Eara keenai min shinanna atin, nokon Diossé
40
Eara nokon Ibon manata iki,jatianra ea saí ikaitian, jan ea ninkata iki;
2 ja mawá kininkoniara ea pikoa iki, ja chawáin miimeetaibira ea tsekaa iki:
westíora shankankora ea peníchina iki;
jain jamataxa ea jaki koshia iki.
3 Janra bená bewa, ea axeaa iki;
westíora bewá jan non Dios rabii bewati.
Jaskara oinnax raroira, icha joni Iboki koshikana iki.
4 ¡Iboki koshia jonira raroshaman iki,
jara yoitimabo betan
ja ikonma diosbo rabiaibo betan iamai!
5 Ibo itan nokon Diossé,
ichabires jawékibo min akára jan ratétibo iki,
itan ayorakinra min noa jakonhai.
¡Tsoabira mia keska yamake!
Jabo yoiira, ea yoyo ikasai,
ikaxbira jatíbi en yoiti atipanyamake.
6 Miara yoina menoxontin, itan bero yoabo
meniatonribi raroyamai; yoina keyokin jatiobi
menoxontinribira mia keenyamai,
ocha keyoxonti kopí jawéki menitininribira mia keenyamai.
Ikaxbira, nokon pabíki min ea chopexona ea yoiti iká iki.
7 Jakopíra en yoia iki: Eara neno iki,
ja ea jaskáti wishá meran yoiai keská.
8 Nokon Diossé, mia keena keskáshaman atinra ea keenai;
¡Min eséra nokon jointi meran iki! akin.
9 Ja min joni icha bebonxonra, ja atikeskabiakin jakon ati en jato onanmaa iki.
¡Nokon Ibó, minbira kikinhakin onanke, ea netéreshamaa!
10 Ja atikeskabiakin min jawéki akára en yoia iki; ja min akonkin senenhai,
itan min noa kishpinmaira en jato yoia iki.
Jawetianbira ja min joni icha bebon mia noimis, itan ja min ikon yoiai
yoikin en joneyamaa iki.
11 Ibó, min noimisti shinan ¡Ea washiyamawe!
¡Jatíbitian min noimisti shinan itan min akonkin senenhai shinanman ea panabanon!
12 Ichabires rabínti jawékira ea winóke,
jara en topontimatibires iki.
En jakonma akátoninbira ea yatanke,
¡Jainxonra en moa oinyamabobia iki!
Nokon maponkonia boo winobain ichabires iketian,
jainoax nokon keenti shinanbobira ea keyota iki.
13 Ibó, enra mia yokatai ¡Ea xabáawe!
Ibó, ¡Ea ishtontani akinniwe!
14 ¡Jan ea retekasaibo jato rabinmawe
itan jato benómawe!
¡Ja ea ramiakasaibo
moa rabinax jabábakanon!
15 ¡Ja eki shiroaibo
moa rabinax jabábakanon!
16 Ikaxbi jatíbi jan mia rabiaibora
raroshaman ikanti iki;
ja min akintinin keenaibo
ibakanon jatíbitian neskati: “¡Ibora, ani koshi iki!” iki.
17 Ea riki jawebioma, itan jakonma tenei,
eon shinanbenoyamawe, Ibó.
Mia riki ea akinnai itan ea xabáa,
¡Basiamawe, nokon Diossé!