Namá keská meranxon profetanin jainxon yoina menoti patax Ibo oinna
9
Namá keska meran en oinnara, jainxon yoina menoti patax nixon Ibon ea yoia iki:“Witábo maxkatemea ja kanobo rishkiwe,
xobo jikitiainbo shakotaikaman
¡Ja rorokoota pakexbo joniboki manbanon!
Ja mawáyamaabora espadanin en jato retemati iki:
jabataxbira tsoabi jabátima iki;
2 mai chichó jonékankebira,
jainoa en jato pikoti iki;
nai keyá ikain bokankebira,
jainoa en jato paketi iki.
3 Carmelo manan maxkaten jonékankebira,
jato benai jain ea kati iki;
en nokoyamanon ikax aniparo chichó jonékankebira,
jato beshéanon ixon jene meranoa ani onsá yoina en yoiti iki;
4 wetsanko jato yatanxon bokankebira, jaton rawíbaon,
espadanin jato retekanon ixon en jato yoiti iki.
¡Jakonhanoxon akámara, jatíbitian en mato ointi iki!” akin.
Ibo jatíbi atipana koshi iketian profetanin rabia
5 Ibo, jatíbi atipana Diossen,
mai meetara onpax banéti iki,
jatianra jatíbi main jaa jonibo winiti iki.
Maira keyatax namannax ikai, Nilo paro jenetiax itan tsosinax ikai keskati.
6 Ibonra jawen jati naikan aká iki,
mai manaon nai xabain riki;
janra aniparomea jene kenai,
jaskáaxonra maiki chikoai.
Jawen janera, Ibo iki.
7 Natora Ibon onantiakin yoia iki:
“Israelitabó, matobo itan etiopebora,
nokona mato ja jonibobires iki.
Egiptonkonia en mato beakeskaribiakinra,
Cretainoa filisteobo en jato bea iki,
jainxon Kirhainoara arameobo en jato bea iki”, akin.
8 Ninkakanwe, Ibon Israel jonibo oinna ocharesbo iketianra,
jato yoia iki:
“Nato mainmeabo jato keyokinbira,
Israelnin chiní bakebores en jatíbi jato keyotima iki.
Ea, Ibo ixonra onantiakin en yoiai.
9 Ninkakanwe, Trigo payanna jakonmabo maanaitian
jawe berobi main pakéyamai keskáakinra,
Israel jakonma jonibo en jato potati iki.
10 Jatíbi nokon jemamea ochares israelitabo,
‘Jaskara jawékibora jawekeskataxbi noa winótima iki:
jakonma jawékininra noa nokotima iki’.
Jaskati yoyo ikaibora;
espadanin jatíbi jato retekanti iki”.
Benxoax Israel moa ikátiai keskáribi iti
11 Ibonra yoia iki: “Ja nete nokoketianra, Davidkan peota poxota weninti keskáakin, itan chiké pekebo xépoti keskáakin israelitabo moa ikátiai keskáakin benaakin en weninti iki,
12 ja Edomhain texeabo itan jatíbi wetsa mainmea texeabo ja moa nokona ikátiaibora, jakiribi Israel jonibaona iti iki”. Ixonra yoia iki. Jaskara ati yoia ixonra senenhati iki.
13 Ibonra yoia iki: Ninkakanwe. “Netebora nokoti kaai, trigo tsekakin keyoamabi, moa jakiribi bananoxon, mai karanbeti netebo, itan jawen jene tsekakin uva jamákin keyoamatianbira moa trigo banati netebo nokota iti iki. Mananbotiibi itan mai matóbotiibira onpax ikai keskati uva xeati baiti iki.
14 Jatianra yatanxon wetsa main bokana nokon joni Israelbo en jato beti iki. Ja jema ras akanabo jakiribi akaxa, jain jakanti iki; jainxonra uva jiwi banaxon, jawen jene xeati axon xeakanti iki; itan wainko banaxonbo, bimiai yobinbo jawekiakanti iki.
15 Jaskara iketianra jaton mainbiribi jatíbitian jakanon ixon en jato imati iki, jatianra jawetianbi ja en jato menia mainkonia jakiribi jato tsekakantima iki”. Ibo Dios ixonra en onantiakin yoia iki.