Ea noibawe, Diossé
51
Mia noimis ixon, ea noibawe nokon Diossé;mia kikinbires jakonhamis ixon, en jakonma akábo ea soaxonwe.
2 ¡Nokon jakonma ea chokaxonwe!
¡Nokon ocha ea soaxonwe!
3 Enra onanke ea yoitimaara ikon iki;
nokon shinan meranoaxa nokon ocha soakaayamai.
4 Mikira ea ochaa iki,
mikibichoresa ea ochaa iki,
ja jakonma aketian min masá tenematira en aká iki.
Jaskara ikenra noa jakonmaati min yoia, itinkobi iki,
ja min jaskara iti yoiara tsoabi jaskarama riki iti yamake.
5 Jara ikon iki, ja pikónontianbira ea jakonma iki;
nokon titan chixanainoaxbira ea ochares iki.
6 Ikon riki, minra ja ikoni yoyo ikai joni noike,
itan chichó kamanbira onan shinan min ea menia iki.
7 Hisopo pein ea soawe,
jatianra ea kerásma iti iki;
ea chokawe,
jatianra waxmen xewinna joxo ea iti iki.
8 Ea kikinhakin raromawe itan benemawe;
benaakin ea raromawe, ea sekeyona ixonbi,
9 Nokon ochabo moa oinyamawe,
jainxon jatíbi nokon jakonmabo potawe.
10 Nokon Diossé ¡Nokon jointi kerásma imawe!
¡Bená, itan senen shinan ea meniwe!
11 Mii bebonmea ea ochóayamawe,
min jakon shinanribi ea bichinyamawe.
12 Xabaaxon ea jakiribi benaakin raromawe;
ja min akinmisti shinanman ea tewanwe,
13 yoitimabo miki yoiti iti en jato onanmanon ixon,
jatianra ocharesbo miki yoiti ikanti iki.
14 Nokon Diossé, ea jan akinnai Dios,
ea retemis imayamawe,
jatianra bewá meranxon mia riki atikeskabiakin akai ixon en jato onanmati iki.
15 Ibó, nokon kexá ea chopexonwe,
jatianra nokon kexakan bewakin en mia rabiti iki.
16 Miara keenyamai jawéki mia menitinin,
itan yoina keyokin menoxontin;
jabora en mia menikeanke, ikaxbira min keenma iki.
17 Ja shinan ramitax noa chexakataikaya riki Dios meniti,
¡Jakonma akax ikoni shinanmeetaibora,
min omisyamai Diossé!
18 Min akinmisti shinanman Jerusalén jakonhawe;
ja Jerusalén chikébo jakiribi weninwe.
19 Jatianra mia keena keská yoina
menoxonkanabo min biti iki,
ja mia menikana jawékibo itan yoina
keyokin mia menoxonkanabora iti iki;
jatianra jainxon mia yoina menoxontinko
perakanxon waka bene ranonbo mia menikanti iki.