Ibon yonoti, maibotiibi iká jonibaon joé keska
49
Ea ninkakanwe, aniparo kexá ikábaon,ochokea maibotiibi ikábaon en yoiai netékainxon ninkakanwe:
Ibonra pikotamatianbi ea kenaa iki;
nokon titan poko meranbipari ikenbira ja nokon jane iti yoia iki.
2 Kensho espada keská koshira nokon joi imaa iki,
jawen mekenman panaxonra ea jonea iki,
pia kensho keskára ea imaa iki,
jain benxoati jawen xaká meran axon
pia ati keskáakinra ea koirana iki.
3 Neskáakinra ea yoia iki:
Israel miara nokon yonoti iki,
miibakeara ea koshi onankanti iki, akin.
4 Jatianra en shinanna iki:
“Yankabiresa teebo en ake,
jawe akinmabira nokon koshi en keyoa iki,
jakopi ati yamakenbira en aká iki”, ixon.
Ikon riki en akaira Ibon mekenman iki,
ja en biti jawékira nokon Diossen koshinko iki.
5 Nokon Ibo Diossenra jakonhakin ea oinna iki,
janra ea koshi menia iki.
Ibonra nokon titan poko meranoabi ea jonia iki,
jawen yonoti iti, jaskaaxon
ja Israel, Jacobnin jonibo, jakiribi
já betanbi jato imanoxon,
6 janra neskara yoia iki:
“Nokon yonoti mia itira, Israel jonibo jakiribi jato tsinkiti kopíbichoma iki, jainoax ja
Israel jonibo mawáinnoax texeabo,
jakiribi jato beti kopíresma iki;
maibotiibi iká jonibaon joé keskara en mia imati iki,
nato main kikin ochó inonbi, jaskatax kishpinmati joi min bonon ixon”, akinra aká iki.
7 Ja kopíaxon jato pikoai Ibo,
Israelnin Jakon Diossenra yoia iki,
ja akonbireskin noibatiakana jonibo,
ja wetsa mainmea jonibaon omisaibo,
koshi ixon akonbireskin inaaxon
jato yanka yonokanaibo;
“Jawetianki apobaon itan kikin
joni koshibaon mato oinkanai, jatianra
wenitax mato bebon beokanti iki,
ea Israelbaon Ibo, Jakon Diossenra mia katota iki,
jaskákinra ja ati yoiabo ixon en senenhati iki”, akinra aká iki.
Jakiribi Jerusalén jemaati yoia
8 Ibonra yoia iki:
“Nokon noibamisti shinan en mato
oinmati nete nokóketianra,
en mia ninkáxona iki;
mato kishpinti nete nokóketianra,
en mato akinna iki.
Enra mia koirana iki,
mii meranxon ja senenhabekonti joi jonibo betan anoxon.
Jaskáaxon jakiribi min jato jemaakinon ixon,
ja ramiayonkana mai iboakin maton biti kopí,
9 ja xepokanabo maton yoiti kopí:
‘Motara moa xabakaake’ akin,
jainxon ja yamé meran ikábo:
‘Neteori pikókanwe’, akin maton yoiti kopí.
Jatíbi bai pataxa maton pasto nokoti iki,
jaorano inonbira tsoa jonibi jain jaama manan ikainbo,
ja wakan jawékiatibo maton nokoti iki.
10 Matora pikástima iki, nin nomitimaribi iki,
bari betan xananra mato tsokas atima iki,
mato noia ixon, en mato ioai kopí,
ja jene jokonainkobora en mato boti iki.
11 Mananbo xaranbira en westiora bai kepenti iki,
bai xankenbora en bochoati iki”, akinra aká iki.
12 ¡Oinkanwe! Kikin ochokeaxbora bekanai:
Jatíribibora norteokeax joti iki,
wetsabora bari jikiaiokeax joti iki,
wetsabora Asuán mainmeax joti iki.
13 ¡Nai, benei saí iwe!
¡Mai, kikinni rarowe!
¡Mananbo, jakon shinanni saí ikanwe!
Ibonra jawen jonibo
jaton onis shinan tantimake,
masá tenekanaitianra jato noibake.
14 “Jerusalén jonibora neskata iki:
‘Ibonra moa noa jeneke iki,
non Ibo Diossa non shinanbenoke iki’.
15 Ikaxbi ¿Ikiai iki tita jawen baken shinanbenoti iamax akiai moa noikin jenekin?
Ja tita shinanbenokenbira,
ea shinanbenotima iki.
16 Matora nokon mekenhain
toxkótimaakin wishaa keskábo iki,
min chikébora jatíbitian en oinke.
17 Jakiribi jan mia jemaibora ishtobires bokanai,
ja mia jabaon ras akanabo bebonbires ishtora bokanai;
jabaon mia keyokin ras akabora moa bokanke.
18 Bewakeexon mia katemakin oinwe,
ointa jatíbira tsinkíkanai,
jaskataxa Jerusalénhain bekanai.
Ea Ibonra, jiria ixon akonkin en yoiai jatíbi
jatora pené kikin kopí jawékibo keská iti iki,
ja benoai ainbaon jan raoti keskára mato iti iki.
19 Min maira keyokin jakonmakana jawebiomabo iká iki,
ras akanara iká iki, maibichora iká iki;
ikaxbi ramara min jonibo jain iti,
ichaira ikax min mai maxkoshoko keská iti iki.
Jabaon mia ras akananibora moa ochó ikanai.
20 Moa manota min shinanai
bakebaonra pabíkiainxonbi mia yoiti iki:
‘Nato mai nona itira maxko iki,
jain jati noa axonwe’.
21 Jatianra min shinan meran mia iti iki:
‘¿Tson nato bakebo ea meniarin?
Eara bakeoma iká iki,
bakeatira en atipanyamaa iki;
wetsanko bokanara, ea ochó iká iki,
¿Tsonki jato ania iki?
Eabicho potakanara iká iki,
¿Jaweranoaxki bekana?’ ” iki.
22 Ibora neskata iki:
“Ninkakanwe, maibotiibi iká jonibora jaskara ati en jato yoiai;
jatian bekanti onantiakin en jato yoiara,
min bake benbobo betan,
min bake ainbobo ikóxon, itan iaxon bekanti iki.
23 Apobora maton onanpapabo iti iki,
apon bake ainbobora maton bakebo koirannai iti iki.
Main bekepinon kamanra mii bebon beokanti iki,
jainxonra min taenkonia maipoto taxokanti iki.
Jatianra ikon riki ea Ibo ixon min onanti iki,
jainoax eki koshiaibaonra ja bitin keenai bikanti iki”, ikira iká iki.
24 ¿Reteanankin jatoaresxon koshi
jonin bia jawékiki non ishtonbires bibainti atipanti iki?
¿Iamax westíora xepokaata joni akonbireskin jato
yonoai koshiibakeax jabati atipanti iki?
25 Ibonra yoia iki:
“Ja koshi jonin jawen rawíbo
jato bichinabora bichinribikanti atipanke,
jainoax joni koshi akonbireskin
yonomisnin biabora bichinkanti atipanke.
Mibé join ikaibora ebetan iti iki;
enbira min bakebo xabaati iki.
26 Jan mia masá tenemaibora teaxon
jaton namibi en jato pimati iki,
jainxonra pae amai keskáakin
jaton jiminbi en jato paenmati iki.
Jaskáxonra jatíbi jonibaon onanti iki”.
Ea riki, Ibo, mia jan xabaai,
ea riki, Jacobnin chiní bakebaon Kikin Koshi:
enra mato kopi kopiaxon jakiribi mato bia iki.