Jonin jakonma shinan
14
Onanmabaonra shinannai Diossa yamake ixon:Jatikaxbira shinan jakonmaakana iki,
ramibires jawékibora akana iki;
¡Tsoabira jakon akaima iki!
2 Naikanxonbira Ibon jonibo oinnai,
jakia jakon joni, itan jan Dios onankasai ixon.
3 Ikaxbi jatikaxbira jakonma baiori bokana iki;
jatíxonbira senenbires jakonma shinankana iki.
¡Tsoabira jakon akai yamake!
¡Westíoratanibira yamake!
4 Jakonma akaibora, onanti shinanhomabo ikanai,
jawékiati piai keskáakin
nokon jonibo keyoaibaonra,
Ibo ramiamakanai.
5 Ikonbiresi raketira saki ikanti iki,
ikaxbi Diossa jaki yoiti ikaibo betan iki.
6 Ja naman shinanmeetaitonin
jaskara atin keenkin shinanakira shirokanai,
ikaxbi Ibonra panai.
7 ¡Sión mananmameax jopainon riki,
jan Israel jonibo xabaati!
Ibon jawen jonibo, moa jakiribi jakon iti imaketianra,
Jacobnin chiní bakebo rarokanti iki,
jatíbi Israel joniboribi rarokanti iki.