4
Nato neskara ninkakanwe,Samaria kikin ainbobó,
matora Basán mainmea waka keska xoabo iki,
onitsapibora maton masá tenemai,
jaskáribiakinra wetsa jawékinin maxkatabo maton ramiaresai,
itan ja xeati pae mato bexonon ixonra,
maton benebo maton yonoai.
2 Ibo Diossenbira ja kikin jakon ixon, enra akonkin senenhati iki ixon yoia iki:
“Netebora beai jatian wetin wemexon mato bokanti,
jainxon maton bakebo mishkitinin
wemexon bokanti iki.
3 Matora joyotax chiké peken, pikámaxon,
Hermón mananman mato potakanti iki”.
Ibonra onantiakin yoia iki.
Profetanin israelitabo ikonkeskataitonin yoina
4 Ibonra yoia iki: “Betel, betan Gilgalhain; boax
¡Ochai bebon yoitimareskanwe!
Yamékiri maton ja meniti yoina botankanwe,
jainxon kimisha nete itinbo chonkankonia westíorabo bexontankanwe.
5 Jan soo imatioma aká pan irake akin menokanwe,
matonbi meniai jawékibo jatíbiain jato yoikanwe,
jaskáshamanaxa mato jakonshaman iki”.
Ibonra onantiakin yoia iki.
Ibon masá tenemaabi israelitabo shinanmeeyamaa
6 Ibonra yoia iki: “Enra mato jawékiatinin imaa iki
jatíbi maton jemankobo;
enra maton itinkobo mato pitin imaa iki,
¡Ikaxbira mato eki banéyamakana iki!” akin.
Ibonra onantiakin yoia iki.
7 Ibonra yoia iki: “Jainxonribira kimisha oxe maton banábo tsekaamatianbi
en matoki oi bemayamaa iki.
Westíora jeman oi bemaxonra wetsa jemanko en bemayamaa iki;
westíora wainko oi bemaxon
itan wetsanko en jene maxkaamara choshia iki;
8 Onpax benai jemabotiibi boxonbira jonibaon,
icha onpax merayamakana iki,
jaton nomi tantimati,
¡Ikaxbi mato eki banéyamaa iki!” akin.
Ibonra onantiakin yoia iki.
9 “Xana niwen mato rishkixonra jakonma isinbo en mato amaa iki,
maton waibo itan uva banabora en mato choshimaana iki,
maton higuerabo betan olivobora chanpon pia iki,
¡Ikaxbira mato eki banéyamaa iki!”
Ibonra onantiakin yoia iki.
10 “Egiptobo amani keskáribiakinra en matoki kikin jakonma jawéki raana iki;
enbira maton bakeranonbo ja reteanantiainko mawámaxon,
jainxon maton kabayobo maton rawibaon iboanon ixon en amaa iki;
ja sontárobo ikainxonra mawá pisi keyomis isin en mato xetemabi,
¡Mato eki banéyamaa iki!” akin.
Ibonra onantiakin yoia iki.
11 “Enra onsá jakonmanin mato,
Sodoma betan Gomorra aní keskaribiakin en mato keyoa iki;
chii tiritainkonia chii tsistó pikoa keskára mato iká iki,
¡Ikaxbi mato eki banéyamaa iki!” akin.
Ibonra onantiakin yoia iki.
12 Ibonra yoia iki: “Israel jonibo, ja kopí en matoribi jaskáati iki;
jatian en mato jaskaitianra,
¡Maton Dios betan nokoananti kopí mato benxokaati iki!”
13 Jaskara iken ninkakanwe: ja Ibonra, mananbo itan niwe jonia iki,
jan akai jawékibora jonibo onanmai,
ja joéra yamé imai,
jara kikin mai keyábotiibi niai,
ja riki, Ibo, jatíbi atipana Dios: jara jawen jane iki.