—Tʉjʉ atíñañaja,

ca-ĩiwĩ.

2 To bairo cʉ̃ ca-ĩiro yʉ ca-tʉjʉwʉ tunu caballo ca-botiire.

Caballo bui ca-pejaʉ quenare cʉ̃ yʉ ca-tʉjʉwʉ.

Cʉ̃ maca temu betore ca-newĩ.

Ʉparã na ca-pejari beto uno ca-ajiyari betore ca-pejawĩ aperã cʉ̃re na ca-joorica beto.

To bairi caballo bui ca-peja aámi.

Cʉ̃ wapanare ca-quẽ netoʉ aácoami.

To bairo átii aácʉ nare ca-quẽ neto aánucuwĩ.

3 Cabero tunu Cordero ca-wamecʉcʉ ca-tʉ̃ga woo newĩ tunu.

Ti pũuro tunuarica pũurore na ca-jʉgoo turiquere cabero macá paʉre beroa cosi unie mena na ca-jʉgoo turica paʉre ca-tʉ̃ga woo newĩ tunu.

To bairo cʉ̃ cá-áto bero yua,

yʉ ca-apiwʉ wadarique tunu.

Ricati ca-baurã mena macacʉ apeĩ tunu cʉ̃ ca-wadarijere yʉ ca-apiwʉ.

—Tʉjʉ atíñañaja,

yʉ ca-ĩi wadawĩ.

4 To bairo cʉ̃ ca-ĩiro yʉ ca-tʉjʉwʉ tunu caballo apeĩ,

ca-jũaʉre.

Caballo bui ca-pejaʉ quenare cʉ̃ yʉ ca-tʉjʉwʉ.

To bairo yʉ ca-tʉjʉro yua,

apeĩ to macacʉ maca cʉ̃ ca-queti buiowĩ caballo bui ca-pejaʉre.

Oco bairo cʉ̃ ca-ĩiwĩ:

—Ti yepa macana caroaro na ca-ame jʉgo áti ani wariñuubatiere na áti rooye tuuya.

Na patowãcooña,

caroaro na ca-ani majiquetiparore bairo.

Na ca-amequẽro,

na ca-ame jĩaro na ája,

cʉ̃ ca-ĩiwĩ caballo bui ca-pejaʉre.

To bairo cʉ̃ ĩi yaparo cʉ̃ ca-joowĩ jarerica pãi ca-yoari pãire yua.

5 Cabero tunu Cordero ca-wamecʉcʉ ca-tʉ̃ga woo newĩ tunu.

Ti pũuro tunuarica pũurore pʉga paʉ bero na ca-jʉgoo turica paʉre ca-tʉ̃ga woo newĩ tunu.

To bairo cʉ̃ ca-tʉ̃ga woo nero bero yua,

yʉ ca-apiwʉ apeĩ cʉ̃ ca-wadarijere tunu.

Ricati ca-baurã mena macacʉ apeĩ tunu cʉ̃ ca-ĩrijere yʉ ca-apiwʉ.

—Tʉjʉ atíñañaja,

yʉ ca-ĩiwĩ cʉ̃ quena.

To bairo cʉ̃ ca-ĩiro caballo apeĩre cʉ̃ yʉ ca-tʉjʉwʉ tunu,

ca-ñiire.

Ca-ñii bui ca-pejaʉ quenare cʉ̃ yʉ ca-tʉjʉwʉ.

Cʉ̃ maca apeye uniere nʉcʉo cõoñaricarore ca-newĩ cʉ̃a balansa ca-wame cʉtirore.

6 To bairo cʉ̃re tʉjʉ,

yʉ ca-apiwʉ tunu,

ricati ca-baurã watoapʉ apeĩ cʉ̃ ca-wadarijere:

—Trigo,

pan na cá-átipe jicã kiloacã majuu pairo wapacʉ.

Jicãʉ jicã rʉmʉ cʉ̃ ca-paa wapataricaro cõo wapacʉ,

ca-ĩi wadawĩ.

—Cebada na ca-ĩrije quena itia kiloacã majuu to cõona wapacʉ tie quena,

apeye pan na cá-átipe quena.

To bairo camaja na ca-boorije majuu capee to ca-manibato quena ʉje ãa bairo pʉa na ca-aju ʉgape.

Ʉje wẽeri rica oco ca-etipe quena ãa bairo pʉa.

