Namá keska meranxon Amós Diossen chanpobo oinma
7
Oxamaa ikenbira namá keska meranxon Ibon neskara ea oinmaa iki: Japari banaabo apona tsekaa pekáo, jakiribi banakanabo ramashaman xoxoai inontianra, en oinna Ibon icha chanpo jonia iki.2 Jatian chanpobaon ja senenainoa xobi pikin keyoaitianra, en yoia iki: —¡Ibó, non jakonma akábo noa shinanxonyamawe! ¿Jawe keskataxki paxnaabo ikaxbi noa Israel jonibo mawáyamai jati iki? —akin.
3 Jatianra Ibo, jato ati shinanna ixonbi jato ayamai, neskata iki: —¡Jaskarara moa winóti yamake! —iki.
Namá keska meranxon chii oinna
4 Oxaama ikenbira namá keska meranxon Ibon ea neskara oinma iki: Jan masá teneti kikin xana chii raanaira en oinna iki, janra aniparo kikin nemin ikenbi keyokin tsosinmaa iki, jainxonra waibo menoti keyotai en oinna iki.
5 Enra yoia iki: —¡Jainpari tsasiwe, Ibó! ¿Jawe keskataxki paxnaabo ikaxbi noa Israel jonibo mawáyamai jati iki? —akin.
6 Jatianra Ibo jato ati shinanna ixonbi ayamai, neskata iki: —¡Natoribira moa jaskara iamai! —ikibo.
Namá keska meranxon jan makan chiké ponteti plomoya risbí oinna
7 Oxaamaa ikenbira namá keská meranxon neskararibi Ibon ea oinmaa iki: Jara westíora chiké patax iká iki, xoboaibaon jan chiké ponté nia onanti plomoya risbí tsomáyara iká iki.
8 Jatianra ea yokata iki: —¿Amós, jawéki min oinna? —akin. Jan chiké ponté nia onanti plomoya risbíra en oinke akinra en aká iki. Jatianra ea yoia iki: —Jan chiké toponxon ponté nia onantinin toponxonra en onanti iki, mato nokon joni israelitaboki, maton ikábo mato ponté niábo iki ixon. Jakiribira moa shinanxonyamai iamakin en mato oinresti yamake.
9 Israelitabaon jainxon jatonbi rabiti aká jaweki maxko xobobora en ras ati iki, jainxonribira israelitabaon jaton Dios rabiti ani xobobo en ras ati iki. Enbira Jeroboamman rarebobo apo ikanti ikenbi ras ati iki —akin.
Amós Amasías betan join reteanana
10 Betelhainoa sacerdote, Amasíasninra, Israel apo Jeroboam joi bomaa iki: “Mia ramiakaskin yoiira, Amós, Israel jonibo xaran nireske. Nato mainmea jonibaonra jaskati yoyo iki jeneyamai moa ninkákashamakin teneyamakanai.
11 ‘Jeroboamra espadanin mawáti iki, jainxonra jatíbi Israel jonibo yatanxon wetsanko bokanti iki’, ikira ono kawanhatanai”.
12 Japekáora, Amasíasnin, Amós neskaa iki: —¡Profeta, moa nenoax katanwe! Ikámatianbi rama jaskara itibo yoixon kopí bikasi Judáin katanwe;
13 ikaxbi Betelhain, rama jaskara itibo moa yoiwetsayamawe, nenora apon jawen dios jainxon jato ikinxon rabiai kikin ani xobo iki —akin.
14 Ikaxbira Amóssen neskaa iki: —Eara profetama iki, ja itinra ea keenyamai. Carnerobo koirani teetax itan niikamea higo tsekai teetatonra ea jake,
15 ikaxbira carnerobo koirani teeti kawantanaitian Ibon ja tee bichinxon, ea yoia iki: ‘Ja nokon jonibo, Israelboiba kaxon nokon janenko jato yoitanwe’, akin.
16 Jaskara iketian, Ibon joi ninkawe. Jan mia yoiaira neskara iki: ‘Diossen janenko Israel joniboki jawe jakonmabi yoyo iamawe, jabora Isaacnin chiní bakebo iki’, akin.
17 Ikaxbi neskara riki ja Ibon yoiai: ‘Min awinra ja jemameax tsiniax jawen yoran maroai iti iki. Min bake benbobo betan min bake ainbobora reteanantiainoax mawáti iki; min maibora suerte axon jato menikanti iki; ikon Dios onanmabaon mainmeaxa mia mawáti iki, jaton rawíbaonra israelitabo yatanxon jaton mai ochó jato boti iki’ —akin.