Jakonhain nokótinin manáti
23
Ibonra onantiakin yoia iki:“¡Jawe ireskiai nokon carnerobo manómai itan janbismai pastorbo!” akin.
2 Ja Israelbaon Ibo Diossenra, jawen jonibo ikinnai pastorbo yoia iki: “Nokon jonibo, carnero keskábora maton janbismaa iki, matonra jabámaa iki, itan matonra koiranyamaa iki. Jaskara ikenra maton jakonma akábo kopí akonkin en mato masá tenemati iki. Ea, Ibonra onantiakin yoike.
3 Jain en jato jabáma mainkoniabora ja nokon joni texeabo enbi jato ikátiainko beti iki, enra jato tsinkixon, jakiribi jaton itinko bemati iki, jainxonra icha bakeakanti iki.
4 Jan jato koirantira pastorbo en imati iki, jawekibi rakéyamakanon ixon, westíorabi maxkátimaakin. Ea, Ibonra onantiakin yoike”, ikira iká iki.
5 Ibonra yoia iki:
Ninkakanwe: “David jawen kikin chiní bakeya
en imati netera jati iki, jaskáaxon jakon ati onan
shinanyaxon jato ikinnai apo, atikeskabiakin
jakonhakin itan pontéres ja main jato ikinnaira iti
iki.
6 Ja apo ixon jato ikinnaitianra,
Judá moa kishpinna iti iki,
itan Israelra jawebi rakéyamai jati iki.
Jawen janera neskara iti iki:
‘Ibo riki, noa jan jatoaresmai’ iki iká.
7 Ibonra onantiakin yoia iki: Nokóranoxiki netebo, akonkin senenhanox moa jonibo neskati yoyo itima: ‘Ja israelitabo Egiptonkonia jato pikoni Ibo jaatonin janenkora en yoiai’ iki iti.
8 Jaskáyamaira ja joi akonkin senenhati ikax mato iti iki: ‘Ja norteorikea mainmea, itan jatíbi maibotiibi jain janbiskanainkonia, jan ja Israelnin chiníbakebo pikoa Ibo jaatonin janenkora en yoiai’ ikires. Jatianra jaton mainbiribi jakanti iki”, akin jato aká iki.
Ikonma Profetabo yoii iká
9 Nato joira ikonma Profetabo iká iki:
Eara ikonbiresi shinan tsokasai,
jatíbi nokon yorara saki ikai,
eara paenna joni keska iki,
westiora joni paen cheata keská,
Ibo kopí itan jawen jakon joi kopíra ea jaskatai.
10 Ja mainra wanoyanixbi teamis jonibo bochoke,
ja jonibo riki jakonma akí ishtoaibo,
jaton koshiki koshixonra jaskara atimabo akanai.
Jaskara kopíra Ibon ja mai jakonma imaa iki,
itan tsoa jonibi jain jaama mananmamea pastobora barin menoa iki.
11 Ibonra onantiakin yoia iki:
“Profetabo itan sacerdotebobira jakon iti shinanhomabo iki;
nokon xobonkoxonbi jakonma akanaira en jato nokoke.
12 Jaskara ikaxa jaton bai yamé itan sibá keska iti iki,
en jato amaara ja akáskanai nokokanti iki, jaskatira paketai keská ikanti iki.
Jaton akábo yoixontitianra,
jan masá teneti jakonma en jatoki raanti iki.
Ea, Ibonra onantiakin yoike.
13 Samaria profetabora en oinke,
ea ramiakin yoikanai:
rama iti jawékira Baalnin janenko yoikanke,
jaskáxonra ja nokon Israel jonibo jato benómakanke.
14 Jakonmabires jawékibo Jerusalénhainoa profetabaon akaira en oinna iki:
Wanoyanixbi teamiskanai, paranmiskanai,
jawekeskaaxonbi jakonma akin jenetimara
jato shinanmakana iki.
Jabobi itan ja jemamea jonibora en oinna
Sodoma betan Gomorrainoabo iní keskáboribi iki.
