Namá keska meranxon yobin joshin napokoya tasá oinna
8
Namá keska meranxon, Ibo Diossen ea oinmaara, westíora tasá bimi joshin bochoya iká iki,2 jatianra ea Ibon yokata iki: —¿Jaweki min oinna, Amós? —akin. Jatianra en yoia iki: —Westíora tasá bimi joshinhara en oinke —akin. Jatianra Ibon ea yoia iki: —Israel jonibora moa joshin iki; ramara jakiribi jaton jakonmabo shinanxonyamakin en moa jato oinresti yamake.
3 Ja nete nokóketianra, apo iká xobonkoniax bewati bewábo, yoyo iananbi winitibo iti iki. Icha jonira mawáti iki, jatianra ja mawatamabaon yorabo netéxonres wetsankobires potakanti iki. Ibonra jaskara yoiai —akin.
Israel jonibaon akábo jato yoixonti moa ochóma
4 Nato ninkakanwe, mato riki rabiosmabo masá tenemaibo itan nato mainmea jawebiomabo jawemabi itiakin jato ramiaibo;
5 matora ikai neskati: ¿Non trigonin moa noa maronon, jawetian ja oxe bená iketian ati fiesta winotai? ¿Jawetianki jan tantiti nete winotai, jato paraanan jan iwe toponti senenmabo akáx, non berobaon noa kopí maronon?
6 ¡Onitsapibora non jawebioma imati iki, jaton ribin kopiati kopí non yonotibo inoxon jaton yorabi noa maromakanon, rabé sandalia kopíbichores jaton ribin ikenbi! ¡Non trigo xakábaonbira noa maroti iki!
7 Ikaxbira Ibo ikoni yoyo ika iki, israelitabo rabíresbo kopí: “Ja akanabaonra jawetianbi ea shinanbenoyamai”.
8 ¿Jatianki jatíbi jabo kopí mai niwantima iki? ¿Jatíbi ja main jaa joniboki winitima iki? ¡Nilo paro onpax keyatax maannax ikai keskatira, nato mai, keyatax paketax jikiti iki!
9 Ibonra onantiakin yoia iki: “Ja netera bariapan ikenbi en bari nokamati iki,
jatianra kikin nete ikenbi,
mai en yamé mapomati iki, iki ixonra Ibon yoiai.
10 Jaton fiestabora moa mawákanketian
onístires en imati iki,
jaton bewábora moa onisi yoyo iananbi winitires iti iki;
onískin ati chopabo en jato sawemaara,
masá shinanni chexakaati maxtankanti iki.
Jabicho jawen bake manóketian ikai keskatira,
chexakakin masá tenei winikanti iki.
11 Ibonra yoiai, netera nokónoxiki
nato main en jato pitin imati,
jara jawékiati yamaketian pitin itima iti iki, itan
ja xeati onpax yamaketian nomin itira itima iki,
Jara inoxiki jawékiakasai keskati, ja Ibon joi ikonbiresi ninkátinin keenti.
12 Jonibora nokon joi benai oken boanbekonti iki,
aniparonkoniax
wetsa aniparonkobo bokanti iki,
norteorixon peoxonra, bari pikotaiori kaxonbo
benakanti iki, ikaxbira nokokantima iki.
13 Metsá xontakobo betan koshi
shinanya bake ranonbora nomin aká,
ja nete beyóskanti iki.
14 Ja Samariain jatonbi aká jaweki rabi, enra ikon yoiai ikaibo; jainoax
‘Dan min dios jaketianra en ikon yoiai ikaibo’,
‘itan Beerseba diosbo jaa kopíra en ikon yoiai ikaibora’,
jatíbitian iresabires iti iki
Ibonra jaskara yoia iki”.