El libro y el Cordero
5
Yʉ ca-tʉjʉwʉ tunu jicã pũurore.
Jicã pũuro anibato quena ca-rupa tunua ca-ani pũuro ca-ãmʉ.
Dio ti paʉpʉ ruiri cʉ̃ wamo cariape macá nʉgoa maca ca-cʉgowĩ ti pũuro tunuarica pũurore.
To bairi ca-buipʉ,
ca-pupeapʉ quenare ucarique ca-ãmʉ.
Jʉgoo biarica tunua ca-ãmʉ beroa cosi unie mena.
Siete paʉri majuu jʉgoo biarica paʉri ca-ãmʉ ti tunuare.
2 Yʉ ca-tʉjʉwʉ tunu Dio tʉ macacʉ jicãʉ ángel're.
Ca-tutuaʉ majuu ca-ãmi.
Awajarique mena oco bairo ca-ĩi jeniña joonucuwĩ topʉ ca-ãnare:
—¿Ñamʉ caroaʉ majuu cʉ̃ ca-ano ati pũuro tunuarica pũurore cʉ̃re cʉ̃ pãa rotibocʉtí Dio?
¿Ati pũurore ni ucʉ̃re cʉ̃ tʉ̃ga woo ne pãa rotibocʉtí Dio na ca-jʉgoo biariquere?
ca-ĩi jeniña joo ãmi Dio tʉ macacʉ ángel.
3 To bairo cʉ̃ ca-ĩibato quena ni majuu ca-mami caroaʉ aniri ti pũurore Dio cʉ̃ ca-pã rotipaʉ.
Noo ʉmʉrecóopʉ Dio tʉ macana,
ati yepapʉ ca-ãna quena,
ca-bai yajicoatana quena,
di maja majuu ca-mama ti pũurore Dio cʉ̃ ca-pã rotiborã.
Ñamʉ caroaʉ majuu ca-mami ti pũuropʉ macajere Dio cʉ̃ ca-tʉjʉ rotii.
4 Dio cʉ̃ ca-pã rotiquẽna jeto ca-ãma.
To bairo ca-pã roti ecooquẽna jeto na ca-ano tʉjʉʉ seeto yʉ ca-otiwʉ.
Seeto yʉ ca-otiwʉ jicãʉ ucʉ̃ ti pũuropʉ na ca-ucariquere ca-paña tʉjʉpaʉ cʉ̃ ca-mano tʉjʉbacʉ.
5 To bairo yʉ ca-otiro tʉjʉʉ cabʉcʉrã ca-rotirã mena macacʉ jicãʉ oco bairo yʉ ca-ĩiwĩ:
—¡Otiquẽja!
¡Jĩire cʉ̃ tʉjʉya!
Cʉ̃re cʉ̃ pãa rotiboʉmi Dio,
yʉ ca-ĩiwĩ.
—Cʉna,
León ca-wamecʉcʉ,
Judá ya poa macacʉre pãa rotiboʉmi Dio.
Cʉ̃na David ãnacʉ pãrami ãmi.
Caroorije,
Satanáre ca-netoricʉ ãmi.
To bairi ati pũuro na ca-jʉgoo biariquere ca-tʉ̃ga woo ne pãpaʉ ãmi.
Cʉ̃ jetore cʉ̃ pãa rotigʉmi Dio,
caroaʉ majuu cʉ̃ ca-ano maca.
To bairi ati pũuropʉ uca tuuriquere mani buiogʉmi,
ca-ĩiwĩ cabʉcʉ ca-roti majii.
6 To bairo cʉ̃ ca-ĩiro yʉ ca-tʉjʉwʉ tunu waibʉcʉre.
Oveja na ca-ĩi waibʉcʉ macʉ,
Cordero ca-wamecʉcʉre cʉ̃ yʉ ca-tʉjʉwʉ.
Cʉ̃ maca na ca-jĩaricʉ anibacʉ quena ca-tunu catíricʉ ca-bauwĩ.
To bairi topʉ ca-tʉjʉnucucõawĩ.
Siete majuu ca-jawiaricʉmi.
Siete majuu ca-capecʉmi.
To bairi cʉ̃ jawiari,
cʉ̃ cape quena Dio yarã espírituare siete majuure majioro bai.
Camajare ca-bauquẽna Dio yarã espíritua siete majuu na ca-aniere majioro bai cʉ̃ capeari,
cʉ̃ jawiari.
Dio ati yepa nipetiropʉ cʉ̃ Espíritua cʉ̃ ca-jooricarã na ca-aniere majioro bai tie cʉ̃ jawiari,
cʉ̃ capeari.
To bairi Dio cʉ̃ ca-ruiro riape ca-ãmi Cordero.
Ricati ca-baurã bapari canacãʉ,
veinticuatro majuu cabʉcʉrã ca-rotirã nipetirã na watoapʉre ca-ãmi.
7 To bairi cʉ̃na Cordero Dio cʉ̃ ca-ruiropʉ cá-aámi.
Topʉ aá,
eja yua,
ti pũuro tunuarica pũurore,
Dio cʉ̃ wamo cariape macá nʉgoa maca ca-ani pũurore ca-newĩ.
8 To bairo cʉ̃ cá-áto tʉjʉrã yua,
ricati ca-baurã naa bapari canacãʉ majuu rʉpopatuaripʉ ejacumuri Corderore cá-áti nʉcʉbʉgowã yua.
