La adoración en el cielo
4
To bairo cʉ̃ ca-ĩiro bero jõ buipʉ yʉ ca-tʉjʉ mʉgojowʉ.
Ʉmʉrecoopʉ yʉ ca-tʉjʉ mʉgojoro jope pãrica jope ca-anopʉ yʉ ca-tʉjʉwʉ.
To bairo tʉjʉ yua,
ca-bʉjʉrijere yʉ ca-apiwʉ.
Tutuaro ca-bʉjʉro putiricarore bairo yʉ ca-apiwʉ.
Ca-jʉgoye yʉ ca-apiricarore bairona yʉ ca-apiwʉ tunu.
Tiere yʉ ca-apiro putiricarore bairo ca-bʉjʉrije anibato quena camajocʉ cʉ̃ ca-wadarore bairo ca-báuwʉ.
Oco bairo yʉ ca-ĩi wadawĩ:
—Atopʉ jõ buipʉ wamʉ ajá.
Mʉre yʉ iñoogʉ.
Ati ʉmʉrecóo,
ati yepapʉ ca-baipere mʉre yʉ iñoogʉ.
Mʉre yʉ ca-iñoopere bairo baigaro,
yʉ ca-ĩiwĩ tutuaro ca-wadaʉ.
2 To bairo yʉre cʉ̃ ca-ĩirona Espíritu Santo majirique yʉre cʉ̃ ca-jooro jõ buipʉ yʉ cá-aápʉ.
To bairo aá,
topʉ eja yua,
caʉpaʉ cʉ̃ ca-ruiricarore yʉ ca-tʉjʉwʉ.
Ca-roti majii majuu cʉ̃ ca-ruinucuri paʉ caroa paʉ majuure yʉ ca-tʉjʉwʉ.
To macacʉ topʉ ca-ruii quenare cʉ̃ yʉ ca-tʉjʉwʉ.
3 Cʉ̃ maca seeto ca-aji batewĩ.
Jaspe o cornalina na ca-ĩrije caroa ʉ̃ta rupaacãre bairo ca-aji batewĩ.
Topʉ cʉ̃ ca-ruiro bui macare bue betore bairo ca-bauwʉ.
Tie bue beto esmeralda na ca-ĩrije ʉ̃ta rupaacã,
caroaro ca-jʉmerije ʉ̃ta rupaacãre bairo ca-ajiyawʉ ti beto maca.
4 Yʉ ca-tʉjʉwʉ tunu apeye ruiriquere.
Ca-aji bate majuʉ,
Dio cʉ̃ ca-ruiricaro tʉpʉre veinticuatro ruirica yejerire yʉ ca-tʉjʉwʉ tunu.
Ca-roti majirã na ca-ruirije ca-ãmʉ.
Cabʉcʉrã ca-rotirã veinticuatro majuu topʉre ca-ruiwã.
Ca-rupa beto Dio tʉpʉre ca-rui amojorewã.
Jutii cabotirije jetore ca-jañawã.
To bairi corona na ca-ĩri betorire,
caʉparã na rʉpoaripʉ na ca-pejarije uniere oro uniere ca-pejawã yua.
5 Yʉ ca-tʉjʉwʉ tunu ca-bʉpo yaberijere.
Dio cʉ̃ ca-ruiropʉ bʉpo ca-yaberije ca-butiwʉ.
Seeto ca-bʉjʉwʉ.
Bʉpo quena pairo ca-bʉjʉwĩ cʉ̃ ca-ruiri paʉpʉre.
Cʉ̃ ca-ruiro riape jĩa bujurique siete majuu ca-ãmʉ.
Caroaro ca-ʉ̃ʉ batewʉ.
To bairi Dio yarã siete espíritu canacãʉ na ca-aniere buio majioro bai tie siete jĩa bujurique.
6 Yʉ ca-tʉjʉwʉ tunu ca-rupa raa ca-pairi raare bairo quenare.
Muipu cʉ̃ ca-aji ree porore bairo ca-ajiyawʉ ti raa.
Dio cʉ̃ ca-ruiro riapepʉ ca-ãmʉ ti raa.
