Japariax raroti
9
7 Ja min piai piti noeshaman piwe; ja min akai uva xeati xeai rarowe, jaskara min akábora Diossen keenshaman iki. Jaskara iketian ¡Areswe!8 Jatíbitian jakonhakin chopa sawéya iwé; jatíbitian maponko inintinin iwé.
9 Min noia awin betan jaax netetiibi rarowe, nato neten Diossen mia menia jatira iresa iki; nato netenxon min atira wetsa jawéki yamake, ja riki mia icha teeta pekáo jabetan mia rarotibichores.
10 Jatian jatíbi min atipana akin, koshixon awé; mawá kininko nokóxonra, jawebi min moa ayamai, jawebi min shinanyamai, jawebi min onanmayamai, jaskáaxon jakon ati onan shinanbobira yamake.
11 Nato netenra wetsa jawékiribi en oinna iki: ja ishto jonima riki, jan jato winoai, ja koshi shinanya jonima riki, reteanankin jan jatoaresai; ja shinan onan joniboma riki, jatíbitian pitia, ja ishtonbires jawéki onanti atipana joniboma riki, icha jawékia, jawékinin axea ikax onan joniboma riki, jakonhakin bikanai itan keenkanai; jatíbi jonibora jaskara winotaitianres itan jawen ititian ikaiton imaares ikai iki.
12 Jatian noa mawati kaira, jawetianbi non onanyamake: yapabo rikan wexetai keskati itan isábo trampain paketai keskatira joni, jawen shinanamainbi mawatai.