Cabʉcʉrã ca-rotirã veinticuatro majuu quena nare bairona ejacumuri cʉ̃ cá-áti nʉcʉbʉgowã na quena.
Seeto cʉ̃ cá-áti nʉcʉbʉgowã.
Yʉ ca-tʉjʉwʉ tunu ca-ajiyari jotʉrire oro mena na cá-áta jotʉrire,
cabʉcʉrã ca-majirã na ca-ano cõo na ca-cʉgori jotʉrire.
Ti jotʉri ca-jiracoapʉ ca-jʉti ñuurije ca-ʉ̃rije mena.
Tie ca-ʉ̃rije Dio yarã cʉ̃re na ca-jenirijere bairo ca-baiwʉ.
Tie caroa ca-jʉti ñuurije Diore na ca-joe buje mʉgo joorijere bairona ca-baiwʉ Diore ca-apiʉjarã cʉ̃re na ca-jenirije.
Yʉ ca-tʉjʉwʉ tunu bajariquere,
harpas ca-wame cʉtiere.
Cabʉcʉrã ca-rotirã na ca-ano cõo tie mena ca-bajawã.
9-10 Cawama wamere ca-bajawã camaja na ca-apiñaquẽtiere.
Oco bairo ca-ĩi bajawã:
Camaja na ca-jĩaricʉ mʉ ãa.
Mʉre na ca-jĩarique jʉgori,
mʉ ca-rií peti yajirique jʉgori camajare catíriquere na mʉ ca-joowʉ.
To canacã poa mena macanare,
to canacã maca macanare jicãarãre na mʉ ca-catíowʉ.
Dio yarã na ca-aniparore bairo ĩi catíriquere na mʉ ca-joowʉ.
To bairi ʉparãre bairo na ca-aniparore bairo na mʉ cá-átibojawʉ.
Ti yepapʉre ca-rotirã anigarãma.
Sacerdote maja,
Diore aperãre ca-jenibojarã na ca-aniparore bairo quenare na mʉ cá-átibojawʉ.
To bairo caroaro majuu cá-átacʉ aniri mʉna ati pũuro tunuarica pũurore mʉ ne maji.
Mʉ jetore pã rotirique ãa,
ca-ĩi bajawã to macana cabʉcʉrã ca-roti majirã,
veinticuatro majuu ca-ãna.
11 Cabero yʉ ca-tʉjʉwʉ tunu.
Ángel majare capaarã majuu na yʉ ca-tʉjʉwʉ.
Dio cʉ̃ ca-ruiro tʉpʉ bajarã ca-ãma.
Ricati cabaʉrã quena ca-ãma.
Cabʉcʉrã ca-roti majirã quena ca-ãma.
Na tʉpʉ ca-bajawã Dio tʉ macana ángel maja capaarã majuu,
capee millones ca-ãna majuu.
12 Seeto bauja ñuuro ca-bajawã.
Oco bairo ca-ĩi bajawã:
Cordero ca-wamecʉcʉ maca nipetirã netoro ca-ñuu majuʉ ãmi.
Na ca-jĩaricʉ nipetirã netoro ca-roti majii ãmi.
Cʉ̃na ãmi nipetirije Ʉpaʉ cá-ácʉ.
Nipetirijere áti majimi.
Ca-tutuaʉ majuu ãmi.
To bairi camaja nipetirã cʉ̃re na nʉcʉbʉgoato.
“Mʉ jeto caroaʉ mʉ ãa,”
cʉ̃re na ĩato.
Cʉ̃re na ĩi wariñuu bajaato,
ca-ĩi bajawã naa ángel maja yua,
capaarã majuu capee millones ca-ãna.
13 To bairo na ca-ĩi bajaro bero yʉ ca-apiwʉ tunu apeye bajariquere.
Camaja capaarã na ca-bajarijere yʉ ca-apiwʉ.
Jõ bui macana quena,
ati yepa macana quena,
mar capaca yari macana quena,
ca-bai yajiricarã ca-tunu catírã quena nipetirã na ca-ĩi bajarijere yʉ ca-apiwʉ.
Oco bairo ca-ĩi bajawã:
Dio,
Caʉpaʉ majuu ruiricaropʉre ca-ruii mʉ ñuu majuucõa.
Mʉ Macʉ Cordero ca-wamecʉcʉ quena ñuu majuucõami.
To bairi camaja nipetirã mʉre na ĩi wariñuu bajaato.
Camaja nipetirã mʉre na nʉcʉbʉgoato.
“Mʉ jeto mʉ ñuu majuucõa,”
mʉre na ĩato.
Nipetirã netoro ca-roti majii mʉ ãa.
To bairo mʉ anicõa aninucugʉ to canacã rʉmʉ yua,
ca-ĩi bajawã camaja capaarã majuu Diore,
Cordero ca-wamecʉcʉ quenare.
14 To bairo na ca-ĩi bajaro ricati ca-baurã bapari canacãʉ majuu oco bairo ca-ĩinucuwã:
“Mʉja ca-ĩi bajarore bairona to ãmaro,”
ca-ĩinucuwã.
To bairo na ca-ĩiro cabʉcʉrã ca-roti majirã veinticuatro majuu rʉpopatuaripʉ ejacumuri Diore cá-áti nʉcʉbʉgowã.
To canacã rʉmʉ ca-anicõa aninucuʉre seeto cá-áti nʉcʉbʉgowã yua.