Israelitabo jakiribi jaton mainko baneta
31
Ibora ikai neskati: “Ja Babiloniainoax moa jakiribi bekanketianra, jatíbi ja Israel jonibaon Dios ea inoxiki, jatianra jabo nokon jonibo iti iki”, iki.2 Ibonra yoiai: “Tsoa jonibi jain jayamainkoxonra
ja mawáyamaabo
akonkin en noia en jato oinmaa iki.
Israel jonibaon jain tantiti benakanaitianra,
3 jatoki pikoxon en jato yoia iki:
Jatíbitianbiresa en mato noia iki;
jaskákinra akonkin noikin en mato jeneyamai.
4 Israelbo, jakiribira maia en mato imai.
Jatianra shaka atiyabo raroshaman mato ransai joti iki.
5 Samaria mai mató ikainra jakiribi min uva banati iki, jatian jan uva banaabora, ja uva bimi
kokoi rarokanti iki.
6 Wetsa netenra Efraín mai matóbo ikainoax,
jato koirannai sontárobo saí
iti iki: ‘Neri bekanwe, Jerusalénhain non Ibo
Diossiba bononbokanwe’. Ikira saí ikanti iki”, ikira ikana iki.
7 Ibonra yoia iki:
“Jacobnin chiní bakebo kopí raroi itan benei
bewakanwe, jabora jatíbi maibotiibi ikábo bebonbires jakon jonibo iki.
Maton rabiai jato ninkámai, neskákanwe:
Itan yoikanwe: ‘Ja Israel jonibo texeabora, Ibon
jawen jonibo iketian jato jakonmainoa bia iki’, iki ikanwe.
8 Ninkakanwe enbira: Norteori mainkonia
jakiribi en jato beti iki,
nato netemeara kikin ochokeabobi en jato tsinkiti iki.
Benchebo, chantobo, ainbo tooyabo itan
baken benayabora jato betan joti iki;
¡Kikin icha jonira bekanti iki!
9 Ninkakanwe: Oranbetani, itan winibetanira bekanti iki.
Jene baitai taenkora en jato boti iki,
mai masenenbires iká bain, tatí itimatonra en jato boti iki.
Jaskara ikaxa ea israelitabaon papa iki, Efraínra nokon reken bake iki.
10 Maibotiibi ikábaon, nokon joi ninkakanwe,
itan aniparo kexabo ochó inonbi jato yoikanwe:
‘Ibonra Israelbo jato janbisaa iki,
ikaxbira pastornin jawen carnerobo
akai keskáakin tsinkixon, jato koiranti iki’, iki ikanwe.
11 Ibonra Jacobnin chiní bakebo kopíaxon jato jakiribi bia iki,
ja mainmea jato xewinna koshi joniboibakeara jato xabaa iki.
12 Jerusalénhain iká mai keyáin
beaxa raroi bewakanti iki,
jakon jawékibo Ibon jato menia akíra rarokanti iki:
trigo, uva xeati itan xeni, carnero itan
wakabora jato meniti iki.
Joa banábo onpax tachita ikai keskatira,
jatíbitian koshi ikanti iki.
13 Xontakobora raroshaman ransakanti iki,
bake ranonbo betan yosibora jaskáribikanti iki.
Enra jato jakon shinanmati iki:
winikanainbira en jato raromati iki,
jaton chexá winobainbiresa en jato raromati iki.
14 En amaara sacerdotebaon kikin jakon jawékiatibores pikanti iki,
icha jakon jawéki en meniara nokon jonibaon jakon shinankanti iki.
Ea, Ibonra onantiakin yoike”, ikira iká iki.
15 Ibonra yoia iki:
“Ramáin iká jonibaonra ninkatai,
jakonmabires shinanni winiaira tsoabira iki.
Raquel riki, jawen bakebo kopíra winiai,
jawen bakebo moa mawata iketianra,
masá shinanni tantikashamai”, akin.
16 Ikaxbira Ibon yoia iki:
“Moa winiyamawe, Raquel;
min beon moa potayamawe,
jaskara iken mia onisara kopía iti iki:
maton rawíbaon mainkoniaxa,
min bakebo moa beribakanti iki.
Ea, Ibonra onantiakin yoike.
17 Jakon jawékiain nokótininra mia manáti iki:
min bakebora jaton mainko jakiribi bekanti iki.
Ea, Ibonra onantiakin yoike.
18 Efraínhainoa jonibo jakonma tenei joiaira en ninkata iki:
‘Waka onón keska ikenbira min noa raea iki;
jakiribi noa miki yoiti imawe,
jaskara ikenra mia Ibo, non Dios iki.
19 Miibakeaxa noa ochota iki,
ikaxbira moa jaskáwetsatima non shinanke;
noa ochaara non onanke,
jaskákinra non kishi timai;
ja bakeranontian non ocha akátoninra,
noa rabinmai, itan namanbires noa imai.’
20 Efraín jonibora nokon noi bakebo iki;
kikinbiresi ea jaton keenai bakebo riki.
