Un cojo es sanado
3
Cabero jicã rʉmʉ tunu Pedro,
Juan mena yucʉ bui muipu cʉ̃ ca-tʉja rui áto a las tres ca-ano Dio wiipʉ cá-aájuparã.
To ca-paʉ ca-ano camaja Dio wiipʉ cá-aánucuñuparã,
Diore jeni nʉcʉbʉgorã aána.
2 To bairi Dio wiipʉ Pedro,
Juan mena na cá-aáparo jʉgoyeacã camajocʉre cá-aá majiquẽcʉre cʉ̃ ca-ne aájuparã aperã.
To canacã rʉmʉ to bairona Dio wiipʉ jope tʉpʉ cʉ̃ ca-cũnucuñuparã,
Caroa Jope ca-wamecʉti jope Dio wiipʉ,
ca-jãa ejarãre niyeru cʉ̃ jeni ruiato ĩirã.
Nemoopʉ to bairona ca-buiaricʉ ca-añupʉ.
3 To bairi Pedro,
Juan Dio wiipʉ jãagarã na ca-ejaro tʉjʉ:
—Niyeru yʉ jooya,
ca-ĩibajupʉ.
4 To bairo cʉ̃ ca-ĩiro Pedro,
Juan cʉ̃ tʉbea tʉjʉ:
—Jã tʉjʉya,
cʉ̃ ca-ĩiñupʉ Pedro.
5 To bairo Pedro cʉ̃ ca-ĩiro,
cá-aá majiquẽcʉ maca na tʉjʉ,
“Apeye unieacã yʉ joogarãma,”
ca-ĩi tʉgooñabajupʉ.
6 To bairo na cʉ̃ ca-tʉjʉro oco bairo cʉ̃ ca-ĩiñupʉ Pedro:
—Niyeru yʉ cʉgoquẽe.
Apeye caroare yʉ ca-cʉgori wame macare mʉ yʉ átinemogʉ.
To bairi Jesucristo Nasaré macacʉ mʉre cʉ̃ ca-netoo majiro mena wamʉnʉcari aácʉja,
cʉ̃ ca-ĩiñupʉ Pedro.
7 To bairo cʉ̃ ĩi,
cʉ̃ wamore ñee,
cariape nʉgoa maca cʉ̃ ca-tʉ̃ga wamʉo nʉcoñupʉ.
To bairo Pedro cʉ̃ ca-tʉ̃ga wamʉo nʉcorona nemoo cʉ̃ rʉpori ocabʉtirique cʉ̃ cá-ájupe.
8 Rʉpori ocabʉtiri cariapena wamʉnʉca,
cá-aá jʉgoyupʉ.
Aá jʉgo,
Pedro,
Juan mena Dio wiipʉ na mena ca-jãa aájupʉ.
Na mena jãa aá,
bapa mʉgo,
bapa mʉgo,
cá-aájupʉ.
To bairo bapa mʉgo aá,
“Dio yʉ átinemomi ca-ñuu netori wame,”
ca-ĩi wariñuuñupʉ.
9 To bairo Diore ĩi wariñuuri cʉ̃ ca-bapa mʉgo aáto aperã maca cʉ̃ tʉjʉrã:
10 —Ani cá-aá majiquetibatacʉna Caroa Jope ca-wamecʉti jope Dio wii jãarica jope tʉpʉ niyerure ca-jeni ruibatacʉna ãcʉmi,
ca-ame ĩiñuparã.
To bairo cʉ̃ ãnacʉre tʉjʉ majiri cʉ̃ ca-tʉjʉ acʉacoajuparã yua.
Discurso de Pedro en el Portal de Salomón
11 To bairi Pedrore,
Juan're na pitigaquetiri na tʉna ca-tuayupʉ.
To bairo na cʉ̃ ca-bairo camaja nipetirã ca-tʉjʉ acʉarã na tʉpʉ ca-tʉjʉra atʉ aájuparã.
Portal de Salomón na ca-ĩri arʉa majuu,
jope tʉ ca-biaya mani arʉapʉ,
Pedro,
Juan na ca-anopʉ ca-tʉjʉra atʉ aájuparã.
12 To bairo na tʉpʉ na ca-tʉjʉra atʉ ató tʉjʉri oco bairo na ca-ĩiñupʉ Pedro:
—Yʉ yarã Israel macana,
¿nope ĩirã ani cʉ̃ ca-netorije tʉjʉri mʉja tʉjʉ acʉatí?
¿Nope ĩirã,
“Ati maja na majuuna na ca-majirije mena,
Dio mena ca-ñuurã aniri cá-aá majiquetibatacʉre cʉ̃ netoo majirãma,”
jãare mʉja ĩi tʉgooñatí mʉjaa?
13-14 Jesú maca cʉ̃ ca-majirije mena cʉ̃ netoowĩ.
Mani ñicʉ jãa,
Abraham,
Isaá,
Jacobo,
aperã nipetirã ca-ani jʉgoricarã Diore cá-áti nʉcʉbʉgorã ca-aniñañuparã.
To bairi Dio na cá-áti nʉcʉbʉgoricʉ cʉ̃ Macʉre ca-ani majuʉre cʉ̃ ca-cũuñupi Dio Jesúre,
aperãre mʉja ca-jĩa rotiepaʉ maca.
“Cʉ̃re jã booquẽe,”
mʉja ca-ĩiwʉ,
Pilato,
gobierno macacʉ maca,
“Cʉ̃ yʉ buugʉ,
cʉ̃re ca-jĩaquetipe ãa,”
cʉ̃ ca-ĩrije to ca-anibato quenare.
