Bená Jerusalén peneta
60
Weníwe Jerusalén jonibó, miara penekan rapoa iki,min joéra nokóke, Ibon joékanra mia tenai.
2 Nato maira yamekan mapoa iki,
maibotiibi iká jonibora nai koin wison mapoa iki,
jaskara ikenbira Ibon joékan mia tenati iki,
itan jawen penekanra mia mapoti iki.
3 Maibotiibi iká jonibora ja joéori joti iki,
nete xabati penetai keská iketianra apobo jaki bekanti iki.
4 Bewakeexon, mia katemakin oinwe:
jatikaxbira tsinkitax miiba bekanai.
Min bakebora ochokeax bekanti iki;
min bake ainbobora ikóxon bekanti iki.
5 Ja bekanaitian oinnaxa
mia kikini raroti iki,
min shinanra raroshaman iti iki;
aniparo kexá iká jemankonia, itan maibotiibi iká
jonibaon kopí jawékibora
mia bexonkanti iki.
6 Madián itan Efánkonia icha joni
camellobaon peyakax beaira min jato ointi iki;
jatíbi Sabáinoabora,
oro betan incienso ininti papiabo bekanti iki,
bexonra Ibon ani jawéki aká kopí rabikanti iki.
7 Jatíbi Cedarhainoa carnerobora mina iti iki;
Nebaiotnin carnerobora jainxon atinkoxon
Ibo menikin min menoti iti iki,
ja min meniara jan keentishaman iti iki,
ja akátoninra jan jawen rabiti xobo
bebonbires metsaati iki.
8 ¿Ja nai koin ikai keskati noyaiboki tsoabo iki,
ja xotóbo jawen xoboshokonko boai
keskati boaiboki tsoabo iki?
9 Senenbires beai wapórobo riki,
Tarsissainoa wapóro rekenhaxa bekanai,
ochokeabi min bakebo beira ikanai,
jaton oroyabi itan jaton platayabira bekanai,
Ibo, Israelnin jakon Dios rabii beira ikanai,
janra mia kikin koshi imaa iki.
10 Wetsankonia jonibaonra min
makan chikébo jakiribi akanti iki,
jawen apobaonra mia jawéki axonkanti iki;
miki kikini sináxon Ibon mia masá tenemaa ixonbira,
rama jawen jakon shinanman mia noiba iki.
11 Min xepótibora jatíbitian kepenmeeta iti iki;
netén itan yamébira xepótima iki,
jatibiainoa kikin kopí
jawékibo mia bexonkanti kopí,
itan ja apobo jawen joniboya jikiti kopíra jaskara iti iki.
12 Jan mia jawéki axonyamai
jonibo jain iká maibora,
jatíbi jain jaaboyabiakin jato keyokanti iki.
13 Ibora Jerusalén jonibo yoii neskata iki:
“Líbanoainoa kikin kopí
jawékibora mia bexonkanti iki:
pino jiwibo, abeto jiwibo, cipres jiwibo,
ea rabiti xobo jabaon axon metsaatira iti iki,
jain nokon tae en akaira kikin jakon iti iki.
14 Mia masá tenemakatiaibaon
bakebora beax namanbires
shinanmeetax miibebon beokanti iki,
jatíbi jabaon mia iresabires
shinankatitaibora minaman chirankookanti iki,
jaskáxonra mia janekanti iki ‘Ibon jema, akin’,
‘Jerusalén Israelnin Jakon Diossena akin’.
15 Miara moa potakana itima iki,
omiskana itan miabichora moa mia itima iki,
jaskáyamaira en imaa jatíbitian rabikanai mia iti iki,
jaskara ikenra jatíbitianbires mia raroti iki.
16 Maibotiibi ikáinoa jonibaonra jaton
jakon kikin jawékiatibo mia menikanti iki,
jaton kikin kopí jawékibora,
apobaon mia bexonkanti iki;
jatianra ea Ibo riki mia jan
xabaai ixon min onanti iki,
ea riki jan Israel Koshia,
ja icha kopiaxon jakiribi mia bia.
17 Bronce meniamakinra, oro en mia meniti iki,
yami meniamakinra, plata en mia meniti iki,
jiwi meniamakinra, bronce en mia meniti iki,
makan meniamakinra, yami en mia meniti iki.
En imaara jawe iamai mia jakonshaman iti iki,
ponté shinanman mia jakon imabanon.
18 Min mainkora jato ramiakana sion
ikanai moa ninkáwetsatima iti iki,
jakiribira min mainko moa jan jawékibo ras axon keyoaibo yamati iki,
jaskáyamakinra min makan chikébo
‘Jan kishpinti’, akin, janekanti iki,
itan xepótibo ‘Rabiti’, akanti iki.
19 Netén jan mia joéntira barín mia maxkátima iki,
oxén yamé mia joéntininribira mia maxkátima iki,
jaskara ikenra ea, Ibo jatíbitian mia joénai iti iki;
ea, min Diossa, min pené iti iki.
20 Min barira jawetianbi yamétima iki,
min oxeribira nokatima iki,
jaskara ikenra ea, Ibo, jatíbitianbires min joé iti iki;
mia kachiankana onis netebora moa keyóti iki.
21 Jatíbi min jemameabora ikon jakon jonibo iti iki,
jatíbitianra jaton mai ibobo ikanti iki,
enbi banaa jiwi xoxo keskara ikanti iki,
nokon koshi jishtiakin jato oinmakin nokon
mekenmanbi en tee akára iti iki.
22 Nato tsamá kikin ichamashokora
warankabo kaiti iki;
nato kikinbires ichamashokora
kikinbires icha jonia mai iti iki.
Eara Ibo iki,
en imaa ikíra ishton,
jawen ititian iti iki”, ikira iká iki.