Diossen koshin, jawékibo jonia
19
Naikanra noa onanmai Diossa koshi iki ixon;ja jonia ixonra ja nai xabá yankonatonbi noa yoiai.
2 Netebora jatonbinix yoianankanai;
yamébaonra ninkákanon ixon jaton joi raanai.
3 Jawe joibi non ninkáyamaabi, itan
yoyo ikai non ninkatamabira,
4 jawen joi nato main jatíbiain nokotai,
nato nete senenainko kaman ochó inonbi.
Jainra Diossen bari jain iti aká iki,
5 jatian jara pikotai, wanoai joni,
jawen itinkoniax kaai keskati,
ishtoai joni ishtoi kaai keskára raroshaman kaai.
6 Nai pasenenainoaxa bari pikotai,
jatianra wetsa pasenenaori
nokotai kaman mayati kaai,
tsoabira jawen xanan
ayamanon ikax jabáti atipanyamake.
7 Ibon axeti joira ponté iki,
jaskara kopíra bená jati jato meniai iki.
Ibon ja ati yoia joira senen iki,
jaskara kopíra namanshoko joni ikenbi onan imai.
8 Ibon ja ati yoia axébora atikeskabiakin akábo iki,
jaskara kopíra non jointiain noa raromai.
Ibon senenhati yoia joira
jawe jakonmabi néoma iki,
itan jakonhakin ponté itira noa onanmai.
9 Ja senenhati Ibon yoia joira jawe jakonmabi néoma iki,
itan keyóyamai jatíbitian iki.
Ibon jaskara ati shinannabora ikonbo iki,
jatíbi jabora atikeskabiakin yoiabo iki.
10 ¡Kikin jakon orobi xewinabires kopí riki!,
¡Bona mishkin xewina batabo riki!
11 Nato ea min yonoti atikoma onsá keshani iká riki,
itan jan jakonhanon ikaxa ea yoiti iti iki.
12 ¿Tsonki enra jakonma ake ixon janbi onanai?
¡En joné ocha akábo kopí,
ea shinanxonyamawe, Ibó!
13 Ea min yonoti nokon rabí shinan bichinwe;
rabikan ea aresnaketian ea amayamawe.
Jaskara ikaxa jan yointi yama joni ea iti iki,
ani ochankoniax xabakaatara ea iti iki.
14 Nokon joibo, itan nokon shinanbo min
oinna jakon iketian, ea bixonwe,
Ibó, mia riki, jaki chipoti ea jain joneti,
itan ea jan xabaai iki.