Eñoo pãire bairo ca-ajiya nutuapʉ.
To bairi yʉ ca-tʉjʉwʉ tunu aperãre ricati ca-baurã,
mani ca-tʉjʉñaquetinucurã unare.
Na riape quenare ca-capecʉna,
na jõcʉ bero quenare ca-capecʉna nipetiri rupaʉna ca-capecʉti peticõawã.
Dio cʉ̃ ca-ruiro tʉpʉna ca-ãma na quena.
Jicãʉ cʉ̃ riape ca-ãmi.
Apeĩ cʉ̃ jõcʉ bero maca ca-ãmi.
Apeĩ tunu cʉ̃ riape nʉgoa maca ca-ãmi.
Apeĩ tunu cacõ nʉgoa maca ca-ãmi.
7 To bairi ca-ani jʉgoʉ cʉ̃ riya yai jũaʉ riyare bairica ca-riya jũaʉ ca-ãmi.
Cʉ̃ bero macacʉ cʉ̃ riya wecʉ riyare bairica ca-riyacʉmi.
Cʉ̃ bero macacʉ tunu caʉmʉ riyare bairica ca-riyacʉmi.
Cʉ̃ bero macacʉ tunu aá pacʉ riyare bairica ca-riyacʉmi.
Cʉ̃ querʉpʉri ca-ñugueowĩ ca-wʉʉre bairo.
8 Na querʉpʉri seis majuu ca-cʉgowã to canacãʉna.
Na querʉpʉripʉre pʉga nʉgoapʉna ca-capeari cʉma.
To bairi ʉmʉreco quenare,
ñami quenare Diore cʉ̃ ca-ĩi wariñuu bajawã.
Janaquẽnana oco bairo ca-ĩi wariñuu bajawã:
¡Caroaʉ!
¡Caroaʉ!
¡Caroaʉ majuu ãmi mani Ʉpaʉ Dio!
Nipetirijere cá-áti majii ãmi.
Ca-ani jʉgoricʉ ãmi.
Yucʉ quenare to bairona anicõami.
Ape rʉmʉpʉ quenare ti yepapʉ tunu ejagʉmi tunu,
Diore ca-ĩi wariñuu bajawã.
9-10 To bairo Diore ĩi wariñuu bajarã cʉ̃ ca-roti majirijere ca-ĩi wariñuu bajawã.
To bairi,
“Nipetirã mʉre na nʉcʉbʉgoato,”
ca-ĩi wariñuu bajawã.
To bairi,
“Caroaro jãare mʉ áa,”
ca-ĩi wariñuu bajawã.
Ti paʉpʉ ca-ruiire to canacã rʉmʉ ca-anicõa aninucuʉre cʉ̃ ca-ĩi wariñuu bajawã.
To bairo na ca-ĩiro yua,
cabʉcʉrã ca-roti majirã veinticuatro majuu cʉ̃ tʉpʉre ca-ãna rʉpopatuapʉ ejacumuri Diore cá-áti nʉcʉbʉgowã.
To bairo átiri na rʉpoari buiripʉ ca-pejari betorire to canacãʉna tu wee jee átiri Dio tʉpʉ ca-cũucõawã.
To bairo átiri seeto Diore na cá-áti nʉcʉbʉgorijere cá-áti iñoowã.
11 Oco bairo ca-ĩiwã Diore ĩi nʉcʉbʉgori:
Jã Ʉpaʉ,
caroaʉ majuu mʉ ãa.
¡Camaja nipetirã mʉre na nʉcʉbʉgoato!
¡Mʉre na ĩi wariñuu bajaato!
“Nipetiropʉ ca-roti majii mʉ ãa,”
mʉre na ĩato.
Ati ʉmʉrecóo macaje ca-ano cõo nipetirijere mʉ cá-ájupa mʉ ca-rotirije jʉgori.
To bairi nipetirã mʉre na nʉcʉbʉgoato,
ca-ĩiwã to macana cabʉcʉrã ca-rotirã veinticuatro majuu ca-ãna Diore yua.