Jakon shinanyaxon noa oinwe
80
¡Ninkáwe! Israel jonibo koirannai,Josekan chiní bakebora carnerobo boai keskáakin min boai,
min yakátira ángel querubinbo mananhon iki.
¡Jakon shinanyaxon, ja Efraínman chiní bakebo, jainxon
2 Benjamínmana, itan Manaséssen chiní bakebo jato oinwe!
¡Ja min atipana koshin noa akinniwe!
3 Nokon Diossé,
¡Ja moa ikátiai keskáribi noa imawe!
¡Min nokiakin jakon shinanketianra noa xabakaati iki!
4 Ibó, jatíbi atipana Diossé,
¿Jawetian kamanki, jonibaon oranaiki sinati mia jenetai?
5 Jawékiai keskáakinra, ichabiresakin min noa onísmaa iki;
xeati xeai keskáakinra non beonbi min noa xeamaa iki.
6 Noo patax ikábo noki shirokantiresa min noa imaa iki,
jatianra non rawibaon noa osánresai.
7 Jatíbi atipana Diossé,
¡Ja moa ikátiai keskáribi noa imawe!
¡Min nokiakin jakon shinanketianra noa xabakaati iki!
8 Egiptonkoniara westíora uva jiwi min bea iki;
jatianra mia ikon Dios ikonhaisma jonibo potaxon, jain min banaa iki.
9 Ja atira min mai xabáa iki, jatianra
ja uva tapón kaixon, ja mai bochoa iki.
10 Jawen otanra manánbo mapoa iki, jatian
jawen poyanbaonra, ja ani jiwi bebon keyábo mapoa iki.
11 Aniparo kamanra jawen ponyanbo nokota iki,
jatian jawen xoxobora Éufrates paro kaman nokota iki.
12 ¿Jaweatiki jan chitea jawen chiké min ras aká,
ja bain winotaibaon uvabo tsekanon ixon?
13 Jononra beshéakin xateai;
¡Nii meranoa yoinabaonra pikin keyoai!
14 Jatíbi atipana Diossé, noara keenai, joríbawe;
naikanxonbi jakonhakin noa oinwe,
nato uva jiwi min koiranwe,
15 ja uva jiwira minbi banaa iki,
ja xoxora taxketimaakin minbi aká iki.
16 Jan xateaibo itan menoaibo,
min kikin sinakan jato keyowe;
17 ikaxbi ja min katota joni akinwe,
nato joni ja jiwi xoxo keskára, minbi taxkétimaakin aká iki,
18 jatianra jawetianbi miibakeax noa ochóyamaa iki.
¡Noa jati meniwe,
jatianra noa akinnon ixon miabicho non yokáti iki!
19 Non Ibó, jatíbi atipana Diossé,
¡Ja moa noa ikátiai keskáribi noa imawe!
¡Min nokiakin jakon shinanketianra noa xabakaati iki!