Jatíbi jawéki jawen ititian ikai
3
Nato netenra jatíbi jawéki jatian ikai jawen hora jake,jatíbi jawéki ikaira ja ititianbiribi ikai iki:
2 Jake jatian bake pikotai,
jainoax jake jatian mawáti.
Jake jatian banati,
jainoax jake jatian baná bimi tsekati.
3 Jake jatian reteti,
jainoax jake jatian raonti.
Jake jatian jawéki ras ati,
jainoax jake jatian ja ras aka weninti.
4 Jake jatian winiti,
jainoax jake jatian osanti.
Jake jatian oniskin saweti chopa,
jainoax jake jatian fiesta ati.
5 Jake jatian makan janbisati,
jainoax jake jatian makan tsinkiti.
Jake jatian ikokonanti,
jainoax jake jatian potaananti.
6 Jake jatian jatíbi jawéki biti,
jainoax jake jatian jatíbi jawékioma iti.
Jake jatian jawéki bixon benxoati,
jainoax jake jatian jawéki potati.
7 Jake jatian chopa waxati,
jainoax jake jatian chopa kexeti.
Jake jatian netéti,
jainoax jake jatian yoyo iti.
8 Jake jatian noimisti,
jainoax jake jatian omismisti.
Jake jatian reteananti,
jainoax jake jatian jawebi iamai jakonshamanres iti.
9 ¿Ikonbiresi teexonki jonin jawe jakon biai?
10 Enbi shinanxonra en onanna iki, jan namanbires shinanmeetira chorish tee Diossen joni menia iki.
11 Janra ja atitianshamanbiribi, jatíbi jawéki metsá aká iki; jaskáaxonra jawetianbi keyotima onannon ixon jonin shinan meran aká iki, Diossen moa aká jawéki itan rama ati jawéki onanti jawen shinan senenma ikenbira aká iki.
12 Enra onanke ja jaai kaman jonin jan raroti jatíbi jawéki atipana, ja riki, raroshaman jati, itan jakonshamanribi jati,
13 non piai itan non xeai, jainxon jakon jawékibo teexon binoxon non ináabora, Diossen menia kopíres non aká iki.
14 Jainxonribira en onanke jatíbi Diossen akábora jatíbitian jati iki ixon. Jawebi non tekitira yamake, jainxon jawebi non bichintira yamake.
15 Ramatian jaa jawékibora moabi jakátiaibo iki, ja rama iti jawékibora moabi jaa kopi jati iki. Diossen imaara winota jawéki inonbi jakiribi iribai.
Jakonma jawéki noa winotaibo
16 Enra oinribike nato neten jakonma akanai, itan atikeskabiakin atitianbi jakonma akanai, itan pontéres benxoatitianbi ayamakanai.
17 Jaskara ikenra en yoiai, ja ikon jakon akai joni itan jakonma aká jonira, Diossen jaton ikábo yoixonti iki, jatíbi jaskara ikanabo itan jatíbi jaskara akanabo.
18 Jainxonra en yoiribiai, jonibaon ikábora, Diossen onanmakasai noa jonibora yoina keskáboribi iki ixon, shinankanon ixon.
19 Ikon riki, jonibo itan yoinabora jaskarain nokoti kaai senenbires iki: Jonibo ikai keskatiribira yoinabo mawatai, jatíbi joniboyabi yoinabora joinnaitonin jake. Jawebira yamake jonin jan yoina xewina: jatíbira iresabires iki,
20 jatikaxbira jainbires bokanai; jatíbira jato mai poto aká iki, jaskatira jatikaxbi mai poto banékanti iki.
21 ¿Tsonki akonkin onanna jonin kayara nai bochiki kaai iki ixon, jainoax yoinanin kayara mai xaman kaai iki ixon?
22 En shinanara jawe jakonbi yamake, noa teetakayara jakon iki. Noa jonibora teeti noa raroai, jaskatibiribi noa iká riki, mawata pekáora jaskara ikaibo moa non ointi yamake.