15 Jaskara kopíra, ea jatíbi atipana Ibon,
profetabo mato ramiati en yoiai:
Kikinbires moka jawékira en jato pimai;
mawá raoya onpax akára en mato xeamai,
ja Jerusalénhainoa profetabaon
jakonma aketian, ja mainkoxon jatíbiainxon jakonma akana kopí”, ikira iká iki.
16 Jatíbi atipana Ibonra yoia iki:
“Israelitabó, profetabaon mato yoia
ikonhayamakanwe.
Jabaon yoiaira ikonma jansores iki,
jara jatonbi pikoa joibo iki,
jara en mato yoia joima iki.
17 Nokon joi iresabires
akaibora jato yoikanti iki:
‘Jatíbira mato jakon iti iki’.
Jatian yoitimati jenéyamakin jaton
shinanbi akaibora jato yoikanti iki:
‘Jawe jakonmabira mato winótima iki’ ”.
18 Ikaxbi, ¿Tsoaki ja Ibon joné tsinkitiainko
já betan iká iki?,
¿Tsonki oinna iki, iamaxon
tsonki jawen joi ninkata iki?,
¿Tsonki netékainxon ninkata iki?
19 Ninkakanwe, Ibo kikinni sinatara koshi niweaba keska iki,
jakonmabo akíra jato mananhon niweaba koshi keská iki.
20 Jan ati shinannabo akáxparira Ibo siná tantiti iki.
Jatian nato jawékibo shinanxon itan maton ninkátira nete nokóti iki.
21 “Ja profetabora en raanamabo iki,
jainoax jatora en jawebi yoyo akama iki,
jaskara ikaxbira nokon janenko yoyo iki ishtoshaman bokana iki.
22 Ebé ixon nokon joné jawekibo onanxonra,
nokon jonibo, ja en onanmaa joi yoikeankana iki;
jaton jakonma axébo itan jaton jakonma akaibora en jato jenemakeana iki”.
23 Ibonra onantiakin yoia iki:
“Ochó inonbi iamax ochóma inonbira ea Dios iki.
24 ¿Tsoaki ebebonmeax jonéti iki?
Nai itan mainkora ea jatíbiain iki.
Ea, Ibonra ikon yoike.
25 Ja profetabo nokon janenko jansoi yoyo ikaskanaira en ninkáke, jainoax namá meranbo ebetan yoyo ikaskanairibira en ninkáke.
26 ¿Jawetian kamanki ja profetabaon jatonbi shinanxon pikoa ikonma joibo yoikin jenekanai?
27 Jaton namábo yoiananxonra, nokon jonibo eon shinanbenomakaskanai, jaton rekenbo eon shinanbenoxon Baal dios rabikani keskáribiakinra jato imakaskanai.
28 ¡Profetanin namáxon jawen namá jato yoibanon, ikaxbi nokon joi bixon ja ninkata keskáshamanribi yoibanon! ¡Trigo xakára jawen bero keskáribi iki itima iki! Ea, Ibonra onantiakin yoike.
29 Nokon joi riki chii keska, itan jan shanka roroti martillo keská. Ea, Ibonra ikon yoike.
30 Jaskara kopíra en onantiakin yoiai, ja nokon join yometsoanani ikanai profetabokira ea jakonmaatai. Ea, Ibonra jaskara yoike.
31 Onantiakinra jatoki jakonmakin ja profetabo jatonbi shinanxon pikoa ixonbi en yoia joi keskáakin yoikanaira nokon keenma iki.
32 Enra onantiakin jatoki ramíkin yoiai, janso namára profetabaon yoiai; jaton janson itan jaton yoyo ikábaonra nokon jonibo jato benómakanai. Enra jato raanama iki, jaskara akantiboribira jawebi en jato yoiama iki, jaskara ikaxa ja nokon jonibo akinti onan shinanhoma ikanai. Ea, Ibonra onantiakin yoike”, akin.