Moab jonibo jaton akábo jato yoixonti
2
Ibonra yoia iki:“Moabhainoa jonibaonra ichabires jakonma ake,
jaskákinra yatanxon boxon moa mawáketian,
chiimapo itiakin
Edomhainoa apon xao menokana iki;
jaskara iketianra en jato masá tenemati iki.
2 Jaskara iketianra Moad mai en menoa,
ja chiikan Quiriothain iká,
jakon ani xobobo en keyokin menoti iki,
reteanani saa ikanai napora,
trompeta xoon ikaitian,
moabitabo mawáti iki.
Jaskara iketianra en jato masá tenemati iki;
3 ¡Jawen joniboibakea ja apo pikoxonra,
jawen iresama joni koshiboyabi en jato reteti iki!” akin.
Jaskara ikenra en jato masá tenemati iki.
Ikira Ibo iká iki.
Judá jonibo jaton akábo yoixonti
4 Ibonra yoia iki: “Judáinoa jonibaonra ichabires jakonma ake,
jaskatira Ibon,
jato axeatin keenyamakana iki,
ja nokon eséboki yoitimakinra,
jaton papabaon rabikatitai, jawékiboribi rabitinin keenkana iki;
jaskara iketianra en jato masá tenemati iki.
5 Jaskákinra en Judá menoa,
ja chiikan Jerusalénhainoa jakon ani xobobo
en keyokin menoti iki”. Ikira Ibo iká iki.
Israel jonibo jaton akábo yoixonti
6 Ibonra yoia iki:
“Israelhainoa jonibaonra ichabires jakonma ake,
jaskatira koríkinin kenni jakonma akáma jonibaon marokanai,
itan zapatonin keenira, onitsapi jonibaon marokanai,
jaskara ikenra en jato masá tenemati iki.
7 Masá tenemaxonra onitsapibo iresabires jato shinanmeemakanai,
ja iresabiresbora atikeskabiakin jato axonyamakanai.
Papanra jawen bake betanbi ja ainbobicho yoranai,
jaskáxonra jakonmabires nokon jakon jane ninkakaamake.
8 Ribinxon kopíai onanti inon ixon chopa menikana kakaax jan yakáxonra,
jatonbi aká dios rabikin pikanai;
atima ikenbi jato kopíamakana koríkinin pae maroxonra,
jaton ikonma diossen ani xobonkoxon xeakanai.
9 Enra, jaskara ikenbi mato jan winóti kopí,
konxán keska keyábo ikenbi,
jainoax roble jiwi keská koshibo ikenbi,
akonbireskin amorreobo en keyoa iki.
10 Jaskara ikenbira Egiptonkonia pikoxon,
amorreobaon mai meninoxon,
tsoa jonibi jain jaama mananman chosko chonka baritia en jato bea iki.
11 Jaskara iketianra mato israelitabo jaskarama riki iki iti atipanyamake,
jatíribibora profetabo iti en jato imaa iki,
jainoax wetsabora nokonabiribi ikax nazareobo en jato imaa iki”, akin.
Ibonra onantiakin yoia iki.
12 Ibonra yoia iki: “Ikaxbira nazareobo uva xeati xeamakin maton jato teaa iki,
jainxonra profetabo nokon janenko maton yoyo imayamaa iki.
13 Jaskara iketian ninkakanwe, trigo bochoya
carretanin mai pachoai keskáakinra,
en amaa maton taen
mai maton pachoti iki.
14 Ikonbiresi ishtoaxbira, mato jabátima iki;
ja bebon koshibobira, jawen koshi maxkáti iki,
jainoaxa bebon koshi shinanyabobi jabakaatima iki.
15 Ja pian tsakamisribira jawekeskataxbi jabátima iki,
ja ishto ikaxbi jainoax
ja kabáyonin jabataibobira jawekeskataxbi kenekaatima iki.
16 Ja netera, kikin reteananai koshi shinanya jonibaonbi,
jaton jan reteanantibo potabaini jabákanti iki”.
Ibonra onantiakin yoiai iki.