Jeremías jawen jonibo kopí chexakaata
9
10 “Mananbaon kaax winitankanwe, itan ishi iitankanwe,pastonkobo kaax chexakaati onisi bewatankanwe,
moara menóke tsoabira jain winóyamai;
waka maan ikai ninkátibira moa yamake,
noyai yoinaboyabira siná yoinabo moa jabati bokanke.
11 Makan tsamata keská itiakinra en Jerusalén imai,
chacal yoinabo jain jonetai itiakin;
Judá jemabora jain jawebi yamatiakin en imai,
jatianra jain jonibo yamati iki”, ikira iká iki.
12 ¿Tsoarin ja kikin onan shinanya, neskara jawéki onanti? Tsoabira yamake. ¿Tsoaki Ibon onanma iki, neskara jawékibo noa jakonshamanhakin yoiti? Tsoabira akáma iki. ¿Jawekopíki nato mai moa ras aka, tsoabi jain winoti atipanyamaa, jain jawebi xoxoyamai manan choshi keská iki?
13 Jatianra Ibon yoia iki: “Jatíbi nato jawékibora winota iki, en onanma jawékibo israelitabaon jenekana kopí; eki yoitimakinra, ja en ati yoiabo atitianbi ayamakana iki.
14 Jaton shinan jakonmanin imaara, ikonma diosbo rabikana iki, jaton reken papabaon jato onanmaa keskákin.
15 Jakopíra ea jatíbi atipana Ibo, Israelbaon Dios ixon en yoike: Enra mato pimai kikinbires moka jawéki, itan mawáti raoya onpaxa en mato xeamai.
16 Matonbi itan maton papabaonbi onanama maibotiibira jatíribibo en mato janbismai; maton rawíbora en mato chibanmati iki, mato wetsa tsamára mato betan reteanankin mato keyokanti iki, westíorabi texeyamai kamanra mato akanti iki”, ikira iká iki.
Jerusalénhainoax onisi winiananbi yoyo ikana
17 Jatíbi atipana Ibonra yoia iki:
“¡Ninkakanwe! Onisi yoyo iananbi winiti
onanshaman ainbobo kenakanwe”, ikira iká iki.
18 ¡Ishton bebákanon, jatianra noa kopi onisi yoyo iananbi winikanti iki;
non beronkobo noa beon bochomaxonbakanon,
jatianra non bero kabichibo onisi winii beon meranbires iti iki!
19 Jerusalénhainoax chexakaati sion ikaira nokibi nokotai:
¡Jawe ireskiai, jawekeskatiki ras ikax jawebioma noa baneta!,
¡Jawekeskatiki rabinkin masá tenetiain noa nokota!
Non maira non jenebainti jake,
noa jain jatibora moa keyota iki.
20 Ibon joi, ninkakanwe ainbobó,
jawen joi yoiai netékainxon ninkakanwe.
Maton bake ainbobo jaskati winiti axeakanwe,
itan mato betan raenanaibora, onisi bewati maton axeati iki:
21 “Non xobobaonra mawá jikike,
non apobaon xobo ikainbora nokóke;
callemea bakebora jato reteke,
plazainoa bakeranonbora reteke.
22 Joni mawatabora tipibainke,
nii xabá ikain yoinabo poia keská, itan
ja baná tsekai joni pekáo trigo bimi maanna,
moa tsonbi biamai keská”.
Ea Ibonra jaskara yoike.
23 Ibonra yoia iki:
“Ja onan jonira jawen onanman rabítima iki,
ja koshi jonira jawen atipana koshin rabítima iki,
ja kopí jawéki ichayara jawékinin rabítima iki.
24 Ja rabítinin keenaibora,
ea onannaton rabíkanti iki,
itan ea riki Ibo ixon onannaton iti iki,
nato netenxonra noixon en akai, atikeskabiakin
itan pontéres, jaskarara nokon keen iki,
Ea, Ibonra onantiankin yoike”, ikira iká iki.