Ibo riki nokon joé, itan ea jan akinnai
27
Ibo riki nokon joé, itan ea jan akinnai,¿Tsokiki ea raketi iki?
Ibora nokon jatin paranan ikai iki,
¿Tsokiki ea rakéti iki?
2 Ja nokon jakonma rawíbora,
ea jakonmaanox, itan ea retenox tsinkíkanai,
ikaxbi jabo riki ja tatí ikax pakékanaibo.
3 Icha sontárobaon ea kateabira,
nokon jointiain ea rakéyamai;
ea anox benxokaakankebira,
jawe iamai jakonbires ea iti iki.
4 Westíora jawékiresa en Ibo yokata iki,
westíora jawékibichoresa ea keenai:
Ea jaai kaman, jatibitian Ibon xobonko iti,
jawen xobonkoxon rabiti kopí,
itan jawen metsá en ointi kopí.
5 Jakonma atikoma meran ea iketianra,
jawen xobon imaxon Ibon ea koiranti iki;
ja xobo ota naman iketianra ea panati iki.
¡Shanka pekaten imaxonra ea jakonbires imati iki!
6 Jatianra bewakexon nokon
rawibo manaon en ointi iki;
jatianra jainxon rabiti xobonxon
yoina menikin en menoti iki,
itan raroira ea saí iti iki,
bewábora Ibo en bewaxonti iki.
7 Miara en kenai, Ibó, ea ninkáwe.
Ea noibawe, ¡Ea yoiwe!
8 Jointininra ea yoiai:
“Ibo benawe, akin”.
Jatianra en, mii bebon iti benai, Ibó.
9 ¡Ea jonéxonyamawe!
¡Ikonbiresi sináxon ea omisshamawe!
¡Ea jan akintira miabichores iki!
Eabicho itan jan koirantioma ea potayamawe,
miara nokon Dios itan ea jan akinti iki.
10 Nokon papa betan nokon titan ea jenekenbira,
ja Ibon bixon, ea koiranti iki.
11 Ibó, min bai ea oinmawe;
nokon rawíbo kopí, jakon bain ea bowé,
12 jaton keena keská ea amayamawe,
eki jansoaibo itan ishtonbires sinataibora,
ea akí wenikanke.
13 Ikaxbira en akonkin onanke,
ea jaai kamanra, jatíbitian
noibataanan ea Ibon akinnai en ointi jake ixon.
14 ¡Iboki koshiwe!
¡Rakéyamai, shinan paxnayamawe!
¡Jaskara riki, Iboki koshiwe!