Jatíbi jonibaon Ibo rabibanon
145
Mia nokon Dios itan nokon apo ikenra, min koshi en jato yoiti iki,min janera jatíbitian en rabiti iki.
2 Netetiibira en mia rabiti iki;
jatíbitianra min jane en rabiti iki.
3 Ibora koshi iki, itan jaskara iketianra non rabiti iki;
jawen koshira non onanti bebon winobainbires iki.
4 Papabaon aká pekáora, jaton bakebaonribi
jawen tee akábo kopí Ibo rabikanti iki,
min akábora koshi iki ixonra yoikanti iki.
5 Miara apo koshi iki ixonra yoikanti iki,
itan enra min ratéti jawéki akábo yoiti iki.
6 Miara koshi iki ixonra yoikanti iki, itan jaki rakéti jawéki min akábora yoikanti iki,
jainxonra enribi min kikin jawékibo yoiti iki.
7 Min kikin jakon shinanra yoikanti iki,
itan saí iananra atikeskabiakin,
min jawéki jakonhakin akai yoikanti iki.
8 Ibora akonkin noibamis iki, itan onísamis iki,
jainoax manátia iki itan jatíbi noimis iki.
9 Ibora jatíbi betan jakon iki,
jawen aká jawékibora akonkin noibaxon koirannai.
10 ¡Ibó, jatíbi ja min jonia jawékibaon mia rabibakanon!
¡Ja min ati yoia senenhaibaon mia rabibanon!
11 ¡Mia koshi ixon jato ikinnara, kikin jakon iki ixon yoibakanon!
¡Ja min aká jawékibora koshi iki ixon yoibakanon!
12 ¡Min koshi jonibo onanmabakanon,
itan mia apo ixon min jato ikinna kikin jakon jato onanmabakanon!
13 Mia apo ixon jato ikinnara jatíbitian iki,
mia ibo ixon jato ikinnara pacha baritiabo inonbi ikaresti iti iki.
14 Ibonra paketaibo jato tewannai,
itan paketabo jato weninnai.
15 Jatíxonbira ja atitian min jato pimanon ixon,
mion manáxon mia oinkanke.
16 Jakon shinanyaxon min meken chopexonra,
ja jatíbi jiriabo min jato potóakin pimai.
17 Ibonra atikeskabiakin akai,
ja akaira jatíbi jakonhakin akai iki.
18 Ibora, jan rabiaibo patax iki,
ja akonkin senenhakin rabiaiboiba.
19 Janra, ja yoia keská ikaibaon yokata senenhai;
jawetianki akinnon ixon yokákanai, jatianra ninkáxon jato akinnai.
20 Ibonra, ja noiabo jato koirannai,
ikaxbi jakonmabora jato keyoai.
21 ¡Nokon kexakan en Ibo rabibanon!
¡Jatíxonbi jawen jakon jane rabibakannon,
rama itan jatíbitian!