Diossen Israel ras aka
6
¡Jawe ireskiaipanon,Jerusalénhain jakonbires jaa jonibo!,
¡Jawe ireskiaipanon,
Samariain rakéyamai jaabo,
jawe ireskiaipanon,
ja main jaa kikin joni koshibo,
jato akinnon ixon israelibaon benaibo!
2 Mato joni koshi israelitabaonra mato yoiai:
“Calneain kaxon, ointankanwe;
jainoax ja ani Hamathain kaxon ointankanwe,
itan ja tenaman filisteobaon Gat ikain
kaxon ointankanwe.
¿Matoki ja mainmea jonibo bebon jakon iki?
¿Maton maiki jabaona xewinna jakon iki?”
3 Matonra shinankashamai wetsa netenra,
Diossen jakonma jawéki ati iki ixon,
ikaxbi maton akaitonra basima ja nete nokómati iki.
4 Maton fiesta akainkora,
kikinshaman jakon marfil rakátibaon
mato rakatai;
itan carnero betan waka bake xoashamanbo maton aniakin piai;
5 maton flauta xoon akara areskin maton akai iki,
matonra Davidkan akátiai keskáakin,
wetsa jan música atiboribi maton ati iki.
6 Ani kenpobaonra maton vino xeai,
ja kikin inintibaonra mato ikai,
¡Jatian maton mai jakonmayonaira matona jawemabi iki!
7 Matopari wetsanko yatanxon bokanara,
ja aniakin jawékiati axon pii saa ikaibo maton jenebainti iki.
8 En jaskara atira enbi yoiai ikira Ibo ikai;
jatíbi atipana, Ibo Diossenra onantiakin yoia iki:
“Israel jonibo rabitaira en omisai;
jaton apon xobobora en omisai;
ja jemara jaton rawíbo en meniti iki,
jatíbi jain jaa jawékiboyabira en jato meniti iki”.
9 Jatian chonka joni jawen xobon banetaxbira, ja chonkabi mawákanti iki.
10 Jawen rarebo mawata, ja xobomea tsekatira ani onsá iti iki, ja chichó iká jawen rarebora yokáti iki: “¿Ja chichóki wetsabo jaríba?” akin. “Yamarake”, akinra ja wetsan ati iki. Jatianra yoiti iki: “¡Netewe, minra Ibo janenake!”
11 Ani jakon xobonkoniabo itan maxko xobonkoniabo jan masá tenematira en jatoki raanti iki, jatianra jatíbi xobobo kikinhakin ras aka banéti iki.
12 ¿Kabayoboki shankan neeti atipana?
¿Nonki atipana aniparonko mai karanbekin?
¡Ikaxbi ja atikeskabiakin jakon atira, jan mawátires maton ake,
jatian ja atikeskabiakin jakon atira moa jan sinátires ike!
13 Yankabiresa mato raroai, jaskatira mato ikai:
“Noa koshiara noa nonbix iká iki”, ikibo.
14 Kikinhakin oinkanwe, israelitabó;
Ja Ibo, jatíbi atipana Diossenra,
mato onantiakin yoia iki:
“Wetsa mainmea jonibo mato ati en raanara,
jabaon akonbireskin mato masá tenemati iki,
norte senenainxon peoxonra sur senenainko kaman mato israelitabo akanti iki”.