Jato notsinnax sináxonbira,
jato shinankin en jeneyamai;
akonkinra en jato noike,
akonbireskinra en jato noibai.
Ea, Ibonra onantiakin yoike.
21 Israel jonibó, ja oinxon onantibo bainko akanwe,
jatianra maton jakiribi nokoti atikon iti iki;
mato jan kaa bai kikinhakin oinkanwe.
¡Israel jonibó, maton jemankobo jakiribi bekanwe!
22 ¿Jawetian kamanki bake ainbo
manota keská, mato oken kawanbekonti iki?
Ea, Ibonra, nato neten westíora
bená jawéki en jonia iki:
ainbaonra joni benai”.
Jatíbinin bebona Israel ikí kati
23 Jatíbi atipana Israelnin Ibo Diossenra yoia iki: “Judáinoa jonibo jakonma iti ikenbi jakon ikantiakin en imaa, jaton mainko itan jaton jemankobo jakiribi ikax, neskati yoyo ikanti iki: ‘¡Nato jakon manan Ibon jakonhabanon, jainra atikeskabiakin jakon akí jaa jonibo iti iki!’ ikibo.
24 Judáinoa jonibo itan jain iká jemameabo, ja waín teetaibo itan jaton carnero koiranaibora jain jati iki.
25 Jaskara ikenra ja paxkinnabo, itan moa koshi keyotabo, icha piti itan icha xeati en jato meniti iki”.
26 Jaskataitianbira, oxá jishtenxon en oinnabaina iki. Jatian ja namata en shinanara iká iki jakonshaman.
27 Ibonra onantiakin yoia iki: “Ninkakanwe: Icha joni itan icha yoina Israelhain itan Judáin en imati nete nokóti iki.
28 Jatianra mexai, poxai, rerai, ras aki itan jato jakonma imai, ea iní keskáribii jakiribi apakeribai itan banai ea teeti iki. Ea, Ibonra onantiakin yoike.
29 Ja netebaonra jakiribi yoyo ikántima iki: ‘Papabaon uva pae kokoa iketianra, bakebo xeta beyákanai, iki ikantima iki’.
30 Jaweratonki uva pae kokoai jara xeta beyáti iki. Westíorabora jaton ocha kopibiribi mawáti iki”, ikira iká iki.
31 Ibonra onantiakin yoia iki: “Ninkakanwe: Ja bená jaskara senenhabekonti joi en ati Israel itan Judá betan shinanna netera nokóti iki.
32 Nato jaskara senenhabekonti joi ati en shinanna bená joira, maton reken papabo Egiptonkonia en jato pikonontian iní keská itima iki; jabaonra en ja senenhabekonti joi en yoia senenhayamakana iki, ea jaton ibo ikenbi. Ea, Ibonra onantiakin yoike.
33 Ja netebaonra Israel betan en ja senenhabekonti joi aká neskara iti iki: Nokon eséra jaton jointiain en ati iki, itan jaton shinan meranra en wishati iki. Ea jaton Dios ikenra, jabo nokon jonibo iti iki. Ea, Ibonra onantiakin yoike.
34 Jatianra jato betan raenanaibo, itan jaton rarebobo ea onankanon ixon, jato axeati yoii yoiananti moa maxkákantima iki, yosiboyabi bakebaonra, jatíxonbi ea onankanti iki. Jaton jakonmabora moa en jato shinanxontima iki, itan jaton ochabora en moa shinanwetsatima iki. Ea, Ibonra jaskara yoike”.
35 Ibonra jan neten tenati bari aká iki, jan yamé
tenati oxe itan wishtinbo aká, aniparo
bechon koshiai, itan xoo ikai aká iki,
jawen jane jatíbi atipana Ibonra yoia iki:
36 “Nato nete jan imati esébo en aká ikenbi iamaketianra, ja neten israelitabo moa
nokon jonibo itima iki.
Ea, Ibonra onantiakin yoike.
37 Wetsa netén ja nai toponti iketian, itan mai kikin chichó chinixon onanti iketianra,
jatíbi jakonma aká kopí
israelitabo ja neten moa nokonama
itiakin en jato potakeanke.
Ea, Ibonra onantiakin yoike”, akinra aká iki.
38 Ibonra onantiakin yoia iki: “Ninkakanwe: Wetsa netenra nokon jema jakiribi moa aká iti iki, Hananel torrenkoniax tsitsontiain iká xepóti kamanra iti iki.
39 Jain kaman senennara iti iki, pontékainax Gareb mai matóain kaman nokota, jainoaxa Goáori yoshokaina iti iki.
40 Jatíbi ja mai teshanpa, jain mawábo miinkanai itan jain chiimapo potakanai, itan ja Cedrón wean mananho iká jatíbi mai xabábo, ja bari pikotaiori iká, tsitsontiain iká Kabayobaon Xepóti ikain kaman, nokonabichobiribi iti aká iti iki, jatíbi jabora jawetianbi poxakana itan ras akana itima iki”.