Israel jonibo jatíbinin jakonma winota
13
4 Ibora neskatai:“Ea riki Ibo Dios,
Egiptonko mato inontianbira, ea maton Ibo Dios iki:
Tsoabira yamake, eabicho riki maton Dios ixon onankanwe,
itan eabicho riki mato jan jamati.
5 Jain jawebi xoxoyamai mai xanankoniara en mato koirana iki.
6 Ikaxbi maton pitibo texeresnontianra,
maton jointi meran rabí shinan bochoa iki,
jatianra mato eon shinanbenota iki.
7 Jaskara iketianra, leónman akai keskáakin, itan
bain jonéxon ani inon akai keskáakin en mato ati iki.
8 Oso awinin jawen bakebo manóketian,
benai keskati mato akí pikóxonra,
maton jointi en beshéati iki.
Jainxonbira leónman piai keskáakin en mato keyoti iki; itan
onsá yoinanin akai keskáakinra, en mato beshéati iki.
9 Israel jonibó, en mato ramiayonaitianra, moa ayamanon ixon
tsonbi ea bechitetima iki.
10 Jaskara ikenki, ¿Rama maton apo jawerano iki,
jatíbi maton jemankoniabo jan mato xabaati?
¿Maton joni koshiboki jawerano iki,
ja apo inon ixon itan jabo joni koshi iti maton yokatabo?
11 Miki sináxonra,
en mia apobo menia iki, itan miki sináxonra en mia bichinpakeribia iki.
12 Israelitabaon jakonma, itan
jaton ochara moa onantiakin wishaa iki.
13 Israel jonibora ja poko meranoax bake jatian pikóti senena keská iki,
ikaxbira kikin onanma bake keská ikanai,
ja pikóti iketian,
bake jakoni rakáyamai keskára ikanai.
14 ¿Jaskara ikenki, icha kopíaxon mawáti ikenbi en mato imatima iki?
¿Jaskara ikenki mawá meranoabi kopíaxon en mato biribati iki?
¿Mawá, jan min jato reteai koshiki jawerano iki?
¿Mawá kinibó, jan min jato payoai jakonmaboki jawerano iki?
¡Nato jonibora moa en jato noibatima iki!” iki.
15 Israel jonibo, jawékinin bebonax, xobi joa keskashaman ikanainbira en jato ras ati iki,
bari pikotaiorikeax jain jawebi xoxoyamai mananmameax niwe koshi bexon,
ja jene jokonaibo moa bemayamaxon
tsosinmai keskáakinra en jato ati iki.
Jaton rawikanra, jakon kikin kopí jawékibo jato bichinti iki.
16 Jaton Dioski jakonmakana kopíra,
Samaria jonibaon masá teneti iki.
Reteanantiainoaxa mawákanti iki,
jaton bakebora, maiki jarás ikaintiakin potakanti iki,
jainxon ainbo tooyabora, kaxkekanti iki.