To bairo cʉ̃ ca-ĩi wadarijere yʉ ca-apiwʉ.

7 Tiere api yua,

yʉ ca-tʉjʉwʉ tunu Cordero ca-wamecʉcʉre.

Ti pũuro tunuarica pũuro na ca-jʉgoo turique itia paʉ bero na ca-jʉgoo turica paʉre ca-tʉ̃ga woo newĩ tunu.

To bairo cʉ̃ cá-áto bero yua,

yʉ ca-apiwʉ apeĩ cʉ̃ ca-wadarijere tunu.

Ricati ca-baurã mena macacʉ ca-ani tʉjaʉ cʉ̃ ca-ĩrijere yʉ ca-apiwʉ.

—¡Tʉjʉ atíñañaja!

yʉ ca-ĩiwĩ.

8 To bairo cʉ̃ ca-ĩiro yʉ ca-tʉjʉwʉ apeĩ caballore tunu,

ca-jʉriire.

Ca-jʉrii bui ca-pejaʉ quenare cʉ̃ yʉ ca-tʉjʉwʉ.

Oco bairo ca-wamecʉmi:

BAI ROCARIQUE ca-wamecʉmi.

Cʉ̃ bero ca-ʉja aámi apeĩ.

CA-BAI YAJIRICARÃ NA CA-ANOPɄ ca-wamecʉcʉ cʉ̃ bero ca-ʉja aámi.

Na maca camaja jicãarãre ca-jĩa majirã ca-ãma.

Camaja bapari canacãʉ ca-ãnare jicãʉ jetore na ca-jĩa ree rʉgo majirã cá-ámá.

To bairo jeto to canacãʉpʉrena na ca-jĩa reecõawã ati yepa nipetiropʉ.

To bairo átiri camaja na ca-ame jĩaro cá-ámá.

To bairi camaja jicãarã jarerica pãiri mena ca-jĩa ecoowã.

Aperã ñigo mena ca-riacoama na quena.

Aperã quena riaye jʉgori ca-riacoama na quena.

Aperã camaja yaia macanʉcʉ macana nare na ca-jĩa ʉgaro ca-bai yajicoama na quena.

Caballo bui ca-pejaʉ,

cʉ̃ bero ca-ʉja aácʉ na ca-jĩa majirije jʉgori to bairona ca-bai yajicoama yua.

9 Cabero yʉ ca-tʉjʉwʉ tunu Cordero ca-wamecʉcʉre.

Ti pũuro tunuarica pũuro na ca-jʉgoo turique bapari canacã paʉ bero na ca-jʉgoo turica paʉre ca-tʉ̃ga woo newĩ tunu.

To bairo cʉ̃ ca-tʉ̃ga woo nero yua,

camaja ca-bai yajiricarã na ãnana yeri ca-catírãre na yʉ ca-tʉjʉwʉ.

Cajawo ẽoro nare yʉ ca-tʉjʉwʉ,

camaja waibʉcʉrãre joe buje mʉgori Diore cʉ̃ na ca-jeni nʉcʉbʉgori cajawo ẽoro.

Aperã na ca-jĩa reericarã ca-ãma.

Ati yepapʉ na ca-ano mai camaja maca nare ca-booquẽma.

Dio yere na ca-queti buiorije wapa nare ca-booquẽma.

To bairi Dio yere na ca-apiʉjagarije wapa na ca-jĩa reecõawã,

“Dio yere apiʉjaqueticõaña,”

ĩibana.

To bairi na ãnana yeri ca-catírã aniri ti cajawo ẽoro ca-ãma.

10 To bairo topʉ ãnaa Diore cʉ̃ ca-jeniñawã.

Naa capaarã ca-ãna jicãro mena awajabʉjari ca-ĩi jeniñawã Diore:

—Jã Ʉpaʉ,

ca-ñuu majuʉ mʉ ãa.

Cariape ca-queti buioʉ mʉ ãa.

Nipetirijere mʉ áti maji.

To bairi jãare ca-jĩaricarãre na tʉjʉ majiri na popiyeyeya.

¿Noo cõo to rʉjatí nare mʉ ca-popiyeyeparo jʉgoye?

Rooro na cá-átiere tʉjʉ majiri yoaro mee na popiyeyeya,

ca-ĩiwã to ca-ãna Diore yua.

11 To bairo na ca-ĩiro bero jutiire na ca-joowĩ Dio.

Jutii cabotirije ca-yoari wʉri na ca-jañapere na ca-joowĩ.