“Cʉ̃re jã booqueti majuucõa,”
mʉja ca-ĩiwʉ,
Dio yere cá-ácʉ,
ca-ñuu majuʉ cʉ̃ ca-anibato quena.
“Jesúre jã booqueti majuucõa,”
ĩri,
“Camajare ca-jĩaricʉ presopʉ ca-ãcʉ̃ macare cʉ̃ buuya,”
mʉja ca-ĩiwʉ Pilatore.
15 To bairo ĩi,
camajare catírique ca-joʉre aperãre na mʉja ca-jĩa rotiwʉ Jesúre.
Cʉ̃re na mʉja ca-jĩa rotiro bero Dio maca cʉ̃ ca-tunu catíoyupi.
Jã majuuna Jesúre cʉ̃ jã ca-tʉjʉwʉ ca-tunu catíricʉpʉre,
na ca-ĩiñupʉ Pedro.
16 —To bairi ani cá-aá majiquetibatacʉre mʉja ca-majiire Jesú maca cʉ̃ ca-majirije mena cʉ̃ netoomi.
Jesúre jã ca-apiʉjaro ĩi anire cʉ̃ netoomi Jesú mʉja ca-tʉjʉrona.
17 ’Yʉ yarã,
mʉjaa,
“Dio Macʉna ãmi Jesú,”
ca-ĩi tʉgooña majiquẽna aniri aperãre na mʉja ca-jĩa rotiwʉ Jesúre.
Mʉja ʉparã quena to bairona ca-jĩa rotiwã.
18 Tirʉmʉpʉ to bairona,
“Popiye tamuogʉmi Cristo,”
Dio ye quetire ca-ĩi buio jʉgoyeyeyupa Dio ye quetire buiori maja ca-aniñaricarã.
To bairi ca-jʉgoyepʉna Dio na cʉ̃ ca-ĩricarore bairona baiwʉ Cristore na mʉja ca-jĩa rotirique yua.
19 To bairi caroorije mʉja cá-átiere jʉtiriticõari,
“Mani ca-tʉgooñarijere jã wajoagarã,”
ĩri Cristore apiʉjaya mʉjaa.
To bairo mʉja cá-áto caroorije mʉja cá-átaje majiriogʉmi mani Ʉpaʉ Dio.
Caroa ani tʉgooña yerijã wariñuuriquere mʉja joogʉmi.
20 Cʉ̃ ca-bejericʉ Cristore mʉja tʉpʉ joogʉmi.
21 Tirʉmʉpʉ Dio ye quetire buiori maja ca-aniñaricarã,
“Cristo ʉmʉrecóopʉ Dio tʉpʉ tuagʉmi mai,”
ca-ĩi buioyupa.
“Cabero Dio ati ʉmʉrecóo wajoagʉmi.
Nemoopʉ cʉ̃ cá-átatore bairona átigʉmi tunu.
Camaja Diore cʉ̃ na ca-bai netooparo jʉgoye ca-bairicarore bairona átigʉmi Dio.
Ti paʉ majuu Cristore mani Ʉpaʉre joogʉmi Dio ati yepapʉre,”
ca-ĩi ucayupa Dio ye quetire buiori maja ca-aniñaricarã.
22 Moisé tirʉmʉ macacʉ ati wame buioʉ,
“Mani Ʉpaʉ Dio jicãʉ cʉ̃ ye quetire ca-buiopaʉre mʉja joogʉmi.
Yʉre cʉ̃ ca-jooeparore bairona cʉ̃ joogʉmi.
Jicãʉ mani yaʉ anigʉmi cʉ̃ quena.
Caroaro cʉ̃re ca-apiʉjaparã mʉja ãa.
23 To bairi noo canacãʉ majuu cʉ̃re ca-apiʉjaquẽna anigarãma ta.
Na una Dio yarã mena macana aniquetigarãma.
Na reegʉmi Dio,”
ca-ĩi buioyupi Moisé.
24 ’Nemoopʉre Dio ye quetire buiori majocʉ tirʉmʉpʉ macacʉ Samuel ca-wamecʉcʉ ati rʉmʉri yucʉacã ca-baipere ca-ĩi uca jʉgoyeyeyupi.
Cʉ̃ bero macana nipetirã na quena Dio ye quetire buiori maja ca-ĩi queti buio jʉgoyeyeyupa Jesucristo cʉ̃ ca-baipere.
25 Yucʉ ati rʉmʉ macanare mʉjaare ca-ĩiñupi Dio ca-ñuuri wame ĩi buio jʉgoyeyei.
Oco bairo mani ñicʉpʉre Abraham're cʉ̃ ca-ĩiñupi Dio:
“Mʉ pãramerãpʉre jicãʉ mʉ pãrami anigʉmi.
Cʉ̃ cʉ̃ ca-ejaro camaja nipetirã seeto wariñuurique bʉgagarãma,”
ca-ĩiñupi Dio Abraham're.
To bairo cʉ̃ ĩi,
yucʉ rʉmʉ manipʉre ca-baipere cʉ̃ ca-ĩiñupi Dio Abraham're.
26 To bairi manire Israel macanare aperã jʉgoye cʉ̃ ca-bejericʉ Jesú ye quetire mani joomi Dio.
Mani joomi tie quetire,
caroorije mani cá-átiere mani ca-jana majiparore bairo ĩi.
Mani ca-janaro wariñuuriquere mani joomi Dio yua,
ca-ĩiñupʉ Pedro.