Diossen akintinin ea manata
42
Chaxon nomikin onpax benai keskáakinra,en mia benai, nokon Diossé.
2 Eara Diossen nomiai, jati neteya Dioski.
¿Jawetianmein ea jakiribi Dios bebon iti iki?
3 Jatíbitian nokon jawékiatira nokon beon iki,
nokon rawíbaonra ea yokákin jeneyamai:
“¿Min Dioski jawerano iki?” akin.
4 Ja jawékibo shinannax,
masá tenei ea chexakataira jishtibiresakin en jato oinmai.
Enra shinannai jaskara iká ja jonibo betan,
Dios rabiti xobonko jato bebon ea kanontian
raroi saí iananbi, irake aki saa ikanai meranbires ea kaa.
¡Jatianra ani fiesta iká iki!
5 ¿Jawekopíki ea shinan namanti iki?
¿Jawekopíki masá tenei jaakinres shinanni ea iiti iki?
Diossenra ea manata iki,
jara en rabiborespariai.
¡Jara nokon Dios iki, itan janra ea akinnai!
6 Eara ikonbiresi nokon shinan namánke.
Jakopíra en mia akonbireskin shinannai,
Jordán paro mai senenainxonbi,
Hermón manan, itan Misar
manainxonbira en mia shinannai.
7 Ketó keyáinoax jene maanni
riri ikaira tirin ikai keska ninkátibires iki;
ja bai koshi min raanara
emanaon winota iki.
8 Neténra ea oinmai Ibon jatíbitian ea noia,
jatianra ea jati neteya Dioski yamé bewai itan orankin en jeneyamai.
9 Eon paranan ikai, Diossa en yoiai:
“¿Jaweakiki mia eon shinanbenota?
¿Jawekopíki ea onis iti iki,
nokon rawíbaon ea ramiaresa?” akin.
10 Nokon rawibaon ea ramia kopíra,
xaobaonbi ea chexaa iki,
eara yokákin jeneyamakanai:
“¿Min Dioski jawerano iki?” akin.
11 ¿Jawekopíki ea shinan namánti iki?
¿Jawekopíki masá tenei jaakinres shinanni ea iiti iki?
Diossenra ea manata iki,
Jara en rabiborespariai.
¡Jara nokon Dios iki, itan janra ea akinnai!