To bairo na joo yua,

oco bairo na ca-ĩiwĩ:

—Rʉja mai,

na ca-ĩiwĩ Dio.

—Mʉjaare bairo ca-ãna ãma mai ti yepapʉ.

Yʉ yere queti buio teñarã áama mai yepa macanare.

Nare ca-apigaquẽna maca na jĩa reegarãma na quenare,

yʉ ye quetire na ca-queti buio teñarije wapa.

To bairi naa nipetirã na ca-bai yaji petiro to cõona mʉjaare ca-jĩaricarãre na yʉ popiyeyegʉ yua.

To bairi caroaro yuuya mʉjaa mai,

na ca-ĩiwĩ Dio ti cajawo ẽoro ca-ãnare.

12 Cabero tunu Cordero ca-wamecʉcʉ ca-tʉ̃ga woo newĩ tunu.

Ti pũuro tunuarica pũuro na ca-jʉgoo turique jicã wamo cõo canacã paʉ bero na ca-jʉgoo turica paʉre ca-tʉ̃ga woo newĩ tunu.

To bairo ti paʉre cʉ̃ ca-tʉ̃ga woo nero yʉ ca-tʉjʉwʉ tunu ca-yepa wãrero.

Seeto majuu ca-nacuawʉ ati yepa.

To bairi muipu ʉmʉreco macacʉ ca-ñiicoami.

Ca-naitĩacoapʉ yua.

Jutiiro ca-ñiiri ajerore bairo ca-ñiicoami muipu.

To bairi muipu ñami macacʉ quena ca-jũacoami.

Riíre bairije ca-bauwĩ.

13 To bairi tunu ñocoa quena ca-wẽecoama yepapʉ.

Higuera ca-wamecʉtii yucʉ ricaacã ca-wẽrore bairo ca-wẽecoama.

Wino seeto ca-papuro ti yucʉ ricaacã ca-wẽrore bairo ca-wẽecoama ñocoa maca.

14 To bairi ʉmʉrecóo ca-yajicoapʉ.

Jicã pũuro mani ca-tunua biaro ti pũuro macaje bauquẽe.

To bairona ʉmʉrecóo ca-bauqueticoapʉ.

To bairona ʉ̃ta yucʉ quena ca-ano cõo aperopʉ cá-aápʉ to canacãʉpʉna.

Mar ria ca-pairi ya recomacapʉ ca-ani poari yucʉ poari quena to bairona ape paʉripʉ cá-aácoapʉ ti poari quena.

15 To bairo ati yepa macana nipetirã maca tiere tʉjʉrã ca-uwibʉjawã.

Caʉparã,

na ẽorobʉja ca-rotirã quena,

polisía maja ʉparã quena,

pairo ca-apeyecʉna quena,

ca-tutuarã quena,

nipetirã ca-uwibʉjawã.

Ca-paabojari maja,

na majuuna ca-paarique rotirã quena nipetirã ca-uwibʉjawã.

Uwibana ca-ruticoama aperopʉ ʉ̃ta yucʉpʉ.

Ʉ̃ta yucʉpʉ ruti aá,

ʉ̃ta totiripʉ,

ʉ̃ta rupaa watoaripʉ ca-ruti ejanumu peticoama.

16 Seeto uwibana oco bairo ca-ĩiwã:

—Ʉ̃ta yucʉ,

ʉ̃ta rupaa mani buipʉ ca-anie ñaa rui atíbato manire to roca pea jĩaato,

ca-ĩiwã seeto Diore cʉ̃ uwibana.

—Dio,

Caʉpaʉ majuu ruiricaropʉ ca-ruii manire popiyeyegʉmi.

Cordero ca-wamecʉcʉ quena to bairona mani átigʉmi caroorije mani cá-átie wapa,

ca-ĩiwã ca-yajioropʉ ca-rutibatana yua.

17 ¡Ayu!

Ejacoapa ca-ani tʉjari rʉmʉ,

Dio camajare cʉ̃ ca-popiyeyeri rʉmʉ.

Cʉ̃re ca-apiʉjaquẽna popiye tamuogarãma.

Jicãʉ maca nare cʉ̃ ca-popiyeyequetiparore bairo Diore ca-camota majii mácʉmi.

Na popiyeyegʉmi Dio cʉ̃re ca-apiʉjaquẽna caroorã nipetirãre yua.