Ja jonia jawékibaon Ibo rabiai
148
¡Ibo, rabinon akanwe!¡Naikanxonbi Ibo rabikanwe!
¡Kikin bochikixonbi Ibo rabikanwe!
2 ¡Mato, jatíbi jawen ángelbaon rabikanwe!
¡Mato, jatíbi jawen naikanmea sontárobaon rabikanwe!
3 ¡Bari betan oxénribi, rabikanwe!
¡Mato, penetai wishtínbaonribi rabikanwe!
4 ¡Mia, nai kikin keyakanribi rabiwe,
itan mato, nai pekaten iká jenebaonribi rabikanwe!
5 Ibon jane rabikanwe,
jan iti yoiara, jatíbi jawéki jonia iki;
6 janra jatíbitian jatíbi jainbiribi iti jawékibo aká iki,
itan tsonbi wetsa keskaatima esé menia iki.
7 ¡Mainxon Ibo rabikanwe,
ja aniparonkonia aniyoinabaon, itan ja aniparo kikin nemin ikábaon, rabikanwe!
8 ¡Ja kanakan, oixewakan, nibí itan wishnin koinman!
¡Ja niwe koshi jaskati yoiabo senenhawe!
9 ¡Ja manan keyábaon itan ja manan keyámabaon!
¡Jatíbi konxanbaon itan bimiai jiwibaon!
10 ¡Ja inaati yoinabaon itan ja inaatima yoinabaon!
¡Ja peia yoinabaon itan ja norex iki niai yoinabaon!
11 ¡Nato netemea apobaon, itan jatíbi jonibaon!
¡Nato netemea wetsa joni koshibaonribi!
12 ¡Benbobaon itan ainbobaon,
bake ranonbaon itan xontakobaon,
yosibaon itan yoxanbaon!
13 Jaskara iken:
¡Jatíxonbi Ibon jane rabikanwe,
jawen janebichoresa koshi iki!
¡Nai pekaten, itan mai pekatenra já jakon iki!
14 ¡Janra jawen jonibo koshi menia iki!
¡Jatíbi ja Israelhain iká, jawen senen jonibaonra rabiai,
jainoax ja patax iká jonibaon!
¡Ibo rabikanwe!