Ibon jatíbitian jato noikin jeneyamai
107
Ibo iráke akanwe, jara jakon iki,jawen noimis shinanra jatíbitian iki.
2 Ja jaton rawikan mekenmamea,
Ibon jato xabaabaon jaskáakin yoikanwe,
3 ja chiponkia, itan reboki iká, jainoax
ja bari joaiorikea, itan ja bari kaiori iká jamamea jato tsinkiabaon,
jaskáakin yoikanwe.
4 Jain jawebi xoxoyamai mashi mainko manotara ikana iki,
ja westíora jeman jaai kati baira nokoyamakana iki;
5 piti betan xeatinin ikira,
¡Moa mawátiresa ikana iki!
6 Ikaxbira masá tenei Ibo yokati saí ikana iki,
jatianra masá tenetiainoa jan jato pikoa iki.
7 Japekáora jato jakon bain aká iki,
jain jati westíora jemanko katiori.
8 Jawen noimis shinan kopí Ibo iráke akanwe,
¡Ja jonibo akinna kopí iráke akanwe!
9 Janra ja nomiaibo nomi tantimai,
itan pikasaibora icha piti meniai.
10 Kikin yamé itan onis meran jakanara iká iki,
cadenanin axon presoakanabo,
11 Ibon ati yoiabo akáshamax,
itan koshi Diossen ati shinannabo omiskana kopí.
12 Diossenra jawen jonibo koshi teeain jato jikima iki;
tatí ikax pakékankebira, tsonbi jato akinyamaa iki.
13 Ikaxbi jaton masá teneai meranxonra Ibo saí akana iki,
jatianra masá tenetiainoa jan jato xabaa iki;
14 kikin yaméainoara jato pikoa iki,
itan cadenabora jato choroxona iki.
15 Noimis kopí Ibo iráke akanwe,
¡Jonibo akinna kopí iráke akanwe!
16 ¡Janra bronce xepóti beshea iki!
¡Janra yami toronbo beshea iki!
17 Jaton jakonma aká kopi, itan jaton ocha kopira,
isinkin itan chexakaakin,
18 jawebi piti atipanyamakana iki;
¡Moa mawatibira ikana iki!
19 Ikaxbi masá tenekin Ibo yokati saí ikanketianra,
ja masá tenetiainoa Diossen jato pikoa iki;
20 ja Dios yoyo ikátoninra, jato benxoa iki;
¡Jaskataxa mawáyamakana iki!
21 Noimis kopí Ibo iráke akanwe,
¡Jonibo akinna kopí iráke akanwe!
22 Iráke akin yoina menoxonkanwe,
itan jawen jawéki akábo kopí raroanan yoikanwe.
23 Aniparon boax,
jawékinin maroaibora ikana iki.
Jaton wapóroninbora inákana iki,
24 jatian ja aniparo napónxonra, oinkana iki,
Ibon jonia ratéti jawékibo.
25 Ja Ibon beti yoia niweaba koshi
beketianra, ani bechona iki;
26 naikanmanbi wakexonra,
aniparo neminhori jato boá iki;
¡Onsá oinnaxa jaton koshi shinan keyota iki!
27 Paennabo niai keskatira tayákana iki;
¡Jaton onan shinanbora jawemabi iká iki!
28 Ikaxbira masá tenekin Ibo saí akana iki,
jatianra masá tenetiainoa jan jato pikoa iki;
29 niweaba koshi ikenbira,
koshima payátiakin imaa iki.
Jatianra bechónbo tantia iki.
30 Moa bechon tantia oinnaxa rarokana iki,
jatianra jain bokaskanai repintiain Diossen jato boá iki.
31 Jawen noimis kopí Ibo iráke akanwe,
¡Jonibo akinnai kopí iráke akanwe!
32 ¡Tsinkíxon jawen jonibaon rabikanwe!
¡Tsinkítiainxon joni koshibaon rabikanwe!
33 Parobo itan jainoax jene jokonaibora,
jain jawebi xoxoyamai manan, itan mai manxan itiakin Ibon banémai;
34 jain jawéki xoxoai maira,
jawebi xoxotimaakin tashi mai banémai,
jain jaa jonibaon jakonma aká kopí;
35 jain jawebi xoxoyamai mananra ian banémai,
mai manxanbo ikainra jainoax jene jokonaibo imai;
36 jawékiatinin ikaibora jain jato jamai,
jatianra jabaon jain jemaakanai.
37 Waiaxonra jain banakanai, jain uva
banaxonra icha bimi tsekakanai.
38 Diossen jato jakonhakin shinanxonara jabo kaikanai,
itan jaton wakaboribira kaimaxonai.
39 Ikaxbi jaweti mawákanketianra,
ichama ikanti iki,
jakonmakin jato ramiakana,
rabintiain jato pakémakana,
itan jato chexakamakana,
40 jato ramiaibora Diossen omisai,
jaskákinra tsoa jonibi jain jaama manan ikáinbo jato benómai.
41 Janra jawebiomabo onisaibo jato pikoai;
¡Ja rarebobo kaimaara, carnerobo tsamata keská icha ikanai!
42 Jaskara oinnaxa jakon shinanya jonibo raroai,
jatianra jakonma jonibo jawebi yoyo iamakanai.
43 Ja ishton jawéki onanaitoninra,
nato jawéki shinanti iki,
Ibora noimis iki ixonra, onanti iki.