Jawen jonibo kopí Danielnin orana
9
“Dario, Asueronin bake, medo jonira, caldeobaon apo ixon jato ikinnai iká iki.2 Ja apo iká reken baritia iketianra, ea, Daniel, profeta Jeremíassen kirikanin yoiai onannoxon en yoyo aka iki, Jerusalén keyokin ras akanara kanchis chonka baritia kaman jaskarabi iti iki, ixon yoiai onankasai kopí, jaskara itira Ibonbi Jeremías moa yoia iká iki.
3 Jatianra Ibo yokákin en icha orana iki, ayunankinra jakonma xaxa chopa saweax ea chiimapon yakata iki.
4 Enra nokon Ibo Dios orana iki, jaki keshaira ea neskata iki: ‘Kikin itan koshi Ibo Diossé, jato axonti yoia ixonra jatíbitian min senenhai, jainxonra jan mia noiabo itan min esé senenhaibo, minribi jato noia min jato onanmai:
5 ochaxonra non jakonma ká iki; mia yamaa keskatira noa jaa iki; min esébo itan min koshi joibora non jenea iki.
6 Min yonoti profetabora non joi ninkáxonyamaa iki, jabaonra min janenko non apobo joi yoia iki, non koshibo itan non reken papabora yoikana iki, jainxonra jatíbi Israel jonibo yoikana iki.
7 Mia, Ibora, atikeskabiakin jakon akai iki, ikaxbi noa judá jonibo ja Jerusalénhain jaabo, ja wetsa israelitabo, ja ochóma jaabo itan ochó jaabo, ja miki yoitimaketian wetsa main min jato potaa jain jaabo betanbira, rama noa rabina ikanai.
8 Non Ibó, noabora, non apobo, non koshibo itan non reken papabo ikai keskáshamanribii miki ochaa ikax noa rabinkanai.
9 Ikaxbi, non Diossé, mia jaskábi ixonra min noa noibati iki, jaskara ixonra jakonmabo aká ikenbi min noa shinanxontima iki. Noara miki ochaa iki,
10 jaskákinra mia non ninkáyamaa iki, Ibo Diossé, min yonoti profetabo meranxon min noa esé meniabira yoitimabo noa iká iki.
11 Jatíbi Israel jonibora, min jato onamáa joibo ayamai yoitimakana iki, min ati yoiabora akáshamakana iki; jaskara kopíra noki jakonma paketa iki, min yonoti, Moiséssen esé wishá meran jaskara ati yoiaira min senenhaa iki, noa miki ochaa kopíra min aká iki.
12 Minra, noabo itan jan noa ikinna joni koshibo ramiati yoia ixon, kikinshaman jan masá teneti jakonma noki raana iki, jaskáaxonra ramiamisti onsá min yoia min senenhaa iki, Jerusalénki jan masá teneti paketa keskára nato neten jawetianbi ikáma iki.
13 Jatíbi nato jakonma noki beara, Moiséssen esé wishakan yoiai keská iká iki; jaskara ikenbira non mia benayamaa iki, non Ibo Diossé, non jakonma cheabora non janeyamakin, ja min ikon esé non chibanyamaa iki.
14 Jaskara ikenra, Ibó, noa masá tenemati shinanna ixon, nato jakonma min noki raana iki; jaskara ikenra mia Ibo itan non Diossen jatíbi akaibo atikeskabiakin jakonhakin min akaibo iki; ikaxbira non mia ninkákashamaa iki.
15 Non Ibo Diossé, min jonibo Egiptonkonia pikoxonra, min koshi min jato oinma iki, jaskáaxonra ja netebo inontian peoxon rama kamanbi min jane jakonshaman min ninkakamaa iki, ikaxbi ochaxonra non jakonma aká iki.
