Dios riki, joni jakonshaman shinanmai
63
¡Nokon Diossé, miara nokon Dios iki!Ikonbiresi mion keenkinra en mia benai, mionra ea nomiai;
nokon shinan, kaya itan yorayanixbira ea mion keenai,
mai manxan onpaxhoma jan jiwétioma keská ikaxa, mion ea keenai.
2 ¡Min xobonkoniara en mia oinkasai,
jatianra min koshi itan mia ani en ointi iki,
3 jaskara ikaxa mia noibamisa non jati nete winoa bebonbires kopí iki!
Nokon kexakanra en mia rabiti iki;
4 ea jaai kamanra jatíbitian en mia rabiti iki,
miki meken sananxonra en oranti iki.
5 Eara raroshaman iti iki,
icha noeshaman jawékiati tsinkíxon
pia keskára ea iti iki,
jatianra raroanan nokon kexakan en mia rabiti iki.
6 Yamébo, oxai ea rakákenra nokon shinan
meran mia iká iki, jatianra en mia shinanna iki;
7 jaskara ikenra jan ea akinnai mia iki.
¡Min koiranara ea raroshaman iki!
8 Jatibi nokon jatira miki mepia iki;
min mekayao mekenmanra ea min jeneyamai.
9 Jan ea retekasaibora,
mawá kini chichó pakéti iki,
10 ¡Reteanantiainoaxa mawákanti iki,
jatianra pimis yoinabaon keyokin jato piti iki!
11 Ikaxbi apora, Dioski raroti iki;
jatíbi ikon riki ixon yoiaibora já rabii bewakanti iki,
ikaxbi jansoaibora mawákanti iki.