Israelbo Iboki banénon ixon teakin Oseasnin yoia
14
¡Israelbó, maton Ibo Dioski banékanwe,maton ocha kopíra mato jakonmain paketa iki!
2 Maton Iboki banéxon, neskáakin orankanwe:
“Jatíbi non jakonmabo noa shinanxonyamawe,
itan mia jakon ixon non mia rabiaibo noa bixonwe.
3 Asiria jonibaonra noa xabakaamati atipanyamake,
kabáyonin kaxbira noa kenekatima iki.
Jawebira nonbi axon
‘miara non Dios iki’, akin moa non atima iki,
Ibó, minbichoresa
kachianabo noibai”, akin.
Israelbo bená jati nete meniti Ibon yoia
4 Ibora neskatai:
“Moa eki ramítimaakinra en jato benxoai;
atima keská ikenbira en jato noibai,
moara ea jatoki sináyamai.
5 Nibikan aká lirio xobibo joai keskáakinra,
Israel jonibo en jato jakonhati iki.
Líbano mananmamea jiwi tapón keská
koshira en jato imati iki;
6 olivo jiwi ponyanbo peata
keská metsára ikanti iki,
jainoaxa Líbanoainoa konxán keská inin ikanti iki.
7 Israel jonibo jakon janon ixon, jakiribi en jato koiranara,
trigo aniai keskati bebonkanti iki,
itan uva jiwi joax ikai keskatira jakonkanti iki,
jainoax Líbanoainoa uva xeati ikai keskatira jakon ninkakaakanti iki.
8 Israelitabora neskáti iki: ‘¿Nonbi ja rabiti aká
jawékibo moa jenetira jawemabi iki?’ iki.
¡Ea riki Ibo, nokon jonibo jan jato akinnai itan jato koirannai!
Pino jiwi jatíbitian pei paxan otaai
keskáakinra nokon jonibo en jakon jamati iki”.
Yoikin senenhaa
9 Onanbaon itan jakon akaibaonra,
nato joi onankanti iki:
Ibon yoiabora ponté iki,
atikeskabiakin jakon akaibaonra ja chibanai;
ikaxbi ja jakonmabaonra ja chibanyamakanai.