Profetanin tee
3
Israelitabó, Ibon Egiptonkonia pikoni jonibaon ninkakanwe:2 “Matobichoresa jatíbi nato mainmea
jonibo xaranmea en mato katota iki.
Jaskara iketianra jatíbi jakonma maton akábo,
ebetan maton benxoati iki”, iki ikai.
3 Ja rabébi potaananyamai niai riki, jaská rabébires jaton shinan iketian;
4 nii meranoax león keotai riki, moa yoina biax;
león bake kini meranoax keotai riki, moa jaweki biax;
5 ja isá yatanmeetai riki,
jain trampa iketian;
ja trampa mainmeaxbi, bochiki wex ikainaira, jawéki yatanax ikai;
6 Ja jemameax jonibo raketi saa ikai riki, jakonma keshai trompeta xoon iketian;
jeman jakonma jawéki winotaira, Ibon imaa ikai iki.
7 Jaskara jawékibo akai profetabo onanmaamatianbira jawetianbi. Ibon jawebi ayamai.
8 ¿Tsoaki itima iki, león keotaitian raketi saki iki?
¿Janbi iti yoia ikenki, tsoa Ibon janenko yoyo itima iki?
Samaria jema ras akana
9 Asdodhain iká jakon ani xobobo itan Egiptonko
iká jakon ani xobo ikainbo jato yoikanwe: “Samaria mananbo ikain tsinkíkanon;
oinkanwe jainra meskoákinbo jato jakonmakanai,
itan jato jaskátima ikenbi onsá akin jakonmakanara masá tenekanai”.
10 Ibonra onantiakin yoia iki:
“Jabaonra pontéres ati onanyamake;
onsáakin ratexon jato yometsoakanabora jaton
jakon ani xobonkobo benxoakanai”, akin.
11 Jaskara iketianra, Ibo Diossen yoia iki:
“Min rawíbaonra min mai káteti iki,
min koshi xobora poxakanti iki,
min jakon ani xobonkoniabora keyokin jawéki bokanti iki”, akin.
12 Ibonra yoia iki:
“Leónman carnero biketian jawen kexainoabi jamáti shinankin
ja koiranaiton rabé taeres, iamaxon pabíki rebo pakéx bixon boti keskátira,
ja Samariain jaa israelitabo
kenekaakanti iki,
Damascoainoax kikin metsá wacho rakatibaon rakatai, ikaxbira bokanti iki”, akin.
13 Jatíbi atipana Ibo Diossenra onantiakin yoia iki:
“Ninkakanwe, jakonma iti Israel jonibo yoikanwe,
14 Israel jonibo betan jaton ochabo en benxoai netenra,
jainxon yoina menoti Betelhain ikábo en ras ati iki;
jainxon jan yoina menoti machánbo en xatemaara maiki manti iki.
15 Enra jenetian jain iti itan baritian jain iti xobobo ras ati iki,
marfil xobobora keyokin en ras ati iki, jainxonra apo iká
kikin ani xobobo en poxati iki”. Ibonra onantiakin yoia iki.