Diossen jatíbi onanna
139
Ibó, eara min tanaxon kikinhakin onanke;2 minra jatíbi ea ikai onanke;
ochóxonbira nokon shinanbo min onanke.
3 Ea jain niaibora jatíbi min onanke,
¡Jatíbi en akaibora min onanke!
4 Ja en yoiti joi nokon jananko
yamaparikenbira, min onanke, Ibó.
5 Jatíbioxonra min ea kateke;
ea jakonhakinra min mekenman min ea tii aka iki.
6 Ja min onan shinanra ratétibires iki,
en onanti senenma riki;
¡Anibires iketianra en onanti senenma iki!
7 ¿Jawerano kaxmein min shinan ochó ea iti iki?
¿Jawerano jabati kaxonmein,
en mia ochóati iki?
8 Nai keyábo ikain ea kakenbira,
mia jain iki;
itan mai chichó ea kakenbira,
mia jainribi iki;
9 bari joaiori ea noyai kati iki,
iamax bari kaiori aniparo senenainko kaax, ea jain jati iki,
10 jain ikenbira min ea nokoribiti iki,
¡Min mekayaokea mekenman yatanxonra,
min ea jeneyamai!
11 Yamé meran jonéti en shinankenbi,
iamaxon ea jan tenaa joé en yaméakenbira,
12 mí bebonmea ja yamekan ea jonéti atipanyamake,
jatianra ja yamé kikin pené nete keskáshaman iti iki.
¡Ja yamé itan netera minna jaskábires iki!
13 Minra jatíbi nokon yora aká iki;
minra nokon titan chixanainoabi ea jonia iki.
14 Enra mia rabiai min jonia ratétibires iken;
jainoax ja min aká jawékibora ratétibires iki.
¡Jara kikin ikon iki ixonra en onanke!
15 Ja nokon yora joniax aniaira, mibebon jonéma iká iki,
ja ea joné ikainbi, itan
ja kikin mai chichokeax ea jonia ikenbi.
16 Nokon yora jaskatax joniaira min beronbi min oinna iki;
jatíbi jabora min kirika meran wishaa iká iki.
Ea yamakenbira, jatio basi ea
jati moa min onanna iká iki.
17 Nokon Diossé,
min shinanbora en oinna kikin ani iki;
¡Jabo jainbicho tsinkiara jain senena yamake!
18 Jabo en toponkasara, mashi winoa bebon icha iti iki;
itan toponkin keyoaxbira ea mibépari iti iki.
19 Nokon Diossé,
jakonma jonibo jato mawámawe,
itan ja retemis jonibo ea ochó imawe,
20 jabora miki jakonmai yoyo ika iki,
itan yankara mia akasi miki weníkanai.
21 Ibó,
¿Ja mia omisaiboki enribi jato omistima iki,
itan ja mion keenyamaiboki
en jato iresabires atima iki?
22 ¡Akonbireskinra nokon kayayaxonbi en jato omisai!
¡Jabora en jato rawíake!
23 Nokon Diossé,
kikinhakin nokon shinan onanwe;
ea tanaxon nokon shinanbo onanwe;
24 ea jakonmain kaaitian oinxon,
jatíbitian jati bain kanon ea pontewe.