16 Ibó, nonra onanke miara noibamis iki. Nonra mia yokatai, moa Jerusalénki sinati jenéwe, ja kikinni mia sinata moa tantiwe, jara min jema iki, jara min jakon manan iki. Jatíbi ja patax iká maibora Jerusalénki itan min joniboki shirokanai, non ochakopi itan non reken papabaon ocha kopíra ikanai.
17 Non Diossé, nato min yonotinin mia yokákin orana minkáwe; Ibó, jatíbi jonibaonra mia riki ani iki ixon onankanti iki, mia rabiti xobo jakonma baneta iken noibawe.
18 Noa axonwe, nokon Diossé, ninkawe; non jema ras iká kikinhakin oinwe, ja jemara jainxon non mia rabiai iki, ras akana kikinhakin oinwe. Non mia yokataira noa jakonni jaa ixon jaki koshixon non akaima iki, mia kikinbires noibamis iketianres non akai riki.
19 ¡Ibó, Ibó! ¡Noa ninkáwe, non jakonma akábo noa shinanxonyamawe! ¡Noa axonwe, Ibó, noa akinwe! ¡Nokon Diossé, mia riki ani iki ixonra mia onankanti iki, min jema kopí, jainxon min jonibo kopí, mia rabiaibo iketian basiamakin noa akinwe!’ iki.
Kanchis chonka semana yoii iká
20 Enra orankin jeneyamakin, nokon ochabo keshana iki, nokon joni Israelbaon ocharibira ea keshaa iki, jainxonra Jerusalén kopíribi nokon Ibo Dios en yokata iki.
21 Orani ea iitaitianra, en namaa meran oinhantana ángel Gabriel noyakirani joax eki nokota iki, ja yantanpakera jatian Dios jawéki meniti moa nokotaishoko iká iki.
22 Jatianra ea yoia iki: ‘Daniel, ramara ea joke nato jawékibo min onannon ixon mia ninkámai.
23 Ja min orankin peonontianbira, Diossen ninkáxon mia akinti shinanna iki. Ja mia akinnai mia yoiira ea joke, Diossa kikinni mion keenai. Rama nato kikinhakin ninkáwe, ja namá jaskara yoii iká min onannon:
24 Kanchis chonka semanaparira winóti jake,
min joniboiba itan min jakon jemanko ja yoitimakana,
itan ochakanabo moa jainres senenti, jakonma aká
ikenbi jato shinanxontimara iti iki, jatianra
atikeskabiakin jakonhakin ati jatíbitian jati iki,
jaskataxa ja namá itan ja rama jaskara iti yoia senenti iki.
25 Natora min kikinhakin onanti jake:
Jerusalén jakiribi jakon inon ixon akanti,
jato yoiai kamanra kanchis semanapari winóti jake,
ja Diossen joni koshi imaa nokotai kamanra iti iki,
ja Jerusalén callebo, itan jawen makan chikébo
jakiribi akanara, kanchis chonka rabé
semanabichores iti iki,
ikaxbira ichabires masá teneti iti iki.
26 Sokota chonka rabé semana winota
pekáora, westíora apon jonibo joxon
ja Diossen iboa joni koshi retekanti iki.
Jerusalén betan ja Ibo rabiti xobora ras akanti iki.
Jenetia beai keskatira, basimabi jaskarabo jawen jain senentiain nokóti iki,
jain kamánres jaskara iti senentiain,
moabi shinanna senenai kamanra reteananti chibanresti iki,
jainxonra jatíbi ras abotankin chibanreskanti iki.
27 Westíora semana kaman bebonra,
ja apon kikínbires icha jonibo betan
ja senenhabekonti joi ati iki,
ikaxbi ja semana naponbekonra, yoina
Ibo menoxonti, itan jawéki meniti moa atimaakin xepoa iki.
Jatianra jainxon Ibo yoina menoxonti
ikainxon, jakonmabires onsá jawéki akanti iki,
jan jato jaskara jawéki amai joniki,
jan ras ati onsá jakonmabires jaki
paketai kamanra jaskara akanti iki’ ”.