Ibo betan iti riki jakon
16
¡Diossé, ea koiranwe, miki chipokinra en mia benai!2 Enra mia yoia iki:
“Miara nokon Ibo iki, minra ea jakonhai;
mia keskara wetsa yamake”, akin.
3 Nato mainmea diosbora koshi iki,
jaonshaman raroaibaonra jaskara yoiai,
4 ja jisaakin ja rabiti icha kaiaixon,
ja rabikin chibanaibora jaskatai.
¡Jawetianbira já menikin icha yoina retexon menokanaitian, en jato betan atima iki!
¡Jawetianbira nokon kexakan jawen janebo en moa yoiwetsayamai!
5 Mia, Ibo riki, ja ea jatíbi jayata;
jakon jawékibo bebonbires min ea meniai;
nokon jatira min mekenman iki.
6 Kikin jakonhira jatinkora min ea imaa iki,
¡Ja iboakin mia nokon papaibakea en biti jawékira metsáshaman iki!
7 Ibora en rabiti iki, janra ponté ea boai,
kikin chichokeabira nokon shinan, jakonma iketian yamébo ea ponteai.
8 Jatíbitianra ea nokon Ibo betan iki;
já nokon mekayao iketianra, ea jawenbi pakeyamai.
9 Jaskara kopíra, emeran,
nokon jointi kikin raroshaman iki.
Nokon shinan, kaya itan yorara miki koshiax jati iki,
10 mawá kini meranbira, min ea jenetima iki,
¡Ja min jakon yonotira, mai kini meran min potatima iki!
11 Mia keenai keská jatira min ea oinmaa iki.
Mia ikainra kikinshaman raroti jake;
mii pataxa jatíbitian beneshaman iti jake.