AMÓS
Israel jonibo, itan jato patax iká maibotiibi ikana joniboki, jan jato masá tenemati Diossen jatoki pakeai, Amóssen yoia
Carnerobo koirannai ikaxbi profeta jikia
1
Nato riki Tecoa jemamea carnerobo koirannai Amós, Israelbo yoikin Diossen yoia joi, Uzías, Judáin apo inontian, jainoax Jeroboamman, bake Joásbiribi Israelbaon apo inontian, rabé baritia niwanti maxkáketianra yoia iki.2 Sión mananmameax, Jerusalénhainoax,
Ibo yoyo iki tirin ikaitianra
mainmea xobibo siwatai,
jainoaxa Carmelo manan maxkatenmea xobibo choshiai.
Jato patax iká maibotiibi ikábo jakonma jato yoixonti
3 Ibonra yoia iki:
“Damascoainoabaonra ichabires jakonma ake,
jaskara
iketianra akonbireskin en jato masá tenemai; trigo xemeai
keskáakinra Galaadhainoa jonibo, yami xemetinin
jato xemekana iki.
4 Jakopíra apo Hazael jain iká xobo, itan apo
Ben-hadad jain iká xoboribi en keyokin menoti iki.
5 Damascoainoa xepótibora en koshixon kepenti iki; jainxonra
Bicat-avénhain iká apo, betan
Bet-edénhainoa iká apo en keyoti iki,
jatianra jatíbi sirio jonibo yatanxon kirhain bokanti iki”. Jaskarara Ibon yoia iki akin.
Gaza jonibo jaton akábo yoixonti
6 Ibonra yoia iki:
“Gaza jonibaonra ichabires jakonma ake,
akonbireskinra jato masá tenemakana iki;
westíora jemankonia yatanxon jatíbi jato boaxa,
yanka yonokanon ixon, Edom main jaton marokana iki.
Jaskara iketianra en jato masá tenemati iki.
7 Jaskákinra, Gaza jema katemai iká makan chiké en menoa,
ja chiikan jaton ani jakon xobobo keyokin menoti iki.
8 Asdodhainoa apo betan
Ascalónhainoa apora en jato keyoti iki.
¡Ecrón jakonmakinra jatíbi nokon koshiaxonbi en aka,
jatíbi filisteobo texeyamai mawati iki!” Jaskarara Ibon yoia iki.
Tiro jonibo jaton akábo yoixonti
9 Ibonra yoia iki:
“Tiro jonibaonra ichabires jakonma ake,
jaskara iketianra en jato masá tenemati iki,
jakopíra yanka yonokanon ixon, Edomhain ea jaton maroa iki,
jatíbi jemameabo betan jaton wetsa keska iti,
ja senenhakonti aká joi, ayamakanketian.
10 Jakopíra Tiro jema katemai iká makan chiké en menoa,
ja chiikan ani jakon xobobo keyokin menoti iki”, akin.
Edom jonibo jaton akábo yoixonti
11 Ibonra yoia iki:
“Edomhainoabaonra ichabires jakonma ake,
noibayamakinra, jaton wetsa israelitabo
retekaskin espada tsomáyaxon jato chibankana iki.
Kikinnira jatoki sinákana iki,
jaskati jatoki jakonmai jeneyamakana iketianra,
en jato masá tenemati iki.
12 Jakopíra Temán jema en menoti iki,
ja chiikanra Bosráinoa ani jakon xobobo keyokin menoti iki”, akin.
Amón jonibo jaton akábo jato yoixonti
13 Ibonra yoia iki:
“Amónhain ikábaonra ichabires jakonma ake,
jaton mai aniatin keenkinra,
Galaad mainmea tooya ainbobo kaxkexon,
jaton bake betanbi jato retekana iki;
jaskara ikenra en jato masá tenemati iki.
14 Jaskara iketianra Rabá jema makan chikébo en menoa,
chiikan jaton jakon ani xobobo keyokin en menonti iki.
En jaskara akai netera
reteanani koshin saí iki saa ikanti iki.
15 Jaskáketianra apo, itan jatíbi jawen iresama joni koshiboya,
yatanxon wetsanko jato bokanti iki”.
Ikira, Ibo iká iki.