2 neskáakin: “Ja nokon xobonko jikitiainko niwé, Judáin iká jemankoniaxbo nokon xobonko ea rabii beai jonibo, jatíbi ja yoiti en mia yoiabo jato yoiwe. Ja min yoitibo keyokin yoiwe.

3 Min yoia yoiti ixonra, jaton jakonma axébo jenekanti iki, jatianra jato ati shinanna ixonbi, jaton jakonma akaibo kopí jato masá tenemati en moa shinantima iki.

4 Ea, Ibon, yoiai jato yoiwe: ‘En yoia ea yoiti ixonyamakin itan jaskara ati en jato yoiabo senenhayamakinra,

5 nokon yonoti profetabaon jakon inon ixon eseabira yoitimakana iki, ichaakin en raankebira ninkáyamai mato jatoki yoitimata iki,

6 jaskara ikenra nato Ibo rabiti xobo Silóainoa aní keskaribiakin en ati iki. Jatíbi nato neten iká maibotiibi ikábaon ja oinxon onanti itira, jaki shirokanai nato jema en imati iki’ ”.

7 Ja Ibo rabiti xobonkoxon Jeremíasnin nato joibo yoiaitianra sacerdotebaon, profetabaon itan jatíbi jonibaon ninkata iki.

8 Jatianra Ibon ja yoiti joi yoikin jan senenhaketian, sacerdotebaon, profetabaon, jonibo betan yatanxon Jeremías yoikana iki: “¡Ramara mia mawatai! akin.

9 ¿Jawekeska shinanxon yoiiki mia ikai, Ibon janenkora en yoiai, nato Ibo rabiti xobora Silóainoa iní keskaribi iti iki, nato jema ras akanara jain jaa jonibo yamati iki, iki mia ikai?” Ikira ikana iki. Jatianra jatíbi jonibo Ibo rabiti xobonko, Jeremías kateax tsamákana iki.

10 Judáinoa joni koshibora, ja ikanai ninkatax, apo iká xobonkoniax Ibo rabiti xobonko bokana iki, boaxa jaskáakin masá tenemati yoii, bená xepóti ikain yakákana iki.

11 Jatianra sacerdotebo betan profetabaon, jatíbi joni koshibo itan jatíbi jonibo yoikana iki: “Nato jema yoii jakonmai yoyo ika kopíra nato joni mawáti jake. Matonbira maton pabíkininbi maton ninkáke”, ikira ikana iki.

12 Jeremíassa ja joni koshibo betan ja jonibo akí, neskata iki: “Ibo riki jan jawen janenko joi yoiti ea raana, nato Ibo rabiti xobo itan nato jema jakonma iti en yoiara, jatíbi ja en yoiaitian maton ninkata keská iki.

13 Maton ikábo itan maton jaskara akaibo jakonhakanwe, ja Ibo Dios yoiti ixonkanwe, jatianra jaskara jakonmabires jawékinin ati mato yoia moa matoki raantima iki.

14 Eara maton mekenman iki; jaskara ati maton oinna jakon iketian ea jaskara akanwe.

15 Ikaxbi, jaskara iketian; kikinhakin onankanwe: ea reteaxa, mato itan nato jeman jaa jonibo, jakonma akáma joni retea kopí maton masá teneti iti iki; jaskara ikenra ikon riki, onantishamanhakin jatíbi jawékibo mato yoiti ea raanara Ibo iki”, ikira iká iki.

16 Jatianra koshibo betan jonibaon, sacerdotebo betan profetabo yoia iki: “Jakopí nato joni non retetira yamake; non Ibo Diossen janenkora noa joi yoia iki”, ikira ikana iki.

17 Joni koshibaonra wenixon, ja jonibo jain tsinkitabo jato yoia iki:

19 ¿Jatian akiakana iki ja apo Ezequías, itan jatíbi Judáinoa jonibaon Miqueas retekin? Akama: Ja apora Iboki raketa iki, jaskákinra jato noibanon ixon yokata iki. Jatianra Ibon jakonmabires jawékinin jato ati yoia, jatoki moa raanyamaa iki. ¿Itan esé senenhayamakin anibires jakonma akanaki non iboati iki?” akin.

20 Quiriat-jearim, jemamea, Semaíassen bake, profeta Uríasninribira, Jeremíasnin aká keskaribiakin nato jema itan nato mai jakonmabires jawéki winóti Ibon janenko yoia iki.

21 Ja apo Joacim betan teetai joni koshibo itan jaton koshibaonra jan yoiai ninkákana iki, jatianra Urías reteti apon jato yoia iki. Ikaxbira ja ninkatax raketa iki, jatianra Egiptonko jabati kaa iki.

22 Apo Joacimmanra, Acbornin bake, Elnatán itan wetsa joniboribi, Egiptonko raana iki,

23 jabaonra Egiptonkonia Urías bexon apo Joacim menikana iki, jatianra retexon jawen yora jatíbi jawebiomabo jain jato akanai kininko ati jato yoia iki.

24 Ahicam, Safánman bakera Jeremíassen paranan ikí yoyo ika iki, jaskara kopíra retekanon ixon jonibo meniamakana iki.