Iboki koshiwe
37
Jawebi ikonhayamai jonibo kopí sináyamawe,ja jakonma akaibokiribi notsiamawe,
2 jabora ishtonbires keyotaibo iki.
¡Ja xobi yankona iwanixbi choshiai keskati!
3 Iboki koshiwe itan jakon awé,
nato main jawé, itan jenéyamai jakonres iwé.
4 Ibo noibakin noiwe,
jatianra mia kikinni jan keenaibo mia menikin senenhati iki.
5 Min jati nete Ibon mekenman awé;
jaki koshiwe,
jatianra mia jan akinti iki.
6 Ponté mia ikaitian itan itikeskatibi mia ikaira jan mia penémati iki,
bari xaman iketian ikai keská penéra mia imati iti iki.
7 Ibo bebon ikax netéres iwé;
mia akinnon ikax jaon manáreswe.
Nato neten jawékinin bebonaiboki, itan
jakonma jawéki anoxon shinannaiboki sináyamawe.
8 Sináyamawe, moa kikinni sinati jenéwe;
janra mia jakonmain boti atipanke.
9 Ja jakonmabora ja mainmea potakanti iki,
ikaxbi Iboki koshiabaonra, mai iboakin bikanti iki.
10 Nenoax basimara jakonmabo yamati iki;
kikinhakin benakinbira nokokantima iki.
11 Ikaxbi rabímabaonra papan mai iboakin bikanti iki,
jatianra ikoni jakonshaman ikanti iki.
12 Jakonma joninra jaskáaxon jakon joni ramiati benai,
jaskákinra omiskin jakonmaakin oinnai.
13 Ikaxbi Ibonra osanai, moa
nenoax basimara, jakonma joni yamai ixon onanxon.
14 Jakonmabaonra espada tsekai, itan jaton kanóti esteai,
ja jawebioma, itan ja noibatishokobo jato pakémanoxon,
¡Jakonni jaa jonibo retenoxon!
15 Ikaxbira jaton espadaninbi
jointiain chachikaakanti iki,
itan jaton kanótibora beshéakin sekea banéti iki.
16 Ja jakon joni jayata ichama jawékira,
jakonma jonibaon icha jawéki
winoa bebonbires jakon iki.
17 Jaskara ikenra Ibon jakonmabo keyoti iki,
ikaxbi jakon jonibora akinti iki.
18 Jawe jakonmanin yointi yamaabora, Ibon koirannai,
itan jaton papana biti maira jatíbitian jatona iti iki.
19 Atikoma netebo iketian, ja pitin iti iketianra,
rabinkantima iki, icha pitiya ikax.
20 Jakonmabora xobi choshi ikai keskati tiríti iki;
ja Ibon rawíbora koin ikai keskati keyóti iki.
21 Jakonma joninra jawéki bichinxon
jato báneyamai, itan jato kopíayamai,
ikaxbi jakon jonira noibamis iki,
itan jawéki menitai iki.
22 Ja Ibon jakon shinanxonabaonra, jawen papan mai biti iki,
ikaxbi ramíti jan shinanxonabora keyoti iki.
23 Ibonra, jaskati jati joni onanmai,
jaskáxonra jawen keena keskáakin jan jamai;
24 paketaxbira, jainbi rakátima iki,
Ibon metsona ikax.
25 Eara bakeranon iká iki, eara moa yosi iki,
ikaxbira jakon joni jawetianbi
potakana en oinnama iki,
jawen bakeboribira jawéki menikanon
ixon jato yokatai en oinnama iki.
26 Jatíbitianra noibamisti shinanya iki, jaskákinra jan raroti jawéki jato meniai;
jawen bakebora jato kopí jakonkantibo iki.
27 Jakonma jawéki jenexon jakon jawéki awé,
jatianra jatíbitian jain jatia mia iti iki.
28 Ibonra atikeskabiakin jakon ati noike,
jatianra senen ixonaibo jato potayamai;
ikaxbira jakonmabo jato keyoai,
itan jaton chiní bakeboomara jato imai.
29 Jakon jonibaonra jaton papan mai biti iki,
jainra jatíbitian jakanti iki.
30 Jakon jonira onanax yoyo ikai;
itan jakon joninra atikeskabiakin jakonhakin jawéki akai.
31 Jawen jointiainra Diossen esé jake,
¡Jawen taéra jawetianbi rainsh itima iki!
32 Jakonma joninra reteti shinanyaxon
paranaxon, jakon joni oinnai;
33 ikaxbira jakonma jonin retekasaitian, Ibon amayamai,
ja jakonma akáribira iboamatima iki.
34 Mia, Iboki koshiwe,
itan yoiti iwé,
jaskara ikenra jan bebonbires kikin mia imati iki,
jatianra papan mai min biti iki.
¡Min beronbira jakonma jonibo keyotai min ointi iki!
35 Jakonma joni, kikinni rabikataira en oinna iki,
ichashaman peia jiwi peata keskára iká iki;
36 ikaxbira kaax moa keyota iki;
enra benaa iki, ixonbira en nokoti atipanyamaa iki.
37 Kikinhakin jakon joni oinwe itan ja yoixonti yama joni:
ja joni rama jaskara ikí kaira jakonshamanres iti iki.
38 Ikaxbi ja yoitimabora kikinbiresi keyoti iki;
ja jakonmabo jaskara iki kaaira keyoti boaibo iki.
39 Ibonra jakon jonibo akinnai,
jaton atikomatianra jainoa tsonbi jaweatimainko jonékanti iki.
40 Ibonra jabákanon ixon jato akinti iki.
Jakonmabaon anaketianra jato jabámai,
itan jato xabaai, jaki chipóti benakana iketian.