Masá tenei saí ika
69
Ea akinwe nokon Diossé,eara moa jenen reteibishoko iki;
2 eara moa nakó neminhain miimeetai,
en jain jamátira yamake.
Eara moa jene kikin neminhain nokóke,
itan baikanra ea tarannai.
3 Eara moa sai iibichoi teshanyonke;
nokon tetonmanra ea, ayorakin chexai;
¡Nokon Dios manaira ea moa bepaxkinke!
4 Jawekopímabi ea omisaibora nokon
mapónkonia boo bebonbires icha iki;
nokon rawíbora kaike,
yankabiresa ea retekaskanai,
jatianra ea yometsoama jawéki
banemakaskin ea teakanai.
5 Nokon Diossé, ea kikinbires onanma ikára min onanke;
min onanyamanon ixonra, nokon ochabo
en joneti atipanyamake.
6 Ibó, jatíbi atipana Diossé,
¡En jakonma aká kopi, ja miki ikoni koshiaibo, rabintibres jato imayamawe!
Israelbaon Diossé,
¡Akonkin mia noiabo, ea kopi jato noibatimayamawe!
7 Mia kopíra join ramiakanabi en tenea iki;
ichabires rabinra en tenea iki;
8 ¡Nokon kikin wetsabaonara,
ea wetsankonia keská
itan tson onannama keská iki!
9 Min xobo washitira ea menotai keská iki,
mia kopíra join ramiakana en tenea iki.
10 Ea winiaitian, itan en ayunanaitianra,
eki shirokana iki;
11 oniskin ati chopa en saweketianra,
jatixonbi ea osankanai, itan eki shirokanai.
12 Ea yoiaibobiresa ikanai,
paennaibora eki jakonmai bewakanai.
13 Ikaxbi enra, mia yokatai, Ibó.
¡Nokon Diossé, Rama ea akinwe!
Mia anibires noimis ixon, ¡Ea jen awe!
Mia jeneyamakin akinmis ixon ¡Ea tsekawe!
14 ¡Mano meran ea miimemayamawe!
¡Omiskanaibi ea akinwe,
itan ja jene neminhainoa ea biwé!
15 ¡Baí koshi ea taranmayamawe!
¡Neminhain saman mayatai ea xeamayamawe,
eara maponake!
16 Ibó, ea jen awe;
¡Miara jakon iki, itan ea noixonra min akonkin senenhai!
Mia anibires noibamisti shinanya ixon, ea jakonhakin oinwe;
17 ¡Nato ea min yonoti omisshamawe!
¡Ishtontani ea akinwe, eara onsá meran iki!
18 Epatax joxon, ea biwé;
¡Nokon rawíboibakea ea xabaawe!
19 Minra onanke ea ramiakana,
ea rabinhakana, itan ea jakonmanin yoinkana en masá teneabo;
minra onanke tsoaboki nokon rawí iki ixon.
20 Ea ramiakanatonra ea chexaa iki;
¡Nokon koshi shinanra moa yamake,
itan nokon koshira moa keyóke!
Yankabiresa en benáa iki,
tsonki onísaxon, ea shinan tantimati iki ixon.
21 Nokon pitinkora ea mawá rao axonkana iki,
itan ea nomiaitianra moka jene ea menikana iki.
22 ¡Ibanon ja raenankin pitiakanabo,
jatobi jan ramíti trampa baneti!
23 ¡Jato benche banémawe,
ibakanon jatíbitian jaton kishibo saki iki!
24 Min siná jatoki potawe;
¡Min kikin sinakan, chiikan akai keskáakin jato nokobanon!
25 Jain ikana jaton peota, tsoa jonibi jain jaama iti banébanon,
itan tsoabi jaton xobobaon jayamabanon;
26 ja min masá tenema jonira, ramianoxon chibankanai,
ja min xatea chexakaataitianra jaki shirokanai.
27 Jakonma akanketian, jaribi jato banexonwe;
¡Jatora en shinanxonyamai iki ixon, jato oinresshamawe!
28 ¡Jati kirikainoa jato soawe!
¡Atikeskabiakin akai jonibo ikainko, jaton jane wishayamawe!
29 Ikaxbi ea, moa isinai itan masá teneai iketian,
ea weninwe, itan ea akinwe nokon Diossé.
30 Diossen janera en bewakan rabiti iki;
irake ayananra en rabiti iki,
31 jatianra Ibo kikin raroshaman banéti iki,
ja waka bene iamax waka bake bene moa
machanya, itan mentsisya menikin
menoxona bebonbiresa iti iki.
32 Jaskara oinnaxa ja masá teneaibo rarokanti iki,
jatianra ja Dios noiabaon koshi shinanti iki;
33 ja Ibonra jawebiomabo jato ninkáxonai,
itan jawen jonibo presoakana akinkinra jato omisshamai.
34 ¡Nai, mai itan aniparobo, Ibo rabikanwe,
itan jatíbi jain jaabaonribi akanwe!
35 Diossenra Jerusalén akinti iki,
itan jakiribira Judá jemabo benaakin aríbati iki.
Jainra jakanti iki, itan jara iboakin bikanti iki;
36 Min yonotibaon bakebaonra jaton papabaona jema tekikin bikanti iki;
¡Já noiabo, itan jawen jane rabiaibora jain jakanti iki!