Masá tenei saí ika itan rabii bewaa
22
Nokon Diossé, nokon Diossé,¿Jaweatiki min ea potabainna?
¿Jawekopíki ea akinni mia joyamai?
¿Jaweatiki chexakaati yoyo iananbi sion ikainbi min ea ninkáyamai?
2 Nokon Diossé,
jatíbitianra en mia kenai,
jatianra jawebi min ea yoiamai,
¡Ea tantitira yamake!
3 Ikaxbi miara kikin jakon iki;
mia apo iketianra, Israelbaon mia rabiai.
4 Non reken papabora miki koshikana iki;
miki koshikanketianra jato keenai min jato menia iki;
5 min akinnon ixon mia yokákanketianra,
min jato xabakamaa iki;
miki koshikanketianra,
ja bikaskanai min jato menia iki.
6 Ikaxbi eara jonima iki,
eara westíora xenares iki;
¡Eara jonibaon osanaires iki!
7 Ea oinnaibora, eki shiroresai;
eara keshbíxonkanai, itan eara bonkéxonkanai,
8 jatianra yoyo ikanai:
“Natora Iboki koshiai iká iki;
abanon ja Ibon akinkin.
Jara kikinni jaon keenai iki,
abanon jan xabaakin”, ikibo.
9 Jatianra jaskara iki:
Minra nokon titan poko meranoa ea pikoa iki;
jawen xochinkora min ea tantimaa iki.
10 Ea pikotamatianbira,
min ea koirana iká iki;
ea nokon titan poko meran,
inontianbira mia nokon Dios iki.
11 Eibakeax ochóyamawe,
enra akonbireskin masá teneai,
jatianra tsoabi ea jan akinti yamake.
12 Torobaon akai keskákinra nokon rawibaon ea kateke,
Basánhinoa toro sinábo keskára ikanai;
13 león sinabo ikai keskatira keokanai,
janxbataanara eki choronkanai.
14 Eara onpax chikotai keská iki;
nokon xaobora wetsankobiresbo iki.
Nokon jointira emeran senpa
charatax tsononai keská iki.
15 Nokon kexára kenkex keská manxan iki;
nokon janara manxantoain moa taxnáke.
¡Mawá poto ikain kamanra min ea miinke!
16 Ochiti keská, westíora tsamá jakonmabaonra akonbireskin ea katekanke:
nokon meken betan taera ea waxayonkanke.
17 ¡Nokon xaobora en toponti atipanke!
Nokon rawíbaonra ea oinkin jeneyamai;
18 nokon chopara menianankanke,
jatian jan biti onanoxonra suertebo akana iki.
19 Ikaxbi, Ibó, minra ea koshi meniai,
¡Ea ochóayamawe! ¡Ea akinni ishton jowé!
20 Espadanin retekanaketian ea xabáawe,
ja ochitibaon ea retenaketian jato amayamawe,
21 ja leónbaon kexainoa ea xabaawe,
¡Ja torobaonra jaton machaman ea anake, ea koiranwe!
22 Mia yoikinra nokon wetsabo en jato yoyo ati iki,
jato tsinkitainkoxonra en mia rabiti iki.
23 Mato, ja Ibo jakonhaibaon ¡Já rabikanwe!
¡Jatíbi Jacobnin chiní bakebaon onankanwe jara kikin koshi iki ixon!
¡Jatíbi Israelnin chiní bakebaon, ja rabikanwe!
24 janra jawebiomabaon masá teneaitian,
ibanon jara jatonbiri iki ixon oinresshamai,
jato oinnaxa jonéyamaribiai.
¡Akinnon ixon maton yokatara jan ninkatai!
25 Min joni ichabo bebonxonra,
min senenhai iketian en mia rabiti iki;
mia jakonhaibo bebonxonra,
mia axonti yoia ixon en senenhati iki.
26 Ja mato ramiakanaibaon, pikanwe,
mato pototai kaman akanwe;
mato ja Ibo noiabaon rabikanwe,
itan icha baritia jakanwe.
27 Meskó jonibo, itan jatíbi maibotiibi ikábo,
jatíbi mai senenainkobo iká jonibó:
Ibo shinankanwe, itan jaiba bekanwe;
¡Já bebon chirankookanwe!
28 Ja Ibora apo iki.
Janra koshi ixon maibotiibi jato ikinnai.
29 Beoxon, jabichores rabikanwe,
jatíbi ja icha jawékiatax jaabo,
jatíbi ja mai poto baneti boaibora,
jatonbinix jan jati neteoma iki.
30 Nokon chiní bakebaonra Ibo rabikanti iki,
itan jatíbitian já yoii yoyo ikanti iki;
31 ja chiní pikotaibora jato yoikanti iki,
atikeskabiakin jakon aká,
itan jawen tee akábo.