Jerusalén rabii iká
122
¡Kikinshaman raro riki:“Ibo rabiti xobonko kanón kawe akin ea akana!”
2 ¡Jerusalén, moara noa ja min xepótibo chichó iki!
3 Jerusalén jemara, jain jonibo
tsinkiti aká iki.
4 Jainra Ibon jonibo bekanai,
jawen jane rabii,
jaskáati Israel jonibo yoini keskáakin.
5 Jainra ja atikeskabiakin jainxon jaton ikábo yoiti yakátibo iki,
ja yakátira apo David iká xobonko iki.
6 Yoikanwe maton shinanyaxonbi:
“Jerusalén jonibo jakonshaman jakanwe;
maton jema noiabo jakonbires jabákanon.
7 Ja chiké meranbo jawebi iamai jakonbires ibakanon;
jain onsá yamainko xobo meran jakon ibakanon”.
8 Jatian ramara, ja nokon wetsabo itan ja ebé raenanaibo kopí en yoiai:
“Jawebi iamai jakonbires ikanwe.
9 Ja non Ibo Diossen xobo noixonra,
enra mato jatíbi jakonbires imati iki”, akin.