Jaki yoiti ikannon ixon Diossen jato yoia
5
Nokon joi ninkakanwe, israelitabó;ninkakanwe mato notsini ea onisi yoyo ianan bewai:
2 Metsá ainbo xontakopari ikaxbi
ishtonbires mawá paketax mainbi rakáketian,
tsonbi jiriayamai keskatira;
mato Israel joniboribi jaskarain pakéke.
3 Neskáakinra Ibo Diossen israelitabo yoia iki:
“Westíora jemankoxon waranka joni reteanantiain raanara,
pacha jonibichores japariax banéti iki;
jainoax westíora jeman pacha joni raanara,
chonkabichores jakiribi banéti iki”, akin.
4 Neskáakinra Ibon israelitabo yoiai:
“Mato jaresparinon, eki yoiti ikanwe.
5 Betelhain itan Guilgalhain mato akinti benai boyamakanwe,
jainoax mato akinti benai boí Beersebahoribi winóyamakanwe,
Guilgal jonibo wetsa maibaon yatanxon
bokanaitianra tsonbi bechitetima iki, jainxonra Betel keyokin ras akanti iki”, akinbo.
6 Iboki yoiti ikanwe, jatianra mato jamati iki;
mato jaskayamaketianra Israel mainko jan chii raanti iki,
jaskáketian jan nokati atipanara Betelhain tsoabi yamati iki.
7 ¡Jawe ireskiaipanon mato, ja atikeskabiakinra jakon maton jato axonyamai,
jaskatira sinákanai, jakonkaya ati ikenbira maton ayamai!
8 Ibonra, wishtin tsamatabo aká iki,
jawen janebo Pléyadebo itan Oriónbo,
janra yamé ikenbi nete imai, itan
nete ikenbira yamé imai;
jan imaara aniparonkoniax
jene keyatax maiki mannai,
9 jainxon janra koshi xobobo yamatiakin ras akai,
itan jain iká koshi jonibora keyoai, jawen janera Ibo iki.
10 ¡Jawe ireskiaipanon mato,
ja atikeskabiakin jakon jaweki atin paranan ikaibora maton omisai,
itan jaskara iká oinxon ikon yoiaibaonra mato keenyamai!
11 Ja onitsapi joni jakonmakinra,
apo trigonin kopíanon ixon maton yokatai,
jaskara ikenra, makan xobobo akáxbi jain jakantima iki, itan
uva waibo axonbira uva xeati xeakantima iki.
12 Enra maton icha jakonma akábo onanke,
itan maton ochabo jain senenti yamaaribi en onanke:
atikeskabiakin jakon joni masá tenemaxonra maton kopí bia iki,
ja joni koshibo jain ikainxonra,
onitsapibaon kanannaketian maton jato amayamai.
13 Jakopíra jaskarabo ikenbi onan shinanya joni netéresai,
rama netebo jakonma iketian.
14 Jakon akanwe, jakonma ayamakanwe, jatianra mato jati iki;
jatianra maton yoiaibo ikon iti iki:
ja Ibo, jatíbi atipana Diossa mato betan iki.
15 ¡Jakonma omiskanwe! ¡Jakon noikanwe!
Jato joi benxoaxonkanainxon,
akonkin atikeskabiakin jakonhakin jato amakanwe;
maton jaskáaketianra jatíbi atipana Ibo, Diossen,
ja mawáyamai mato texea Israel jonibo matobira noibati iki.
16 Jatíbi atipana Ibo Diossenra neskara yoia iki:
“Jatíbi plazaainbora winikanti iki,
jatíbi callebotiibira chexakaati saí ikanti iki.
Onisi winitira waimeabo kenakanti iki,
ja winiti onanboribira kopí biti kopi, masá tenei winiti kenakanti iki.
17 Jato masá tenemai ea joketianra,
jatíbi uva wainkoniabo winikanti iki”, akin. Ikira Ibo ikai.
18 ¡Jawe ireskiaipanon matobo, ja Ibon jato
yoixonti nete nokótinin kikinni keenaibo!
¿Ja nete mato jaskara winótiki maton onanna?
Yamé ikaxa, jatian joé yamati iki.
19 Leónman aká jabati kakin oso bechia keskára iti iki,
jawen xobon jikiax chiketen
kepíketian ronon natexa keskára ikanti iki.
20 Ja netera, yamé ikax,
jatian joé yamati iki;
kikin jishtima yamé ikenbira,
jawe joébi yamati iki.
21 Ibonra yoia iki: Ea shinanni onantishamanni
fiesta akí mato tsinkitaira en omisai itan nokonara iresabires iki;
jatikaxbi mato ani tsinkitara nokon keenma iki.
22 Ea axonkin yoinabo jatiobi keyokin maton
menoaibaonra ea keenyamai,
ja berobo maton ea meniaibaonra ea keenyamai;
ja ebé raeti kopí waka bene xoabo
maton ea menoxonaibora en mato bixontima iki.
23 ¡Ea rabii mato bewai saa iki moa jenékanwe!
¡Ea rabikin maton arpa aká ikaibora en ninkakashamai!
24 Ikaxbira ja atikeskabiakin ati jakon onpax jokonai keská iti iki,
ja atikeskabiakin ati onpaxa jenéyamai.
25 “Mato israelitabó, ¿Maton rekenbo, ja
chosko chonka baritia kaman tsoa jonibi jain
jaama mananman nikanontianki, yoinabo ea
menoxonkana iki, jainxonki jawe jawékibo ea menikana iki?
26 Ramara, ja dios jisaakin matonbi aká iaxon maton boai, jara apo Sicut itan jawen wishtín Quiyún iki.
27 Jaskákin en mato potaara, mato yatanxon wetsa main, Damasco winobainbires mato bokanti iki”. Jaskarai Ibo, jatíbi atipana Diossiki jawen jane. Janra jaskara yoia iki.