Diossen xobon keentishaman
84
¡Jatíbi atipana Ibó, min xobora,kikin metsá iki!
2 ¡Kayayanixbi keenshamanira,
min xobo jikiti xabá ikain ea ikasai!
¡Jatíbi jointianixbira,
jati neteya Dioski ea raroshaman bewai!
3 Ja chichíporo itan chononbira,
jain axon mia yoina menoxontinkobo jain jati nokoai,
jainra jaton bakebo naaxonkanai,
jatíbi atipana non Ibó,
nokon apó itan nokon Diossé.
4 ¡Ja mia rabiti xobónko jaabora raroshaman ikanai,
mia rabiira jenéyamakanai!
5 ¡Min jato akinti miibakea nokoabo, raroshaman ibakanon,
jabora min manan ikain kaman kakasaibo iki!
6 Masá tenekin beon potati mai teshanpain mato
winotaitianra, ja mai meranoax jokonai
jenebo jokonbotanti iki,
itan oi jeneribira ja jakonhai jain bochoti iki;
7 jaton koshira kaikaresti iki,
jatianra kikin koshi Dios Siónhain oinkanti iki.
8 Ibó, jatíbi atipana Diossé,
Jacobnin Diossé,
¡En orana ninkáwe!
9 Non jakon Diossé,
jan noa panáti min katota apo, jakonhakin oinwe.
10 ¡Westíora netetanibires min xobon ea
ikára jakon iti iki,
waranka nete wetsanko iká keskáma!
Jakonma jonibo ikainko jakashamaira,
nokon Dios rabiti xobo xepoti koiranai ea ikasai.
11 Jaskara kopíra, Ibo Diossen,
jaskati jati onanmaxon, noa koirannai;
jawe jakonmaninbi yointimabora,
Ibon noike itan jato jakon oinnai,
jakon jawékira jawebi jato washiamai.
12 Jatíbi atipana Ibó,
¡Miki kikinni koshiaibora raroshaman ikanti iki!