani ca-yajibopere manire ca-netoobojawĩ.
Cordero quena to bairona cʉ̃ ca-majirije jʉgori manire ca-netoobojawĩ.
Popiye caroorã mena mani ca-tamuobopere mani ca-netoobojawĩ,
ca-ĩi wariñuu bajawã to macana jutii cabotirije ca-yoari wʉrire ca-jañarã maca.
11 Ángel maja nipetirã ca-tʉjʉnucuwã Dio ca-roti maji majuʉ cʉ̃ ca-ruiro tʉpʉna.
To bairona veinticuatro majuu cabʉcʉrã ca-rotirã tʉpʉre ca-tʉjʉnucuwã.
Ricati ca-baurã bapari canacãʉ ca-ãna tʉpʉ quenare ca-tʉjʉnucuwã ángel maja nipetirã.
Ca-tʉjʉnucu amojorewã ca-rupa beto na tʉpʉre.
To bairi to macana cabotirije ca-yoari wʉrire ca-jañarã Diore na ca-ĩi wariñuu bajarijere ca-apiwã ángel maja nipetirã.
To bairo apirã Dio cʉ̃ ca-ruiro tʉpʉna ca-ejacumu mubiawã,
Diore áti nʉcʉbʉgorã.
12 To bairo cʉ̃ áti nʉcʉbʉgori na quena cʉ̃re ca-ĩi wariñuu baja jʉgowã:
To bairona ñuu majuucõami mani Ʉpaʉ Dio.
To bairi camaja nipetirã cʉ̃re na ĩi wariñuu bajaato.
“Mʉ jeto ca-ñuu majuʉ mʉ ãa,”
cʉ̃re na ĩato.
Nipetirijere ca-majii ãmi.
To bairi camaja nipetirã,
“Caroaro jãare mʉ átibojanucu,”
cʉ̃re na ĩato.
Camaja nipetirã cʉ̃re na nʉcʉbʉgoato.
Dio nipetirã netoro ca-roti majii ãmi.
Ca-tutuaʉ majuu ãmi.
To bairona anicõa aninucugʉmi mani Ʉpaʉ to canacã rʉmʉ,
ca-ĩi wariñuu bajawã ángel maja nipetirã yua.
13 To bairo na ca-ĩi wariñuu bajaro oco bairo yʉ ca-ĩi jeniñawĩ cabʉcʉrã ca-rotirã mena macacʉ jicãʉ:
—¿Noa na ãtí i maja,
jutii cabotirije ca-yoari wʉrire ca-jañarã?
¿Noopʉ cá-atána na ãtí?
yʉ ca-ĩi jeniñawĩ cabʉcʉ ca-roti majii.
14 To bairo cʉ̃ ca-ĩiro:
—Yʉ yaʉ,
yʉ majiquẽe.
Mʉ maca mʉ majii,
cʉ̃ yʉ ca-ĩiwʉ.
To bairo cʉ̃ yʉ ca-ĩiro,
yʉ ca-queti buiowĩ:
—Na ãma mʉ ca-ani yepapʉ ca-bai yajiricarã na ãnana ca-yeri catírã.
Ti yepapʉ ãnaa rooro majuu ca-tamuowã.
Camaja popiye majuu na ca-tamuori rʉmʉri ca-anopʉre popiye majuu ca-tamuowã na quena.
To bairo baibana quena caroorijere ca-apiʉjaquẽma.
Dio Macʉ Corderore cʉ̃ cá-áti nʉcʉbʉgo janaquẽma.
Cʉ̃ ca-ĩrijere cariape ca-tʉgooñacõa aninucuwã.
“Mʉjaare yʉ ca-rií peti yajibojarique jʉgori mʉjaare yʉ netoogʉ,”
cʉ̃ ca-ĩrijere cariape ca-apiʉjacõa aninucuwã.
To bairo tiere cariape apiʉjarã yua,
ca-jĩa ree ecooricarã aniri ato ʉmʉrecóopʉ ejama.
Eja,
caroorije na cá-átajere yʉ ca-coje reebojarique iñoorã jutii cabotirijere jañama,
yʉ ca-ĩi queti buiowĩ cabʉcʉ ca-rotii.
15 —To bairi yucʉra Dio ca-roti majii majuu cʉ̃ ca-ruiro riape tʉjʉnucuma.
Diore áti nʉcʉbʉgorã áama.
Ʉmʉreco quenare,
ñami quenare to canacã rʉmʉ to bairona cʉ̃ áti nʉcʉbʉgonucuma.
Dio ya wiipʉre sacerdote maja na cá-átore bairona cʉ̃ áti nʉcʉbʉgonucuma,
Dio cʉ̃ ca-boorijere átiri.
To bairo na cá-áto Dio maca caroaro na cotemi.
To canacã rʉmʉ na mena anicõa aninucugʉmi yua.
16 To bairo nare cʉ̃ cá-átibojaro di rʉmʉ uno majuu ñigo riaquetigarãma.
To bairo quena ñeme jipiquetigarãma.
Ape wame quena,
muipu seeto cʉ̃ ca-ajiro popiye tamuoquetigarãma.
Caroaro majuu jeto anicõa anigarãma Dio tʉpʉre yua.
17 Cordero maca Dio ca-roti majii majuu cʉ̃ ca-ruiro riape ca-tʉjʉnucuʉ maca na tʉjʉ cotegʉmi.
Oveja na ca-ĩirã nuuricarã ʉpaʉ caroaro nare cʉ̃ ca-tʉjʉ coterore bairona caroaro na tʉjʉ ʉja cotegʉmi.
Oveja ʉpaʉ cʉ̃ yarãre oco ca-butiri ope tʉpʉ na tĩagʉ nare cʉ̃ ca-jʉgo aátore bairona caroaro na jʉgo aágʉmi Cordero,
Dio Macʉ.
To bairo na átibojari ñe uniere na ca-boorije cõona na joogʉmi Cordero cʉ̃ yarãre.
To bairi Dio maca,
“Yʉ punaa,
otiquẽja,”
caroaro na ĩigʉmi.
Caroaro na ĩi,
na cape ocore na coje reegʉmi,
na ĩi ocabʉtioʉ.
To bairi caroaro wariñuu anicõa anigarãma i maja cabotirijere ca-jañarã yua,
yʉ ca-ĩi queti buiowĩ cabʉcʉ ca-rotii.