50
Ibora neskata iki:“¡Jonin jawen awin akai keskáakin, maton tita Israel, en moa potaa shinanyamakanwe,
iamax maton jato ribina iketian,
mato yanka yonokanon ikax
maton ea maroa shinanyamakanwe!
Ja maton maroara maton ochaa kopi iká iki;
mato kikin yoitima iketianra maton tita Israel moa en potaa iká iki.
2 ¿Jawekeskakinki, joxon en tsoabi nokoyamaa iki?
¿Jawekeskakinki, en kenaa tsonbi ea jen ayamabiresa iki?
¿Maton jisáki kopiaxon en mato biríbati atipanyamaa iká iki?
¿En mato xabaati jisámaki iká iki?
Westíoraakinres en yoiatonra aniparo tsosinti iki,
itan parobora jain jawebi xoxoyamai maibichores banéti iki,
yapabora nomin reteti iki,
jatianra onpax yamaketian
mawatax payókanti iki.
3 Naira en yamé mapomaa,
onískin wiso chopa sawekana keská iti iki”, ikira iká iki.
Ibon yonoti masá teneai meranbi jaki koshii jeneyamaa
4 Ibon yonotininra yoia iki:
“Paxkinnabo en jakon shinanmanon ixon,
jakon joibaon axon en jato koshi bimanon ixon.
Yamékiritiibira netékainxon jakonshamaanxon ninkatai ea imaa iki.
5 Ibonra jaskáaxon ati onan shinan ea menia iki,
eara keenyamai iamaira
ea yoiti iká iki.
6 Pekáki maton ea rishkiaitianra en mato amaresti iki,
itan nokon keni mexaitianra en mato amaresti iki.
Mato eki shiroaitian, itan maton ea toshbá
akaitianra ea oke bechitima iki.
7 Jan ea akinnaira Ibo iki:
jaskákinra eki shirokanaibi ea chexayamai;
jaskatira shanka keska ea jainbi iki,
eara rabintima iki ixonra en onanke.
8 Ja eonparana ikaira epatax iki:
¿Ja eki jakonmaiki tsoa iki?
¡Joi benxoati onan shinanya joniiba kanón kawe!
¿Tsonki en jakonma aká yoikasai ea akí jobanon?
9 Jan ea akinnaira Ibo iki;
¿Tsonki ea jakonmanin yointi iki?
jatíbi nokon rawíbora,
mansaman chopa piá ikai keskati keyóti iki”, ikira iká iki.