Apo kopí orana
72
Diossé, min atikeskabiakinakai ixon, itan ponté ixon, mia keskábi iti ja apo meniwe,
2 abanon pontéshaman itan atikeskabiakin min
jonibo itan ja jawebiomabo jato ikinkin.
3 Ja keyá mananbo, itan keyámatani mananbaon
jaa jonibo jakonbires jabakanon, itan
pontéshaman ibakanon.
4 ¡Atikeskabiakin, apon ja jawebiomabo jato axonbanon!
¡Ja jawékinin maxkatabaon bakebo jato akinbanon,
itan Ibon masá tenemabanon, teemakinbi jato kikinhakin ramiaibo!
5 ¡Ja bari itan oxe japariketian jatíbitian,
apo mion ratébanon!
6 ¡Ibanon oi itan nibikan
mai itan pastobo mechaai keská!
7 ¡Ja apo ixon jato ikinnai netebora,
já itan min jonibo kikin pontéshamanres, itan jawe
iamai jati iki, oxe moa yamai kamanra iti iki!
8 ¡Aniparonkoxon wetsa aniparo kaman, ja koshi ixon iboabanon,
Éufrates paronkoxon nete pasenenain kaman iboabanon!
9 ¡Jawen rawibo, jain tsoa jonibi jayamainko jaabo,
moa jatoareskana já bebonmeax jawemabi
shinanmeebakanon!
10 ¡Ja Tarsissainoa apo, ja nasinkoniabaon apobo,
ja Sabáinoa apo, itan ja Sebáinoa apo,
ja meniresti jawékibo itan jan apo kopiati koríkibo bebákanon!
11 ¡Jatíbi apobo já bebon chirankobakanon!
¡Jatíbiainoa maibotiibi ikábaon jawen tee axonbakanon!
12 Janra ja jawebioma jonin yokata akinti iki,
itan jawékinin maxkataribira, tsonbi
akinti yamaketian akinti iki.
13 Ja jawemabi shinanmeeti rabíyamaibora jato noibati iki,
itan jawebiomabora jaanon ixon jato akinti iki.
14 Jaton jati kikinbires kopí iketianra,
jato ramiakanaitian, itan onsaaxonbo jato
rakeakanaitian jato xabaati iki.
15 ¡Apo jabánon!
¡Sabáinoa oro menibakanon!
¡Jatíbitian já kopí Dios yokábakanon!
¡Jatíbitian jakonbires ibanon!
16 ¡Ja main icha trigo jabánon
itan manan maxkatenbo ikonbiresi kaibanon!
¡Líbano jiwi ikai keskati bimi xoxobanon,
itan icha texkanbo jabánon,
ja xabá ikain xobi ikai keskati!
17 ¡Jatíbitian apon jane jabánon;
jatíbitian bari ikaitio basiribi jawen iká koshi ninkakaabanon!
¡Jatíbi nato netemea maibotiibi ikábaon, jakon
jawékibo jan menia bibakanon!
¡Jatíbi maibotiibi ikábaon, raro joni akin janebakanon!
18 Dios jakon ibanon, Ibo itan Israelbaon Dios,
jabichora ani jawékibo akai iki;
19 jatibitianbires jawen jakon
jane rabikabanon.
¡Jatíbi main jawen koshi shinan bochobanon!
¡Jaskara ibanon!
20 Nenora keyotai Isaíkan bake, Davidkan oranabo.